Dentrada------------------Little Dreamer---------------Negazione(3:09)
Buen día, hue ye mierques, y son as 11 oradas...prencipia O Suenio d´o Dragón, dende Radio La Granja, 102.1 d´a F.M, en o vico de San José, en Zaragoza, Ciudat Prisión.35 anyos, ni normals ni nuevas, 35 anyadas en libertat!!!!
Cuña Crowfounding-------------------1:48
Bueno, pus tornamos a veyer-nos y sentir-nos en suenios. Como que pareixe que no t'animas a escribir-me ni a contar-me brenca, voi a recordar-te todas as posibles formas de contactar con o programa, y con yo, Jose Dragón
Si quiers participar y acompanyar-me, puetz fer-lo d'as siguients trazas:
A primera, clamando en directo a o programa, pa ixo has de marcar o nueu siet seis trenta y seis uitanta y ueito novanta y quatro…….nueu siet seis tres seis ueito ueito nueu quatro.
Tamién puetz mandar os vuestros comentarios, criticas, peticions...a o guasap siguient: Hashtag OSD seis uitanta y nueu novanta y ueito zero seis vintisiet….Hashtag OSD seis ueito nueu nueu ueito zero seis dos siet.
Recuerda que, como que a intención ye fer o programa de raso en aragonés, te pido permiso de antemán pa traducir-lo a ista luenga. De no estar asinas, lo leyeré en l'idioma en que lo mandes.Si, por o que sía, no puetz escuitar a fm, no i hai problema, puetz escuitar o programa en directo vía on line, l'adreza ye hache te te pe dos barras inclinadas radiolagranja (tot chunto y en minuscla) punto caster punto fm´. Y si asinas tampoco puetz escuitar-lo, pencharé en Ivoox os audios pa que cadagún pueda escuitar-los quán y án quiera u pueda; existe una pachina de Facebook tamién, O suenio d´o Dragón.
Ya t´he dito que o 5 de chunio presentan o quarteno disco Los Drunken Cowboys? Como que no, ixo ye que no´en yeras escuitando...Invocatio ad deos etilicorum se clama…
Empirismo Sajón---------- Los Drunken Cowboys(2:11)
Mosica de fondo------------------Coleman Hawkins...Midnight sun will never set (2:54)
Acostumbradas a vivir de prisa, as personas ixuplidamos, en muitas ocasions, aturar un momento a o canto d'o camín d'a vida pa poder contemplar un amaneixer, una mesa de sol, a rosada en os tuyos uellos.
Fer un alto en o camín no significa quedar-se dezaga; ye necesario remeter fuerzas pa poder continar sin trencar-se. Yo mesmo, a zaguera vegada que salié de fiesta, a nueit duró 3 meses.
No sé muit bien cómo ocurrió; remero haber saliu d'o mío paúl encenegau con una ideya: quereba fer funambulismo suspendiu d'as estrelas; a tal fin, heba aconseguiu una buena cuerda, y una piertiga pa mantener-me en equilibrio una vegada hese aconseguiu enlazar un par de estrels con a mía bagueta, procurando no fer-les garra danyo. Pensaba dar-me un fico en augua de Luna, y en ixe preciso inte... Luna zarró os uellos. Estió en ixe momento quan, erratico en o mío caminar a foscas, trafegué l´horizont d'os míos suenios en a leixanía.
Agora que Luna ha ubierto os uellos de nuevo, y que tu ya no me miras ni en suenios, a nueit cada vegada ye mas y mas negra...
Dr. Deseo-------------------La noche ayuda (3:40)
Mosica de fondo….Chicho Sánchez Ferlosio.
Fa 15 días estiemos charrando de Vicent Blasco Ibáñez, y muit especialment, d'a suya novela A Bodega. Decibanos que en ella se relataba de forma cruda y realista, a situación d'o campo andaluz; y encara que o escritor situaba a trama a primers d'o s. XIX, yera claro que en realidat yera relatando o que ell mesmo heba puesto comprebar con os suyos propios uellos…Hue imos a centrar-nos un poquet en a situación politica y social europea y, concretament, d'o Estau espanyol a lo prencipio d´o sieclo xx.
