Dentrada-----------------------Sueños Galácticos-----------------Baby Horror(1:57)
Buen dia, si hue ye mierques, isto ha de ser O Suenio d ́o Dragón, , dende Radio La
Granja, en o
102.1 d ́a F.M, en o vico de San José, en Zaragoza, Ciudat Prisión.
35 anyos informando d’a luita en primera persona, dica la victoria final.
Mosica de fondo-----------------Ron Carter & Jim Hall----------------Telephone.
o nueu siet seis trenta y seis uitanta y ueito novanta y quatro.......nueu siet seis tres
seis ueito
ueito nueu quatro.
Tamién puetz mandar os vuestros comentarios, criticas, peticions...a o guasap
siguient: Hashtag OSD seis uitanta y nueu novanta y ueito zero seis vintisiet....Hashtag
OSD seis ueito nueu nueu ueito zero seis dos siet.
Iste maitín, en dispertar, he teniu un suenio; soniar dispierto ye a millor forma de
viachiar sin desplazar-se d'o puesto. En ell, se m'ha amaneixiu Hermes, o d'os pietz
alaus, mensachero d'os dioses olimpicos, y s'ha endrezau a yo con istas parolas:
-Amigo Dragón, ubre os uellos d'o conoixencia y as puertas d'a locura; prepara-te pa o
que vendrá.
Yo, obnubilau, le he contestau entre farfallos...pus como que no charres mas claro, no
te voi a entender, ni en suenios.
Ha soltau una carcallada y, acto seguiu, m'ha contau lo siguient:
-Prepara-te, recompón as tuyas alas de cera, ista nueit que s’avecina ye nueit bisiesta,
y solament escayeixe una vegada cada quatro lunas de sangre. Y s'ha iu.
Yo, sin tener a opción de dispertar, pus no yera adormiu, he tardau en reaccionar dica
que, finalment, he comprendiu...nueit bisiesta, cal preparar-se p’abrazar a locura contodas as fuerzas que aconsigas fer acopio. De traza que he buscau un par nuevo d'alas
de cera, pus as viellas se redetioron a zaguera vegada que m'amané en exceso a o
fuego d'os tuyos uellos; m'he quitau la lanza d'o costau, he apurau a mía copa de
vinagre d'un trusco y he escupiu a la uembra d'un aforcau. As mandragoras, grilladas
por a suya simient, me chilaban enlocadas: “Ganarás l'amor con a sudor d'o tuyo
frent”. Y yo, deixando dezaga o tablero de xadrez d'a Sagrada Moly, he iu dica o hueco
an tiengo alzada a lata de cucos an habita a Esperanza, la he ubierto y, sibilina, se
m'ha rediu en a cara.
-Imos, le he dito, ye nueit bisiesta, no vas a dar-me ni a mas minima oportunidat?; y,
en intentar obligar-la a salir, m'ha mosegau a man. De traza que, ignorando-la, he
decidiu fer un funeral vikingo pa dar reposo eterno a os míos ideyals y conviccions, he
visitau l'hortal, en o qual sembré iros de segallo AK47 entre as trunfas, por veyer si
alimentaba revolucions, y he cruciau a puerta d'o mío paúl en busca d'una Luna en un
campo d'estrelas de mar; ye nueit bisiesta y yo voi a volar, solenco en companyía d’as
uembras que pueblan as sinuosas avenidas d'ista puerca y viella ciudat.
Dirty Old Town--------Ewan Mac Coll(2:53)
Entre aviento de 1933 y octubre de 1934, a incipient inestabilidat politica entre os
Radicals de Lerroux y l'actividat de la REBLE veniban sobatendo as temors d'a cucha y
d'os sectors obrers. Gil-Robles, lider cedista, yera visto como o "Dollfus espanyol", por
o dictador social-cristiano austriaco ;y as temors sobre un truco fascista s'acreixioron
dimpués d'una concentración que la CEDA celebró en Covadonga o 9 de setiembre de
1934. A istos feitos s'unió a confiscación d'o vapor "Turquesa", que levaba un alixo
d'armas por encargo d'o socialista Indalecio Prieto. Dimpués d'aquell achitau verano,
as Cortes Chenerals se reunioron l'1 d'octubre y ixe mesmo día la CEDA retiró o suyo
emparo a o gubierno presidiu por Ricardo Samper exichindo a dentrada en o mesmo,
coseta que aconsiguió tres días dimpués, quan o 4 d'octubre s'anunció a formación d'o
Gubierno Radical-cedista presidiu por Alejandro Lerroux. Yera o sinyal asperau por as
Alianzas Obreras. "O día 5 d'octubre, a UGT declaró a vaca cheneral y Lerroux
reaccionó proclamando o estau de guerra".
