OPEN HEAVENS
MATALA LE LAGI MO LE ASO GAFUA 9 MATI 2026
(tusia e Pastor EA Adeboye)
Manatu Autu: Ole atu mo Lana fesoasoani (Ask for His help)
Tauloto Tusi Paia: Faataoto 3:5-6 “Ia e fa‘atuatua i le ALI‘I ma lou loto ‘atoa; ‘ae ‘aua le fa‘alagolago i lou lava atamai. ‘ia e manatua o ia i ou ala uma, ‘ona fa‘atonuina ai lea e ia lava ou ala.”
Faitauga - Tusi Paia: 1 Nofoaiga Tupu 4:9-10
Na ou talanoa atu ananafi o le lē ausia o se faamoemoega o se tasi lea o iuga i taua ma luitau o le olaga nei. Na ou taua foi o se tasi lea o iuga pe afai o loo fasagatau le Atua i se tagata. O le isi iuga i taua o le olaga, o le manumalo, e ui e tele luitau na ui ai.
A folafola e le Atua e faatasi ma oe i mea uma e te faia i lou olaga, e mautinoa le manumalo, peitai e ono manaomia lou finau ma tau. Mo se faataitaiga, i le Esoto 3:10-12, na fetalai le Atua ia Mose e alu i Aikupito e faasaoloto i le fanauga a Isaraelu mai le nofo pologa. Na fefe Mose i lenei galuega, peitai na folafola e le Atua o le a ia faatasi ma ia. Na usitai Mose ma tulai i luma o Farao, ma fai atu e faasaoloto le fanauga a Isaraelu, peitai na teena e Farao. Na tuitui atu Mose ma le filigā, ae na teena pea e Farao seia oo ina ia faamaualalo i le malosi o le Atua Silisili Ese. Afai e iai le Alii ma oe, tusa poo a tala ma metotia a le tiapolo e faia, e te manumalo.
I le 1 Samuelu 17:1-51, na fefefe uma tagata i le togalauapiga a Isaraelu ia Koliata, ma i le 40 aso ma po, na ia matua faatupuina le fefe i le nuu. Ina ua alu atu Tavita i le tupu mo se faatagana e tau ma le sauai, na tilotilo atu le tupu ia te ia ma ofo pe faapefea ona ia mafaia. Na faamatala atu e Tavita mea matautia na faia e le Atua ia te ia, ma ina ua faalogo iai Saulo na ia faapea atu, ‘Alu ia, ia faatasi le Alii ma oe’. Na faatasi le Atua ma Tavita ma na manumalo ia Koliata. Le au pele e, a faatasi le Alii ma oe, e tafiesea soo se avanoa e te paū ma faatoilaloina ai i se taua.
Fanau a le Atua, aua e te manatu o mea o loo tutupu i lou olaga o ni mea e lei fuafuaina. Ae e te lei fanau mai, ua saunia ma le faaeteete e le Atua mea uma i lou olaga, o loo faatasi o ia ma taua ma luitau i lou olaga, ma e mautinoa e te manumalo. I le faitauga mai le Tusi Paia o le asō, na ole atu Iapesa i le Atua e fesoasoani ia te ia ia siitia ma manuia lona olaga. Na tali le Atua ia te ia ma ua gata mea faigata ma vaivai sa ui ai. E te lē tau faatino galuega ma le matuā faigata ia manuia, valaau i le Atua e avatu le manumalo. E ui na faamanuia Iakopo e lona tamā, na faigata mea uma seia oo ina ia lafoai i le Atua. Na uu mau Iakopo i le Atua seia faamanuia mai o ia (Kenese 32:24-32).
Le au pele e, taofi lou taumafai e te manuia i lou poto ma lou malosi, lafoai i le Atua ma ole atu ia te ia e fesoasoani mai ia te oe e pei o Iapesa, ona ia avatu lea o le manuia i mea ete faia. O i latou e lafoai a latou fuafuaga i le Atua ma saili i lana fesoasoani, e lē toe faigata le maua o le manuia, i le suafa o Iesu, Amene.