A la sangría que se yera producindo en Europa dende 1914, caleba adhibir as tensions internas que, en o sino d'os exercitos y d'os países belicherants, prencipiaban a aflorar. En Rusia, l'eixemplo mas sonoro, a popularidat d'o gubierno provisional baixaba en picau, a o mesmo tiempo que o lema bolchevique «paz, pan y tierra», prencipiaba a extender-se de forma incendiaria por tot o país. Asinasmesmo, as desercions, as revoltinas de soldaus, as rechiradas y a escasez d´alimentos, asinas como a proliferación d'a militancia obrera, s'extendeban por toda Europa; L´Estau Espanyol no sería una excepción.
En qualques sectors politicos, entre 1917, cobraba forza a convicción que l'orden constitucional establiu en Espanya correría a mesma suerte que o d'atros países. Yeran varios os posibles endicios que sucheriban ista posibilidat. Por una parte, o desbordamiento violento por a cucha de tot o movimiento obrero constituiba, plegau o verano de 1917, una realidat tanchible; por unatra parte, o feito que isen deputaus y parlamentarios absolutament integraus en o sistema os que lideraran y tractasen de cohesionar las protestas, presachiaba una revolución a o estilo d'a de Francia en 1789. Ista perspectiva permitiba, a lo menos, abrigar a "esperanza" que no se reproducise un esclatiu social esbarrancau como que o que s'heba produciu en marzo d'ixe mesmo anyo en San Petersburgo.
En unatro d'os frents, en l'exercito cundeba o descontento por l'abandono que os gubiernos teneban a l'elemento militar, tanto en l'aspecto personal como que en o material. L´exceso de presencia de militars, procedents en a suya mayoría d'a Guerra de Cuba, no aconseguiba unatra coseta que chenerar un ambient antimilitarista en amplios sectors d'a población. En conseqüencia, cundió o descontento dentro de l'ambito castrense y as primeras protestas prencipioron a cristalizar arredol d'a politica d´ascensos levada a cabo por o Ministerio, en a quala a proliferación de favoritismos enrarexeba, mas si culle, l'ambient. Asinas, con a finalidat d'esfender o sistema d´ascensos por escala zarrada, s'establioron en 1916 y 1917 as primeras «chuntas d'esfensa», si bien iste tipo d'organismos teneba os suyos orichens en prencipios d'o sieglo XIX.
En o plazo de pocos meses, a concurrencia de l'Asembleya de Parlamentarios, d'as Chuntas d'Esfensa y d'a huelga revolucionaria que se materializaría en agosto, metería a Dato contra as cuerdas. O 19 de chulio, disuelta l'Asembleya de Parlamentarios, , plegaba a noticia d'a declaración d'una huelga de ferroviarios en Valencia. La causa yera o despido, por parte d'a Companyía d'o Norte, de diez treballadors. Por o que pareix, entre alcontradas entre treballadors y fuerzas de l'orden habrían feneixiu dos huelguistas. A determinación amostrada por o Gubierno pa acabar con as albarots reballó a declaración d'o estau de Guerra. Os sindicatos ferroviarios, solidarizando-se con os treballadors valencianos, heban extendiu a convocatoria d'una huelga cheneral a tot o país. Ista seqüencia d'escayecimientos contraveniba os tiempos que heban predeterminau os liders d'o PSOE, que contemplaban una huelga d'iste tipo pa l'agüerro siguient. Dato, entremistanto, heba teniu tiempo d'organizar a suya estratechia y de fer acopio de fuerzas; pareixeba que tot o proceso viviu entre o zaguer mes avocaba irremeyablement a un final a o que habría de fer frent con totz os meyos disponibles; a huelga revolucionaria d'agosto.
Podríanos prener como punto de partida d'a situación o 27 de marzo de 1917. Dimpués de numerosos desalcuerdos y tensions entre a CNT y a UGT, se produciba un alcuerdo entre todas dos organizacions guiau a aunir fuerzas que permitisen una convocatoria exitosa d'una huelga cheneral. Dito alcuerdo s´estraliaba con a publicación d'un manifiesto conchunto entre as dos organizacions.