Asinas pues, o día 5 prencipió o movimiento vaquistico y insurreccional decretau por o
Comité Revolucionario socialista presidiu por Francisco Largo Caballero, encara que en
a mayor parte d'o país fracasó. En Madrit destacó a inactividat, igual que ocurrió en
Extremadura, Andalucía y Aragón.En Euzkadi i habió belatra actividat destacada que
estió rapidament safocada, como que tamién ocurrió en Barcelona y Cataluña. Asinas
pues, solament quedaba Asturias, an l'alianza obrera trunfó.L'Alianza Obrera, una ideya surtida en Cataluña por iniciativa d'o chicot partiu
comunista antiestalinista Bloque Obrero y Campesino, estió extendida a la resta
d'Espanya por os socialistas (UGT-PSOE-JJSS) quan o sector encabezau por Francisco
Largo Caballero se fa con l'adreza d'UGT en chinero de 1934 (o PSOE y as JJSS ya
yeran baixo o suyo control) y empenta a ideya de l'Alianza Obrera, en considerar-la un
buen traste pa sumar refirmes a la suya nueva estratechia insurreccional pa
aconseguir o socialismo (abandonando a "vía parlamentaria"). A formación d'una
"alianza por alto" tamién estió ofrida a la CNT pero se negó a integrar-se en ella, como
que ya heba succediu en Cataluña, porque l'adreza confederal afirmó que a CNT por
ella solenca "s'estaba pro pa estricallar a o faxismo".
Manimenos no totz os cenetistas yeran d'alcuerdo con o refuso a l'Alianza Obrera,
como que o cenetista pucelano Valeriano Orobón Fernández que en un articlo publicau
en o diario confederal A Tierra fació un clamamiento a la unidat entre socialistas y
cenetistas (y comunistas) pa aconseguir a "democracia obrera revolucionaria". Iste
cambeo d'actitut de bells sectors cenetistas solament se concretó en Asturias, an o 31
de marzo de 1934 a Federación Rechional d'a CNT sinyó en Gijón o pacto con UGT-
PSOE, que yera a fuerza obrera echemonica en Asturies, manteniendo-lo manimenos
la menaza d'expulsión que le lanzó l'adreza confederal.
Solament dos semanas antes d'encetar-se a insurrección en Asturies s'incorporó a
l'Alianza Obrera l'alavez chicot Partiu Comunista d'Espanya. En os meses anteriors
s'heban incorporau a o pacto dos reducius grupos comunistas disidents: o Bloque
Obrero y Campesino y Izquierda Comunista. Quan se produció a insurrección
asturiana, os revolucionarios prenioron como que consignia a sigla UHP, Unión
Chirmans Proletarios.
Os socialistas asturianos no yeran mas de cuchas que os d'a resta d'Espanya (a
mayoría d'os dirichents d'o PSOE y d'o Sindicato Minero Asturiano yeran aliniaus con o
sector “moderau” capitero por Indalecio Prieto; solament as JJSS yeran
“caballeristas”). En lo primer que se diferencioron estió en que no reprimioron as
mobilizacions obreras que se producioron a lo largo de 1934, a o contrario de l'adreza
nacional que repetiba de contino a consignia “Brenca d'organizar vacas” porque ixo
“debilitaría” a preparación d'a insurrección. Asinas de febrero a octubre de 1934 i
habió seis vacas chenerals en a rechión que afectoron fundamentalment a las cuencas
mineras.
Asturies arde-----------------------Habeas Corpus(3:07)
Un elemento clau en a preparación d'a insurrección yeran las armas y parte d'ellas os
obrers las aconsiguioron furtando-las pacientment una a una d'as fabricas d'armasd'Ovieu y de Trubia. Atras las mercoron a contrabandistas u las trayioron dende Éibar
a traviés d'un ret creyau por as Choventutz Socialistas y o sindicato d'o Transporte d'a
UGT d'Ovieu. A dinamita la obtenioron d'as minas. Todas las armas (1300 afusiles y
quatro metralladeras) y explosivos (milars de cartuchos de dinamita) s'amagoron en
catorce depositos clandestinos que a Guardia Civil no aconsiguió descubrir (quantos
milars de pistolas yeran alzadas en as casas d'os obrers compromesos en a
sublevación).Por lo que fa a o famoso alixo d'armas d'o “Turquesa” en Muros de Nalón,
a o que a prensa de dreitas atribuyó una importancia excepcional pa explicar l'exito
relativo d'a Comuna asturiana, amás de que no teneba como destín final o movimiento
socialista asturiano (iste intervinió en a operación pa colaborar con Prieto), no aportó
mas que bella munición a os revolucionarios asturianos ya que la armas que
transportaba u estioron capturadas por a Guardia Civil u no plegoron a desembarcar-
se.
Unatro elemento clau en a insurrección estió a organización d'as fuerzas paramilitars
que encabezasen o movimiento. Asinas miembros d'as Choventutz Socialistas y d'as
Choventutz Libertarias estioron entrenaus por ex-sarchentz con a cobertura de grupos
d'excursionismo, clubs culturals, briendas campestres u mesmo romerías, por o que
en octubre de 1934 os socialistas contaban con uns 2500 combatents, os cenetistas
con amán d'un milar y os comunistas con uns cientos, o que suposa que os
revolucionarios asturianos contaban con una fuerza organizada de mas de 3000
hombres quan encetoron a insurrección.
Por zaguer os revolucionarios asturianos podioron contar con o diario socialista
Avance, que gracias a o chiro que le dio o suyo nuevo director Javier Bueno, se
convirtió en o organo de prensa d'a revolución que se yera preparando. Por ixo estió
obchecto de numerosas represalias por parte d'as autoridatz ,conquerindo gran
numero de lectors estase de l'ambito socialista, entre cenetistas y comunistas. Mesmo
se produció una vaca en as minas quan o gubierno intentó impedir a circulación d'o
diario.
