OPEN HEAVENS
MATALA LE LAGI MO LE ASO GAFUA 29 TESEMA 2025
(tusia e Pastor EA Adeboye)
Manatu Autu: Tamā o le alofa mutimutivale (Father of mercies)
Tauloto Tusi Paia: 2 Korinito 1:3 “Ia fa‘amanūina le Atua, o le Tamā o lo tatou Ali‘i o Iesu Keriso, o le Tamā e ona le alofa mutimutivale, o le Atua fo‘i e ana le fa‘amafanafanaga uma.”
Faitauga - Tusi Paia: Salamo 25:1-6
O tauloto mai le Tusi Paia o le asō o loo faaali mai iai tatou o le Atua, o le Tamā o le alofa mutimutivale. O lona uiga e le gata e alofa mutimutivale, ae o ia o le punaoa o le alofa mutimutivale. E mauoa le Atua i le alofa mutimutivale (Efeso 2:4), ma e fou lona alofa mutimutivale i aso uma (Failauga 3:22-23), o loo faaalia mai ai, o lona alofa mutimuti vale e leai se gataaga. O le alofa mutimutivale o le Atua e mafai ona feliuaina vaega uma o le olaga o se tagata faatuatua e manaomia le suia. Faataitaiga, a iai ni luitau i le soifua maloloina lelei poo le tulaga tau tupe o se tagata faatuatua, e mafai e le alofa mutimutivale o le Atua ona feliuaina le tulaga o lea tagata. E le na o le tasi le itu o lona alofa mutimutivale, e tele ona itu ma e atoatoa lona lelei. A afio mai le Tamā o le alofa mutimutivale i le olaga o se tagata, e nate toe faafoisia avanoa ua leiloa i lona olaga ma toe faafou mea uma. Fai mai le Roma 9:15-16
“Auā na ia fetalai atu ia Mose, “‘Ou te alofa atu i lē ‘ou te fia alofa atu i ai, ‘ou te alofa mutimutivale fo‘i i lē ‘ou te fia alofa mutimutivale i ai.” O lenei, e lē mai lē ‘ua mana‘o, o lē mai lē ‘ua tausiniō, ‘ae mai le Atua o lē alofa mai.”
E te iloa e ui e leai se gataaga o le alofa mutimutivale o le Atua, e lē avanoa mo soo se tagata aua na o le Atua e faia le faaiuga poo ai tagata e oo atu iai lona alofa mutimutivale. Ae lei tuuina atu e le Atua lona alofa mutimutivale i se tagata, e tatau i lea tagata ona tautino o le Atua o lona Tamā. O le Tamā o le alofa tunoa, e na te tuuina atu lona alofa mutimutivale e leai se gataaga nā o lana fanau. E moni e na te faia le la e susulu i luga o tagata uma, o e lelei ma ē leaga (Mataio 5:45), e iai lava vaega o lona alofa mutimutivale e faaleoleo na o lana fanau. Afai o oe moni o se afafine poo se atalii o le Atua, o lau mafutaga ma ia e saunia le avanoa e te maua ai lona alofa mutimutivale e faavavau.
E na o fanau a le Atua e maua avanoa i le alofa mutimutivale atoatoa o le Atua, o i latou e lē o ni fanau a le Atua, e na o momoi mea latou te maua. O le alofa mutimutivale o le Atua e mauoa ma e faateleina ona itu, peitai e tatau i soo se tagata ona avea ma atalii poo se afafine o le Atua e latou te maua ma fiafia ai. E alofa fua mai le Atua ma e telegese lona toasā (Salamo 145:8).
Le au epele e, afai e te lei fanaufouina lava, aua nei faamaimauina seisi minute i fafo o aao mafanafana o le alofa mutimutivale o le Atua. Ua na o ia lava e mafai ona ia avatu se olaga e mauoa ma malie ai le loto i le lalolagi nei ma faamautinoaina lou tulaga i lona malo e oo i le faavavau. Afai ua avea oe ma atalii poo se afafine o le Atua, ola i le usiusitai i lona finagalo ma e na te avatu ia te oe le faulai o lona alofa mutimutivale.
Tatalo
Tamā, faamolemole fesoasoani mai ina ia ou maua le mafanafana o lou alofa mutimutivale i soo se vaega o lo’u olaga, i le suafa o Iesu, Amene.