Revolucionari---------------------------Aspencat ( 3:33)
Asinas, plegau o verano de 1917, os alcuerdos entre todas dos organizacions pareixeban cristalizar con exito. No yera un feito menor o que, en ista nueva fase d'ofensiva cheneral contra l'orden constitucional, se producise, a l'atro'l día d'a celebración de l'asembleya de parlamentarios en Barcelona, a huelga ferroviaria en Valencia. L'ambient afavorió a declaración d'o estau d'excepción o día 21 por parte d'o capitán cheneral d'a rechión, o cheneral Tovar. Este, con a finalidat de calmar os animos d'os obrers, liberó a totz os detenius por as acapizadas y emprendió negociacions con os treballadors. Manimenos, a Companyía d'o Norte se negaría a re-almitir en o suyo puesto de treballo a trenta y seis treballadors d'a sección local d'a Unión de Ferrocarriles, os quals heban estau despedius entre las protestas. Ista actitut por parte d'a companyía resultaba incomprensible en todas as instancias de gubierno. O propio rei no aconseguiba a comprender a dureza d'a companyía ent'os obrers.
O 2 d'agosto, a Federación Nacional de Ferroviarios heba anunciau que si os treballadors despedius no yeran admitius en un plazo maximo de ueito días, se convocaría a totz os suyos afiliaus a una huelga o 10 d'agosto. A negativa y a zarrazón d'a companyía pa re-almitir a os treballadors resulta, encara a día de hue, mas que sospitosa.
Dato, dende a discrección, dominaba bien os tiempos y yera plenament conscient que, tarde u luego, a huelga cheneral sería un feito. Por una parte, a clau sería marcar ell o ritmo d'os escayecimientos, de traza que si aconseguiba que s´apreciza-se, será tamién un fracaso. Por unatra parte, ixa precipitación aconseguiría que os militars y os deputaus no aconseguisen madurar a tiempo una posible actuación conchunta con os obrers. Vinculau a ista ideya, un aceleramiento d'as mobilizacions, privaría tamién que a unidat d'acción entre as propias organizacions obreras no se podese materializar encara, en perchudicio d'a coordinación d'iniciativas a piet de carrera y en favor d'a suya neutralización, como que asinas se produciría. Dato y Sánchez Guerra aconseguirían desplegar en ista crisi, y con notable exito, una autentica estratechia de división de l´alversario.
Arredol d'o desencadenant final d'a huelga cheneral existen elementos confusos. Existiban prevatinas por parte de Cambó pa liderar as mobilizacions dende l'asembleya de parlamentarios. Istas yeran recibidas con cierto gusto por os liders socialistas y republicans, que veyeban en a propuesta d'o lider catalán una forma de revolución politica relativament pacifica. Ista acceptación de Cambó, provocó que totz os plans existents se posposieran y quedasen enrinconaus en función d'a nueva adreza que preneba a mobilización. Manimenos a conseqüent ralentización d'os plans, dende o gubierno se difundiría de forma intencional a remor d'una imminent huelga ferroviaria, motivo por o qual se cursarían ordens a las autoridatz locals pa extrimar a vichilancia sobre os liders sindicals. En ditas ordens se explicitaba o control especial sobre sospitosos de portiar armas, o qual cheneraba gran alarma. A enorme difusión d'a noticia, no deixaban de chenerar remors insistents sobre a participación d'o propio Ministerio d'a Gobernación en a creyación d'os estaus d'alerta social.
Unilateralment, por parte d'os socialistas, se creyó un comité de huelga formau por Largo Caballero, Besteiro, Daniel Anguiano, Saborit y a sola muller dirichent d'o movimiento socialista, Virginia González. A misión d'o comité se limitaría a la mobilización d'a clase treballadera, pero no a la coordinación d´acaizadas y actividatz insurchentz. A noticia d'o comienzo d'a huelga en Valencia causaría a os liders socialistas una enorme sorpresa y no la recibirían con goyo, si bien, obligaus por os escayecimientos, manifestarían adhesión a la mesma.