Como que en a resta d'Espanya, en tierras asturianas a vaca cheneral revolucionaria
s'encetó en a maitinada d'o 5 d'octubre y os miners pasoron rapidament a l'acción,
fendo-se con o control de toda a cuenca minera. Os centros d'operacions se situoron
en Mieres (cuenca d'o Caudal), y en Sama de Langreo (cuenca d'o Nalón), y dende
todas dos localidatz se coordinoron as accions d'os miners que levoron a la rendición
de 23 quartels d'a Guardia Civil en as primeras horas —a resta serían ocupaus
dimpués d'a fuyida d'os suyos defensors en o día siguient—. A iste exito sin
precedentz se sumó o trunfo d'as milicias obreras en as inmediacions d'Ovieu, en A
Manzaneda, sobre un batallón d’infantería y una sección de Guardias d'Asalto ninviausdende a capital d'o Prencipau dimpués de declarar-se o estau de guerra. Manuel
Grossi, miembro d'o comité revolucionario asturiano, anotó euforico en o suyo diario:
Os soldaus royos han aplicau en a Manzaneda os metodos estratechicos d'a
insurrección, han sabiu desplegar-se en guerrilla por totz os frents con toda a sciencia
moderna. A disciplina observada ha estau de tot punto admirable.
Atiendi, Asturies, atiendi--------------Brenga Astur(5:46)
En cambeo en a capital Oviedo o movimiento insurreccional no trunfó o 5 porque una
error tecnica impidió que se producise un apagón en a ciudat, que yera o sinyal
conveniu pa la mobilización y pa que dentrase en a ciudat una columna minera d'o
Caudal encabezada por o secretario cheneral d'o sindicato minero, o socialista Ramón
González Peña, que luego se convertiría en o "cheneralismo" d'a revolución. Asinas
l'exercito y a guardia civil tenioron tiempo de preparar-se pa esfender-se
concentrando-se en os quartels y os puntos estratechicos d'a ciudat. Isto no impidió
que as columnas d'os miners penetrasen en a ciudat ocupando o concello o día 6, o
quartel de carabiners y a estación de ferrocarril o día 7, o quartel d'a Guardia Civil o
día 8 y a fabrica d'armas en a maitinada d'o día 9. Manimenos, os miners no podioron
prener os quartels de Pelayo y Santa Clara que quedoron barzaus.O guarnimiento d'a
ciudat, componida por uns 1.000 efectivos, poco podió fer frent a este barzo y se
limitó a resistir os ataques d'os obrers, tot aguardando que plegase una columna de
socorro. Difuera d'a capital tamién se producioron importants accions en as ciudatz d'a
cuenca minera, especialment en Mieres y Sama de Langreo. En atras partes d'a
provincia estioron atacaus os puestos d'a Guardia Civil, y tamién qualques Ilesias y
concellos, etc.
En Gijón o movimiento insurreccional se veyió condicionau por a falta d'armas y de
municions. I habió beluns disparos dende terraus u finestras dica que o Comité
Revolucionario optó por distribuir as pocas armas y municions que disposaba entre
quatro grupos d'una quincena d'hombres cadagún, que se’n barrachoron dimpués d'as
barracalas devantadas en os tres vicos obrers d'a ciudat. Quan o día 7 d'octubre plegó
a o puerto o crucero Libertat desembarcando un primer batallón de soldaus d'as
fuerzas militars ninviadas por o gubierno pa safocar a rebelión, os grupos armaus
xixonesos -con l'emparo d'un grupo plegau dende Sama de Langreo y d'un cambión
blindau ninviau dende A Felguera- fustigoron a las fuerzas gubernamentals que
intentaban ubrir-se paso enta Ovieu.Difuera d'as cuencas mineras y d'as dos grans capitals asturianas, i habió
insurreccions en o concello de Pola de Siero, an os comités revolucionarios de mayoría
socialista atacoron y rendioron os quartels d'a Guardia Civil, y contino se distribuyoron
armas y s'organizó a esfensa; en Trubia, os obrers d'a fabrica d'armas actuoron con
rapideza y contundencia rendiendo a la Guardia Civil y a o guarnimiento militar que
costodiaba a factoría; en Grado, o comité de mayoría comunista se fació con o control
d'a población y izó a bandera roya en o Concello; en Avilés, a rechirada s'encetó con
un día de retardo por a falta d'efectivos y d'armas, y l'acción mas notable que
aconsiguioron os insurrectos antes d'a plegada a la ciudat d'a columna d'o cheneral
López Ochoa estió fundir o buque Agadir en a bocana d'o puerto pa impedir l’arribada
d'unidatz de la flota. En Luarca, a localidat mas poblada d'o ueste d'Asturias, no i
habió insurrección porque a Guardia Civil aturó a o comité revolucionario antes
d'encetar-se o movimiento.
A os tres días d'encetada a insurrección buena parte d'Asturias ya se trobaba en mans
d'os miners, incluidas as fabricas d'armas de Trubia y A Vega que se metioron a
treballar día y nueit. En toda a provincia s'organizó un Exercito Rojo, que a o cabo de
diez días plegó a aconseguir uns 30.000 efectivos, en a suya mayoría obrers y miners.
Amás d'os prencipals liders sindicals y obrers, destacó Francisco Martínez Dutor;
antigo sarchento que heba participau en a Guerra d'África y miembro d'a UGT, se
convirtió en l'asesor militar de l'adreza revolucionaria, encara que a suya participación
no ye tant recordada como que a d'atros liders.
