OPEN HEAVENS
MATALA LE LAGI MO LE ASO TOONAI 17 IANUARI 2026
(tusia e Pastor EA Adeboye)
Manatu Autu: O faamanuiaga a le Alii (The blessings of the Lord)
Tauloto Tusi Paia:Teuteronome 28:2“e maua fo‘i e oe o nei mea uma e manuia ai; e o‘o lava ia ‘iā te oe, pe ‘āfai ‘e te fa‘alogo i le si‘ufofoga o le ALI‘I lou Atua:”
Faitauga - Tusi Paia: Teuteronome 11:26-27
E alofa le Atua i lana fanau (1 Ioane 3:1), ma e naunau e avatu faamanuiaga iai latou e aunoa ma le tigā (Faataoto 10:22). Peitai, ona o ia o se tamā e faatuatuaina, e lē tali o ia i nisi o tatalo a lana fanau pe afai e na te silafia e lei matutua lelei e pulea lelei mea o loo latou ole atu ai. Mo se faataitaiga, e leai se tamā faatuatuaina e na te avatu i lona atalii e lima tausaga se taavale afi e fealuai ai, tusa poo le a le tauanau mai a lona atalii. E faapena foi lenei, ae lei foai atu e le Atua faamanuiaga ia te oe, e na te faamautinoaina e iai lou poto ma le mafai e pulea ai,ma e le afaina ai oe, pe aveesea ai oe mai le faataunuuina o lana fuafuaga autu mo lou olaga. E na te lē avatu i lana fanau mea e ole mai ai e ono afaina ai, pe faaumatia ai foi faamoemoega o latou olaga. Fai mai le 3 Ioane 2 e faapea,
“Le pele e, ‘ia e manuia i mea uma, ma ‘ia e mālōlō, fa‘apei ‘ona manuia o lou agaga.”
E finagalo le Atua ia e manuia i mea uma ma ia e malolo, peitai e faatoa oo iai pe a manuia lou agaga ma e tuputupu ma matua faaleagaga. O le mafuaaga lea e tatau ai ona e mautinoa o loo manuia lou agaga e ala lea i le fafaga i le upu a le Atua i aso uma. A e faia, e amata ona e manuia ma fiafia i faamanuiaga a le Atua i soo se vaega o lou olaga.
Fai mai le Iosua 1:8 “E le te‘a i lou gutu le tusi o lenei tulafono, a ‘ia mafaufau i ai i le ao ‘atoa ma le po, ‘ina ‘ia e ‘ana‘ana e fai e tusa ma mea uma ‘ua tusia i ai; ‘ona manuia ai lea ‘iā te oe o lou ala, ‘ona e manuia ai lea.”
Le au pele e, a e faatumuina lou loto i le upu a le Atua, e saunia oe e fiafia i ana faamanuiaga ma e manuia ai. Fai mai le Tusi Paia a e fiafia i le upu a le Atua ma e manatunatu iai i taimi uma, e te matua manuia e pei o laau e tōtō i tafatafa ane o vaitafe e le gata e fua mai ona fua i le vaitau e tatau ona fua ai, ae e lē mamae foi ona lau. Fai mai foi le Tusi Paia o mea uma foi e te faia e manuia (Salamo 1:2-3).
E iai lava ituaiga faamanuiaga eseese e te maua mai i le Atua. I aso e lua o le a sosoo atu nei, o le a ou faamatala atu nei vaega e lua, o faamanuiaga e iai ona aiaiga ma faamanuiaga e lē mafai ona toe suia e seisi. Ou te tatalo o faamanuiaga a le Atua o le a mulimuli ia te oe, ao e tuputupu pea faaleagaga ma manuia lou agaga ia te ia. O le tele ona manuia o lou agaga, o le tele foi lena o faamanuiaga e te maua ma fiafia ai, mai le Atua, i le suafa o Iesu, Amene.