Sánchez Guerra se carriaría d'una forma especial os odios d'os sindicalistas y o suyo figura quedaría muit desdibuixada a resultas d'as suyas actuacions entre a crisi. Oficialment yera o ministro de Fomento, o vizconde d´Eza, l'encargau de conducir as negociacions, pero Sánchez Guerra, o
tot-poderoso ministro de Gobernación, yera obvio que as supervisaría d'una forma mas que activa. En iste sentiu, Dato heba meso a o frent d'o Ministerio mas exposau a o solo que, por as suyas condicions personals y politicas, podeba enfrontinar tal presión y que, chunto a atras consideracions, yera un autentico amant d'a lei y l'orden, encara que pa mantener-las hese d´apurar os limites por ellas fixaus.
Estase o que estase o paper d'o gubierno en o desencadenamiento d'a huelga de Valencia, ista se convertiría en l´espoleta d'os succesos revolucionarios d'agosto. Si Dato i heba aventau, u no, a huelga, ye un afer por dilucidar, pero lo cierto ye que le conveniba que a mesma se levase a cabo en as condicions en as qualas se produció, a espaldas d'as Chuntas y con l'asembleya de parlamentarios disuelta. Resulta comprensible, pus una represión exitosa d'o periglo revolucionario en ixos momentos, conchuraría o periglo de cara a o futuro. O Gubierno no podeba deixar pasar ixa oportunidat. Por tanto, a posibilidat real d'una orquestación entre bambalinas, enfocada enta l'acceleración d'o proceso, por parte d'o gubierno, resulta mas que prebable.
Entre as luces y uembras que se veniban dando entre tot o proceso, l'ambient huelguistico, focalizau ya en diversos puntos d'a cheografía espanyola, cobraba un empento especial dimpués d'os escayecimientos de Valencia. A huelga cheneral quedó finalment aprebada pa o luns 13. Una buena preba de l'exito d'a estratechia de Dato la apreciamos, precisament, en a succesión d´errors producius por os huelguistas, fundamentalment, en termins de coordinación y aplicación de «tacticas» revolucionarias a piet de carrera. L'harmonización entre as diferents zonas cheograficas, asinas como entre as organizacions sindicals, a UGT y a CNT, estió precaria. O primer día de huelga, l'adreza socialista estió aturada en Madrit mientres celebraba una reunión en a carrera d'o Desenganyo. Os obrers revolucionarios madrilenyos padeixerían d'una enorme desorganización en as accions a chicota escala, tanto en as comunicacions con os mandos como que entre ells en as carreras.
O 13 d'agosto se producioron violentos choques con a policía, que practicó numerosas detencions. Los transportes, como que o tramvía, quedoron muit afectaus y l'aturo se reprodució masivament en todas as actividatz comercials d'a ciudat. O gubierno opté por declarar a lei marcial, clausurando a Casa d'o Pueblo y ordenau a detención d'o suyo comité. O movimiento s'extendió a tot l´Estau.
Se tractaba d'un estau de guerra cheneral en qualques nuclios cheograficos d'o país. Totz os treballadors d'as companyías ferroviarias secundoron l'aturo, de traza que dende Galicia dica Andalucía s'aconsiguió paralizar o transporte de mercaderías. A mecha pretada fuego por tot o mapa sobreixeba a os suyos organizadors, os quals perdeban o control d'a situación.
Dato, dende a presidencia d'o Gubierno, goyaba de suficient información d´abanzamiento sobre os movimientos planificaus por os sindicatos. Yera una información que le permitiba, en muitos casos, abanzar-se a las suyas accions. Manimenos, a explosión de violencia nos fa pensar que no yera plenament conscient d'a magnitut que as mobilizacions podeban aconseguir en termins d'orden publico. Maniaba información sobre os trangos a dar, pero no conoixeba a fuerza real a la quala s'enfrontinaba. Isto explicaría, en bell modo, l'emplego gradual d'a fuerza por a suya parte.