Dende o gubierno consideran que a rechirada asturiana ye una guerra civil en toda
regla, encara desconoixendo que os miners empecipian a considerar en Mieres a
posibilidat d'una marcha sobre Madrit. O gubierno adopta una serie de medidas
enerchicas. Debant d'a petición de Gil-Robles comunicando a Lerroux que no se fía d'o
chefe d'Estau Mayor, cheneral Masquelet, os chenerals Goded y Franco (que teneban
experiencia en haber participau en a represión d'a huelga cheneral de 1917 en
Asturias) son clamaus pa que endrecen a represión d'a rebelión dende o Estau Mayor
en Madrit. Istos recomiendan que se traigan tropas d'a Lechión y de Regulars dende
Marruecos. Tamién estioron ninviaus o crucero Almirante Cervera y l’acorazau Jaime
I.,que participoron en o bombardeyo de qualques nuclios costers.
O gubierno accepta y o radical Diego Hidalgo, ministro d'a Guerra, chustifica
formalment l'emplego d'istas fuerzas profesionals, pus yeran as solas fuerzas militars
espanyolas que heban dentrau en combate en África, y amás, a o gubierno tamién le
preocupaban que as muertes estasen chovens peninsulars, que podrían esparcer mas
tarde os feitos, creyando problemas a o gubierno, por o que a solución adoptada le
pareixe muit acceptable. Tamién se debió a o factor espanto de l'uso d'os regulars,
formaus por soldaus marroquís, que desfrutoron de gran autonomía d'os suyos
mandos pa poder asasinar, violar y entrar a talega a la población sozmetida.El 34--------------Xéliba(2:24)
O desplegue d'as tropas pa safocar a sublevación se fació por quatro frents. O primer
en ubrir-se estió o frent sud con l'abance o mesmo día 5 d'octubre por a tarde de
quantas unidatz militars a traviés d'o puerto de Pajares procedents de León y
comandadas en primeras por o cheneral Bosch y finalment por o cheneral Balmes. Pa
aturar o suyo abance os insurrectos desplegoron una fuerza componida por uns 3.000
miners y metalurchicos organizaus y armaus dende Mieres, que teoricament heban
d'haber-se endrezau a Oviedo, ya que os asturians asperaban que a insurrección i
hese trunfau en a zona minera de León, impedindo asinas o paso d'as tropas
gubernamentals dende la Meseta enta Asturias. Istos milicians, bien organizaus y
conoixedors d'a orografía d'a zona, aconsiguen barzar a las tropas de Bosch en Vega
d'o Rei, quedando immobilizadas dica o 10 d'octubre. Solament a l'atro'l día y dimpués
de duros combates, en os quals os insurrectos utilizoron piezas d’artillería gracias a la
colaboración d'un tenient d'a Guardia Civil feito prisionero, as tropas gubernamentals
aconsiguioron ubrir-se paso ent'a cuenca d'o Caudal y ent'a suya capital, Mieres.
O segundo frent estió o norte ubierto con o desembarco en Gijón a partir d'o 7
d'octubre de lechionarios y regulars de l'Exercito d'África a o mando d'o tenient
coronel Yagüe, que a suya plegada provocó a fuyida d'a ciudat en busca de cubillar
d'un important sector d'a población. Dimpués de vencer a resistencia que troboron —
encara que a vaca cheneral en Gijón encara s’alongaría dica o 16 d'octubre—
encetoron o suyo abance endrezau ta Oviedo o 10 d'octubre. O tercer frent estió o
ueste ubierto por l'abance d'a columna comandada por o cheneral López Ochoa
procedent de Galicia que ocupó a fabrica d'armas de Trubia. Bella cosa mas tarde
s'ubrió un quatreno frent por o este con l'abance a traviés de Santander d'una
columna procedent de Bilbao a o mando d'o tenient coronel Solchaga que estió
aturada por os vehíclos blindaus d'a Felguera en o Berrón, no guaire luen d'Ovieu.
«Rebeldes d'Asturias, rendir-tos. Ye a sola traza de salvar as vuestras vidas: a
rendición sin condicions, l’entrega d’as armas antes de vintiquatro horas. Espanya
entera, con todas as suyas fuerzas, va contra vusatros, disposada a escachar-tos sin
piedat, como que chusto castigo a la vuestra criminal locura. A Cheneralidat de
Cataluña se rindió a las tropas espanyolas en a maitinada d'o domingo. Companys y
os suyos hombres asperan en a garchola o fallo d'a Chusticia. No queda una huelga en
toda Espanya. Sotz solencos y itz a estar as victimas d'a revolución vencida y
fracasada. O danyo que tos han feito os bombardios y las armas d'as tropas no son
brenca mas que un triste aviso d'o que recibiretz implacablement si antes de meter-se
o sol no hetz depuesto a rebeldía y entregau las armas. Dimpués iremos contra
vusatros dica destruir-tos sin tregua ni perdón. Rendr-tos a o gubierno d'Espanya! Viva
a Republica!»
(Fuellas anonimas lanzadas sobre Mieres.).Quan se conoixió en Ovieu l'abance d'as tropas gubernamentals por os quatro frents,
uniu a las noticias que plegaban sobre o fracaso d'o movimiento revolucionario en a
resta d'Espanya, cundió o desanimo y en a nueit de l'11 d'octubre o Comité
Revolucionario Provincial ordenó a retirada d'a capital y se disolvió, quan encara
continaba a batalla en o centro urbano y as tropas de López Ochoa dentraban en a
ciudat. Manimenos, a esbandada no se cheneralizó y en pocas horas se formó un
nuevo Comité Revolucionario Provincial, componiu mayoritariament por chovens
socialistas y comunistas, disposau a continar la luita, quan a las tropas de López
Ochoa ya s'heban uniu os lechionarios y regulars de Yagüe, que prencipioron allí os
primers actos de violencia y pillaje. Los combates continoron entre os dos días
siguients, en os quals as milicias obreras atacoron a l'enemigo dende posicions
elevadas (Naranco, San Esteban de las Cruces) y dende vicos obrers, mientres que as
octavillas lanzadas dende avions les instaban a la rendición en as qualas se deciba
que a resistencia yera inutil porque o movimiento revolucionario heba fracasau ya en
toda Espanya, o que os resistents se negaban a creyer, encara disposaus a "dar o
zaguer empentón a o capitalismo morimundo", como que se deciba en un manifiesto
redautau por comunistas. Finalment, o día 13 d'octubre Ovieu estió totalment ocupada
por as tropas gubernamentals.
Dimpués d'a caita d'Oviedo os obrers se retiroron a las cuencas mineras, an se formó
o tercer y zaguer Comité Revolucionario Provincial baixo a presidencia d'o socialista
Belarmino Tomás, con siede en Sama de Langreo, a capital d'a cuenca d'o Nalón. O día
15 as tropas d'o cheneral Balmes en o frent sud aconseguiban vencer a zaguera
resistencia que les impediba o paso enta Mieres, en a cuenca d'o Caudal. Alavez o
Comité Revolucionario Provincial decidió negociar a rendición y ninvió a o tenient d'a
Guardia Civil Torrens, que heba estau feito prisionero por os insurrectos, pa que
s’entrevistés con o cheneral López Ochoa, comandant en chefe d'os 18.000 hombres
que heba desplegau o gubierno pa escachar a sublevación. En una segunda reunión,
ista vegada entre o cheneral López Ochoa y o propio Belarmino Tomás se fixoron os
termins d'a rendición d'os insurrectos.
A entrevista tenió puesto en Mieres, y en ella o cheneral López Ochoa acceptó os
termins proposaus por Belarmino Tomás: que os marroquís d'os regulars y os
lechionarios no isen en abantguardia d'as tropas que ocupasen as cuencas mineras,
porque alavez ya se conoixeban "os ixarrallons d'os africans sobre insurrectos y
población civil d'os vicos obrers d'Ovieu". A cambeo o dirichent minero le guarenció a
o cheneral López Ochoa l’entrega d’as armas y prisioners, encara que no a d'os
miembros d'o Comité Revolucionario.
L'alcuerdo aconseguiu entre o cheneral López Ochoa y o lider d'os miners Belarmino
Tomás, metió furioso a o tenient coronel Yagüe, y a o cheneral Francisco Franco queendrezaba as operacions dende Madrit, y tamién a o lider de la CEDA, José María Gil
Robles, partidarios os tres que a represión estase brutal.
En clamamiento que fació a os obrers y miners pa meter fin a la luita, Belarmino
Tomás dició:
Camaradas! Soldaus royos! Debant de vusatros, convencius que hemos estau fidels
a la confianza que depositetz en nusatros, venimos a charrar-tos d'a trista situación a
la quala se veye reduciu o nuestro glorioso movimiento d'insurrección. Hemos de
confesar as nuestras conversacions de paz con o cheneral de l'Exercito enemigo. Pero
hemos estau redotaus solament por un tiempo. Tot o que podemos decir ye que en a
resta d'as provincias d'Espanya, os treballadors no han sabiu complir con o suyo
deber y no nos han aduyau. A causa d'ixo, o gubierno ha puesto dominar a
insurrección d'Asturias. Amás, encara que tenemos afusiles, metralladeras, y canyons,
mancamos de munición. Tot quanto podemos fer ye concertar a paz. Pero isto no
significa que abandonemos la luita de clases. A nuestra rendición de hue no será mas
que un alto un alto en o camín, que nos servirá pa correchir as nuestras errors y pa
preparar-nos pa la proxima batalla, que habrá de rematar en a victoria final d'os
esclataus.
Os termins de l'alcuerdo, no sin resistencias minoritarias, estioron acceptaus por as
asembleyas d'os miners, encara que beluns optoron por amagar las armas y no
entregar-las y atros por fuyir a traviés d'as montanyas. O 18 d'octubre, dos semanas
dimpués de prencipiar a insurrección, se rendiba o zaguer redut y as tropas
gubernamentals ocupaban as cuencas mineras. "Uns días dimpués a represión
incontrolada daba paso a la represión oficial. Pero la una y l'atra experiencia ya no
revestiban novedat pa la clase obrera asturiana; represión sangrienta y fuyida a o
mont las heba sufierto en 1906 a resultas d'a huelgona de Mieres y, dimpués, en
agosto de 1917. Octubre de 1934 la convertirá en parte integrant d'as suyas
tradicions...".