En termins d'aconsiga real d'obchectivos, a huelga estió un rotundo fracaso. L'aturo estió un exito solament en os centros industrials de Madrit, Barcelona, València, Bizcaia, Guipúzcoa y Asturies. En as rechions d'o ueste, centro y sud d'Espanya tasament aconsiguió tener impacto, con excepción de Río Tinto, Cartagena, y qualques que atros centros industrials u miners. A revolución se veyió limitada en muitos casos a una rechirada urbana, destacando a suya virulencia en Madrit, Barcelona, València y Asturies. Una d'as claus por as qualas s'abortarían o suyo desembolique, sería a dificultat d'establir vinclos efectivos entre os activistas urbans con os labradors. Ista falta de connexión entre os diferents ambitos obrers beneficiaría enormement a las fuerzas de l'orden, a las qualas una extensión d'o conflicto a zonas rurals les hese implicau enormes dificultatz. Unatro factor en beneficio d'a politica gubernamental sería a fidelidat de l'Exercito a l'orden constitucional. Este, manimenos os recients episodios protagonizaus por as Chuntas d'Esfensa, fuyiba de qualsiquier clase de confluencia con as corrients obreristas, aluenyando a uembra de qualsiquier clase de frent común con os huelguistas. Con o paso d'os días, a politica enchegada por o gubierno Dato s'amostraba atinada y, en bell modo, aluenyaba o tant temiu «pantasma» de San Petersburgo, que s'iba deluyindo.
O día 16 d'agosto a rechirada i heba practicament plegau a la suya fin. En ixa calendata, o movimiento se veyería privau d'os suyos dirichents, os quals heban estau detenius y engarcholaus. Fendo un balanz d'a violencia mesa en acción, Cataluña, con trenta y siet muertos, rechistraría o numero mas elevau de victimas. En iste sentiu, tamién heban existiu importants diferencias de "estilo" entre a CNT y a UGT. Entre que a primera no dubdaba en recibir a tiros a las fuerzas de l'orden y a l'Exercito en os vicos de Madrit, a segunda presentaba una cara muito menos violenta en as reivindicacions. L'Exercito actuó con una enorme contundencia. Estioron necesarios quantos días de tirotios y intervencions pa prener qualques vicos de Barcelona. En puestos como Sabadell as siedes d'os treballadors estioron bombardiadas y reducidas a enruenas. O 16 d'agosto estió aturau o periodista y deputau republicano Marcelino Domingo. O 18 d'agosto o gubierno podeba balloquiar d'haber escachau a revolución. Seguntes as zifras oficials, s'habrían produciu setanta y un feneiximientos, docientos ferius y dos mil detenius; este yera o balanz oficial. A realidat, prebablement, duplico u triplicó ixas zifras.
En a zaguera semana d'agosto a huelga yera definitivament vencida; manimenos, o sindicato minero de Asturies mantendría as mobilizacions y os atures entre dos meses mas. O Sindicato Ferroviario d'o Norte lo fería entre trenta y siet días mas. Manimenos o cese d'as alcontradas a gran escala, a crisi continaba latent. Dimpués d'a represión huelguista, prencipioron os chudicios, consellos de guerra, etc., contra os promotors d'os feitos.
L'Exercito, precursor, por parte d'as Chuntas d'Esfensa, de beluns d'os escayecimientos previos a la huelga obrera, refusaba cargar con a responsabilidat d'a represión; represión, por unatra parte, que retrotrayeba a la ciudadanía a os dramaticos escayecimientos de 1909. O 29 de setiembre, dos días antes que Dato deixase o gubierno, un consello de guerra condenó a o Comité de huelga a trenta anyos de reclusión: Largo Caballero, Julián Besteiro, Anguiano y Saborit dentrarían en prisión. Immediatament dimpués d'isto, as Chuntas Militars, reactivando o conflicto anterior a la huelga revolucionaria, tornoron a la carga y, en ista ocasión, re-editoron l´ultimátum que tiempo dezaga heban dau a o gubierno. Dato no yera ya en posición de resistir por mas tiempo. A suya labor entre os meses comprendius entre chunyo y noviembre s'heba limitau a la contención d'as reivindicacions militars. Noviembre empecipiará, a instancias d'o rei, con un gubierno de concentración encabezau por García Prieto. Heba estau superau un perigloso episodio, pero l'orden monarquico y constitucional seguiba afondando en una tendencia de descomposición y de permanent crisi institucional y social.