A experiencia asturiana d'una revolución unitaria d'a clase obrera organizada "dende
abaixo" solament teneba o leixano precedent d'a Comuna de París de 1871 por o que
a "Revolución d'Asturias" tamién estió conoixida como que a "Comuna Obrera"
d'Asturias u simplament como que a "Comuna Asturiana". Entre as dos semanas que
duró os insurrectos metioron en practica, encara que con diferencias seguntes as
zonas, l'obchectivo de l'Alianza Obrera: "treballar de común alcuerdo dica aconseguir
a revolución social en Espanya".Pa coordinar-los se creyó o Comité Revolucionario Provincial, organismo con siede en
Ovieu integrau por as organizacions de l'Alianza Obrera y presidiu por o socialista
Ramón González Peña. Iste comité será o que prenga a decisión de requisar os nueu
millons de pecetas depositaus en a sucursal ovetense d'o Banco d'Espanya y que
devantará una gran polemica quan l'11 d'octubre debant d'a inminencia d'a dentrada
d'as tropas de socorro en a capital os miembros d'o comité fuyen precipitadament
levando-se os diners , encara que estió utilizau pa aduyar a os evadius y exiliaus, pa
ubrir de nuevo o diario Avance dimpués de l'incendio y destrucción d'as suyas
instalacions, y tamién estió repartiu entre centenars d'obrers sin distinguir a qué
organización perteneixeban. Una zaguera parte será utilizada pa financiar a campanya
d'a coalición d'o Frent Popular en as eslecions de febrero de 1936 y pa aduyar os
gastibles d'o Gubierno republicano en a guerra civil.
A embrionaria estructura politico-administrativa creyada por o Comité Revolucionario
Provincial dio prioridat a la organización militar y a l'aprovisionamiento d'os
combatents pero tamién s'ocupó d'o fornimiento d'a retaguarda seguindo os
prencipios revolucionarios que buscaban construir una sociedat sin clases —seguntes
os modelos correspondients si se tractaba de socialistas, d'anarquistas u de
comunistas, que los aplicoron en aquellas localidatz an teneban mayor influencia—. Os
servicios sanitarios contoron con a colaboración semiforzada de medicos y d'auxiliars
civils y relichiosos, y amás d'os centros sanitarios existents s'instaloron atros
provisionals amán d'os frents. Pa o transporte, amás d'o control que teneban de tot o
ret ferroviario, incautoron meyo centenar d'automobils y cambions, una dotzena d'os
quals estioron blindaus en a fabrica metalurchica d'a Felguera. Por lo que fa a las
municions en una factoría de Mieres se producioron bombas y en Ovieu cartuchos de
fosil. Por unatro costau no s’escuidoron as minas y, como que reconoixió dimpués un
alufrador opuesto a o movimiento, "os equipos de conservación estioron mantenius y
funcionoron perfectament... o que contrimuestra que contoron con una organización
formidable".
En Mieres, foco inicial y prencipal bastión d'a insurrección, se proclamó a Republica
Socialista en o maitín d'o 5 d'octubre dimpués de rendir entre a maitinada totz os
quartels d'a Guardia Civil y ocupar o Concello esfendiu por guardias d'asalto. En a
ciudat, que contaba alavez con uns 40 000 habitants —entre ells quasi ueito mil
miners y mas de mil metalurchicos—, predominaban os socialistas y os comunistas, o
que se veyió reflectau en a composición d'o suyo comité revolucionario y en a forma
cómo s'organizó allí a revolución. Asinas a cada familia d'a localidat se la provedió
d'una libreta de consumo y a cada persona se le asignó una peceta pa l'adquisición de
comestibles, mientres que los "vales" sinyaus por o Comité se reservaban pa las fins
exclusivament militars. Amás s'organizó un servicio de seguranza de "guardias royos"
que aconsiguioron, como que sinyaló dimpués un periodico conservador, que Mieresestase o puesto "an mas tranquilidat reinó entre os quince días y an mas humanament
se tractó a os presos".
En A Felguera, an predominaba a CNT, se proclamó o comunismo libertario como
"sistema de convivencia" dimpués d'a rendición d'a Guardia Civil, a ocupación d'o
Concello, d'os colechios relichiosos y d'a factoría metalurchica. Asinas os fornimientos
estioron organizaus por meyo de vales, "quedando aboliu os diners en quedar lo
mesmo a propiedat privada" (encara que os diners se reservó, en un sinyal de
puritanismo, pa la carne -o fachenda-, o vin y o tabaco —o vicio—). Manimenos,
dimpués d'a primera semana habió d'establir-se un sistema de racionamiento estricto
debant d'a escasez d'os productos alimenticios producto d'os acaparamientos que o
Comité atrebuyó "a os pocos escruplos de qualques chents". Por a suya parte os
obrers metalurchicos d'a fabrica de Duro-Felguera contribuyoron a la insurrección con
o blindache de cambions que serían utilizaus por as milicias rebeldes.
En Xixón, an tamién predominaba a CNT, a revolución libertaria estió muito mas
limitada a causa d'a debilidat d'a insurrección por a falta d'armas y a que a ciudat
estió rapidament ocupada por as tropas colonials desembarcadas en o suyo puerto.
En o vico d'o Plano se procedió a regularizar a vida d'alcuerdo con os postulaus d'a
CNT: socialización d'a riqueza, abolición de l'autoridat y o capitalismo. Estió una breu
experiencia plena d'intrés, ya que os revolucionarios no dominoron a ciudat. [...] Se
siguió un procedimiento pareixiu a o d'a Felguera. Pa la organización d'o consumo se
creyó un Comité d’Abastos, con delegaus por carreras, establius en as botigas de
comestibles, que controlaban o numero de vecins de cada carrera y procedeban a la
distribución d'os alimentos. Iste control por carrera permitiba establir con facilidat a
cantidat de pan y d'atros productos que s'amenesteban. O Comité d’Abastos levaba o
control cheneral d'as existencias disponibles, particularment d'a farina
En Sama de Langreo, a resistencia entre vintiquatro horas de sixanta guardias civils a
o mando d'o capitán Nart, reforzaus por dos companyías de guardias d'asalto
ninviadas dende Ovieu, dio puesto a la batalla mas encarnizada d'a retaguarda, con
mas de setanta muertos. Isto accentuó a necesidat de dar prioridat a o trunfo militar
por o que aquí, manimenos o predominio socialista, no i habió incautacions
d'interpresas. A os comerciants y industrials se les ordenó o mantenimiento de
l'horario d'obridura y zarre habituals y se comunicó a os vecins que "a vida d'o
comercio se ferá como d'ordinario, con libreta, diners, u vales debidament autorizaus".En Trubia, de preponderancia comunista, tamién i habió "normalidat" porque os obrers
que rapidament se facioron con o control d'a localidat y d'a fabrica d'armas,
continoron treballando en a factoría, fueras d'uns pocos artilleros que estioron
ninviaus a os frents y a "guardia roya" que costodió a os prisioneros, dica que plegoron
as tropas gubernamentals d'o cheneral López Ochoa.
En Grau, a capital d'una comarca agricola aluenyada d'Ovieu y d'as cuencas mineras,
tamién trunfó a revolución y a bandera roya estió izada en o balcón d'o Concello. Allí,
de predominio comunista, no s'abolió os diners ni a propiedat privada, pero sí se
facioron qualques incautacions y se repartioron vales entre as familias pobras. En un
informe interno posterior d'o PCE se dició: "Estió en Grau un d'os puestos an mas
acusaus yeran en o movimiento os trazas d'o rechimen sovietico y an millor
funcionaban os servicios d'aprovisionamiento".
O Comité Revolucionario Provincial en o suyo primer bando constituyó una guardia
roya con voluntarios de todas as organizacions obreras pa aconseguir o "cese de tot
acto de pilla, aprevenindo que tot individuo que sía pillau en un acto d'ista naturaleza
será pasau por las armas". D'ista forma se pretendeban aturar as saquiaduras de
comercios que s'heban produciu dimpués de l'abance d'as columnas mineras en os
primers días en Ovieu —y tamién en Mieres y Xixón—, levaus a cabo por elementos
marguinals que "chunto a la masa rebelde, tractaban de pescar en río rechirau".Asinas
pues, os actos de pilla y violencia no yeran achacables a la organización
revolucionaria, encara que allá an os revolucionarios troboron resistencia la luita estió
muit dura.
A "guardia roya" aconsiguió meter fin a as saquiaduras y mantener l'orden pero no en
todas as ocasions podió controlar os escesos d'a "chusticia revolucionaria" levada a
cabo por individuos u chicotz grupos que actuoron a la marguin d'o Comité
Revolucionario Provincial y d'a immensa mayoría d'os comités revolucionarios
comarcals y locals. Asinas, "chunto a o tracto correcto recibiu por a immensa mayoría
d'os engarcholaus, a represión sangrienta tamién fació acto de presencia". Plegó a
haber casos d'obrers que salvoron a vida a miembros d'a burguesía que veyioron as
suyas vidas menazadas.
Pero o que mas esterizó a la opinión publica espanyola estió o asasinato indiscriminau
de 34 miembros d'o clero, anque istas muertes no obedeixioron a un plan previo sino
que estioron mas o resultau d'a "exaltación momentania y quasi accidental", y, por
unatro costau, a immensa mayoría de sacerdotes y relichiosos detenius u obligaus arealizar determinadas quefers recibioron un tracto correcto por parte d'os comités
revolucionarios.
O feito mas brutal y de mayor resonancia se produció en a val d'o Turón, o prencipal
bastión comunista en Asturias an estió proclamada a "Republica Obrera y Labradora"
basada en a dictadura d'o proletariau. Allí os animos yeran exacerbaus por a dura
resistencia ofrida por os ueito guardias civils d'o quartel d'a zona que entre siet horas
d'asedio no se rendioron, dica que os insurrectos voloron o quartel con dinamita. En
iste clima estioron asasinaus siet flaires d'a Doctrina Cristiana —conoixius dimpués
como os martirs de Turón— y l'incheniero-director y dos emplegaus d'a suya confianza
d'a interpresa Hullera propietaria d'as minas, y d'a quala tamién dependeba a escuela
an amostraban os relichiosos.