A resaca, una vegada deixaus dezaga os escayecimientos mas grieus, no cesaba. As albalotz carreranas s´alongoron, encara que con menor intensidat, dica finals d'agosto en qualques nuclios como Barcelona, Asturies y Río Tinto. A violencia manifestada en totz dos bandos heba estau realment grieu . En os sectors d'adscripción mas conservadera d'o país s'heba viviu tot o proceso con autentico panico a un fundimiento d'o sistema.
Las condenas a o comité de huelga, serían durament criticadas. Manimenos, re-editando-se l'acayeixiu en 1909, a presión plegaría de l'exterior, pero en ista ocasión, con muita menos intensidat, pus os países europeus yeran immersos encara en a sangrienta esferra y, totz los brotes reivindicativos d'orichen popular yeran clisaus por os escayecimientos belicos. Unatro conflicto, que heba estau, en bell modo, integrau, pero no acotolau, yera o d'as Chuntas d'Esfensa. Una vegada deixada dezaga a gran crisi revolucionaria que heba sufierto o país, Dato s'enfrontinó de nuevo a o problema militar. As Chuntas d'Esfensa d´Infantería seguiban funcionando y reunindo-se, como que si d'un simple parentesi s'hese tractau. En setiembre, en una d'istas reunions, s'heban adoptau beluns alcuerdos. Istos serían replegaus en una polemica nota que, sin autoría declarada, cercularía por os aquartelamientos de tot o país. Que as Chuntas d'esfensa d´Infantería fesen circular un documento d'iste tipo evidenciaba a persistencia d'o problema. Dita circular conteneba incisivas criticas ent'o estamento politico y, mas en particular, ent'o Gubierno. Un d'os aspectos que de forma mas critica amaneixe en dito documento, ye o relativo a la «moralización» d'a vida publica. O segundo chira arredol d'o estau d'excepción. Os militars refuyiban d'a identificación, que a mayor parte d'a ciudadanía les atribuiba, con as racadas que a huelga d'agosto i heba rebailau: represalias, estaus de guerra, chudicios sumarios, etc. L´autoría d'as medidas represivas adoptadas, se convertiba en un problema d'o que tanto Dato, como as Chuntas refusaban fer-se cargo.
Licenciau en barricaes ----------------Avientu(3:21)
Unatro aspecto a o que s'aludiba yera a la inoperancia d'o Gubierno a la hora de desactivar a huelga, sabendo d'os detalles d'a mesma previament. Isto respondería a la mas que prebable intencionalidat por parte d'o Gubierno por precepitar os escayecimientos, no metendo-les estorbaduras. A labor
d´eslinde, por parte d'as Chuntas, d'a politica gubernamental rebailaba una petición expresa, por parte d'istas, d'a retirada d'o estau d'excepción y d'atras medidas-
L´esmarque d'as Chuntas respective a o Gubierno no solament yera real, sino publico. Isto deixaba a Dato y a Sánchez Guerra a o canto d'una crisi gubernamental. A Chunta d´Infantería no cesaba en a circulación diatribas y documentos criticos, os quals feban continas referencias a asembleyas que se seguiban levando a cabo con absoluta asiduidat. Si Dato heba aconseguiu que, en o momento alchido d'a crisi, as chuntas se metesen d'o costau d'o Gubierno pa guarenciar l'orden constitucional, pasau o conflicto, os militars tornaban a la suya politica asembleyaria. Isto escavonaba qualsiquier esperanza por parte de Dato que, a resultas d'o parentesi huelguistico, se consolidase una solución d'o conflicto militar. O truco, pa o gubierno, yera letal.
Entendendo o documento como que una provocación, o Gubierno no podeba remanir inactivo debant d'o mesmo. Os temperamentos salen a la luz; Sánchez Guerra, como que no podeba estar d'unatra traza, fa plegar una circular a os gubernadors civils; o suyo conteniu, incendiario. Manimenos negar infructuosament a autoría de dita nota, se situaba en o foco d'as Chuntas. Istas pareixeban tornar a la confluencia con os parlamentarios asembleyarios; os unos y os atros facioron d'o ministro de Gobernación un obchectivo a bater. Dato, antes de partir de viache enta San Sebastián, an por o que pareix se reuniría con o marqués de Lema, reiteraba a falsedat que o suyo ministro de Gobernación tenese relación bella con a circular. Sánchez Guerra aludiba a una coordinación politica con tintes conspiratorios en a suya contra, y acusaba a Cambó d'estar dezaga de totz os movimientos que iban en contra o gubierno . O propio president, Dato, no amostraba excesiva esperanza de solución d'a crisi, manimenos o qual no deixaba de manifestar que se tractaba «sencillament d'un falso grotesco que belún heba feito circular por emprenyar a o ministro d'a gubernación».
O gubierno, manimenos estar plenament conscient d´irreversibilidat d'a situación, seguiba presentando batalla. Sánchez Guerra, insistent con a ideya d'a conspiración, no iba desenfilau en tractar d´involucrar a Cambó en os feitos. Iste zaguer fería una zaguera prebatina d'atrayer a Maura a la suya causa y convidar-le a que liderase un movimiento que chitase a Dato, con un zaguer movimiento, d'o poder. Maura, sabedor que un alcuerdo difuera de tot orden monarquico podeba perchudicar-le, presentó una negativa rotunda a la propuesta y tornó a negar-se. Dezaga de tot iste proceso de seduccions politicas, no deixaba d'amagar-se un drama; Maura, inchenuament, mantendría a leyaltat a o sistema, pero o rei nunca amagaría a suya preferencia en o tracto personal con Dato u con Romanones, dinantes que con ell. O politico conservador feba, con o suyo carisma, masiada uembra a un rei encenegau por estar o centro d'intrés d'a politica nacional. A fuerte personalidat de Maura lo feba menos vulnerable a las manipulacions d'o Monarca y una cesión debant de Cambó i habría escavonau a suya credibilidat.
O 24 d'octubre, en l'Heraldo de Madrit, o Coronel Márquez carga contra Dato, afirmando que l'Exercito sufriba as carestías y inchusticias de forma semellant a la población en cheneral y que garra gubierno de cuchas u dreitas, heban aportau una minima solución. A o discurso de tinte recheneracionista exposau por Márquez, caleba sumar la menaza veilada que as Chuntas podrían apelar a o rei con a finalidat d'obtener reparacions.
Dato no aconseguiba rancar d'o rei o decreto de disolución d'as Cortes, o qual perpetuaba sobre ell una desgastant exposición en un gubierno que solament podeba plegar a la suya fin con una caita estrepitosa d'o mesmo. A convocatoria electoral le habría permitiu organizar, dende o poder, unas eslecions a todas luces favorables y, d'iste modo, constituir una mayoría suficient pa poder administrar a crisi sin limitacions y cortapisas parlamentarias. Dica o zaguer momento, contempló Dato a posibilidat que se producise un movimiento d'o rei en iste sentiu; manimenos, a posibilidat que un mayor credito aconseguiba en cerclos politicos, de cara a la salida d'a profunda crisi, yera a formación d'un gubierno con Maura a la cabeza. Ista opción yera refusada vehementment por o rei. Dato pareixeba remanir inerte enmeyo d'a crisi: por una parte, o partiu liberal yera totalment dividiu; por unatra parte, os conservadors yeran cada vegada mas ausents d'os cargos relevants y, en conseqüencia, a suya poco peso en l'administración politica s´evidenciaba d'un modo creixent. A formula politica d'o «redolín» amostraba, plegau iste punto, un escamallo important y irreversible.
L'1 de noviembre, o Gubierno de Dato ya yera historia.
Azero--------------------------Sangre en la manifestación(4:36)
y dica aquí o programa de hue. Si t´ha feito goyo, nos torna-mos a sentircada 15 días en O Suenio d´o Dragón, en Radio La Granja, en o 102.1 d´a F.M.
Has de marchar, pus si tiens que fer-lo, fez-lo; pero si no te viene de gusto...nena, por favor, no vaigas
Baby please don´t go--------Sony & Cher (3:10)