A o frent d'a represión rapidament destacó por a suya brutalidat un oficial d'a Guardia
Civil, Lisardo Doval Bravo, que dende alavez se convirtió en una d'as bestias negras
d'o movimiento obrero. Atros militars que destacoron estioron o tenient coronel Yagüe
(comandant d'as sanguinarias tropas africanas) y o cheneral López Ochoa, que dende
alavez recibiría o renombre d'o Tablachero d'Asturias. Meses dimpués d'os feitos, iste
zaguer charró con o socialista Juan Simeón Vidarte sobre beluns d'os episodios de lo
escayeixiu en Asturias:
Una nueit, os lechionarios se levoron en una cambioneta a vintisiet treballadors,
quitaus d'a garchola de Sama. Solament afusiloron a tres u quatro porque, como que
resonaban os tiros en a montanya, pensoron que iban a salir guerrillers de totz aquells
paraches y ells correrían periglo. Alavez procedioron mas cruelment, escapezoron u
enforcoron a os presos, y les talloron os pietz, mans, orellas, luengas, dica os organos
chenitals! A os pocos días, un d'os míos oficials, hombre de toda a mía confianza, me
comunicó que uns lechionarios se paseyaban lucindo orellas embrecadas en arambres,
a traza de collar, que serían d'as victimas de Carbayín. Immediatament le mandé que
aturase y afusilase a aquells lechionarios, y ell lo fació asinas. Iste estió o motivo d'a
mía alcontrada con Yagüe. Le ordené, amás, que quitase a os suyos hombres d'a
cuenca minera y los concentrase en Ovieu, baixo a mía vichilancia, y le facié
responsable de qualsiquier crimen que podese ocurrir. Pa chudgar a os rebeldes yeran
os tribunals de chusticia. Tamién me plegoron as feitas d'os Regulars d'o *tabor de
Ceuta: violacions, asasinatos, saquiaduras. Mandé afusilar a seis moros. Tenié
problemas, o Ministro d'a Guerra me pidió explicacions, muit exaltau: "Cómo s'atrive
vusté a mandar afusilar a dengún sin a formación d'un Consello de Guerra?". Yo le
contesté: "Los he sozmetiu a o mesmo Consello de Guerra a o que ells sozmetioron a
las suyas victimas".A resultas d'o asasinato en plena carrera d'o periodista liberal Luis Sirval por un oficial
d'a Lechión, o tenient Dimitri I. Ivanov, y dau que o Gubierno heba imposau a censura
sobre as noticias procedents d'Asturias que charrasen d'os metodos que se yeran
utilizando en a represión, un grupo parlamentario d'investigación, integrau por os
deputaus socialistas Álvarez d'o Vayo y Fernando d'os Ríos y os republicans radicals
Clara Campoamor y Félix Gordón Ordás, fuo a Asturias. Una d'as suyas conclusions
estió a falsedat d'as noticias difundidas por a prensa de dreitas que s'heban produciu
violacions de monchas y que a qualques ninos se les heban rancau os uellos. Amás
replegoron testimonios sobre tortura a os prisioneros. Un d'os miembros d'a comisión
parlamentaria, Félix Gordón Ordás, elaboró un informe sobre as "torturas sadicas" que
utilizaba o comandant Lisardo Doval y lo ninvió a o president d'o gubierno Alejandro
Lerroux, que en prencipio ordenó a os suyos superiors que contenesen as actividatz
d'o comandant, y finalment ordenó o suyo immediato treslado por insubordinación en
haber entregau copia d'as ordens recibidas a destacaus dirichents
monarquicos.Tamién estió a Asturias un grupo de parlamentarios de Gran Bretaña que
plegó a las mesmas conclusions que os suyos colegas espanyols. O suyo informe,
manimenos las protestas d'o gubierno espanyol, desligó una ola internacional de
simpatía ent'os miners asturianos.
Os dos consellos de guerra contra os deputaus socialistas implicaus en a revolución,
Teodomiro Menéndez y Ramón González Peña, celebraus en febrero de 1935, tenioron
un enorme impacto entre a opinión publica, mesmo a libel internacional. O Partiu
Socialista Francés replegó milars de sinyaturas pa pedir l'amnistía de totz os
procesaus y o deputau socialista francés Vincent Auriol visitó a o president d'o
gubierno Alejandro Lerroux en nombre d'a Liga d'os Dreitos de l'Hombre. Os tribunals
militars dictoron sentencia de muerte o día 16 de febrero de 1935 pa Menéndez y
González Peña, seguidas a os pocos días d'a mesma condena pa atros decisiet
miembros d'os "comités revolucionarios". A decisión de president d'o gubierno Lerroux
de recomendar a o president d'a Republica Niceto Alcalá Zamora a commutación d'as
sentencias ubrió una grieu crisi en o gubierno de coalición radical-cedista, ya que
tanto José María Gil Robles de la CEDA como que Melquíades Álvarez d'o Partiu
Republicano Liberal Democrata s'oposoron y anuncioron que deixaban d'emparar a o
gubierno. Alcalá-Zamora, gracias a o refirmo de Lerroux, commutó todas as sentencias
de muerte.
O gubierno suspendió as Guarencias constitucionals, buena parte d'os periodicos de
cucha estioron clausuraus, numerosas corporacions municipals de partius de cucha
estioron disueltas y os churaus mixtos (recientment instauraus entre o Bienio
Reformista) estioron suspendius. D'as 23 penas de muerte inicialment proclamadas
como conseqüencia d'ista revolución, o president Niceto Alcalá Zamora commutó 21:
solament estioron executaus o sarchento Vázquez (entre atras cosetas, heba volau un
cambión con 32 guardias civils) y Jesús Argüelles Fernández «Pichalatu».Asturies va bien--------------Skontra(3:50)
Bueno y dica aquí, o Suenio de hue. Nos veyemos en suenios y nos sentimos o
proximo mierques. Y como que te digo siempre, si cal ir se va, pero si no te peta,
nena, por favor, no vaigas.
Baby Please Don't Go-Joe Williams' Washboard Blues Singers(3:25)
