Dentrada: La calle 12----New Orleans Banjo Band (2:25)
Mosica de fondo: Vocals Celtic wiccan women II (1:04)
Buen día a totz y todas, hue mierques quince d'abril de dosmil vinte, empecipia O Suenio d'o Dragón.
Bella cosa asinas como un programa de Radio, feito en Radio La Granja, en o cientoun punto dos d'a f m; a Radio d'a Canal, dende Zaragoza, Ciudat Prisión. Trenta y cinco anyos dando mal y levando a contraria...como que ha d'estar.
A yo ya me conoixetz, soi Jose Dragón, y tos voi a acompanyar en ista gambada por o mío paúl os mierques d'once a dotze d'o maitín.
Lo primer, correchir una error. L'atro día m'escribió unas letras un conoixiu, Fernando Romanos, en as quáls me deciba bella cosa en o que tiene toda a razón: yera usando soneyo, primera persona d'o present d'indicativo d'o verbo soniar, en cuenta d'utilizar o substantivo, ye decir suenio. Como que habretz visto, he intentau subsanar ixa error tanta en o correu, facebook, etc. Muitas gracias Fernando, y ya sabes que yes convidau en a mía ceneguera siempre que quieras; escuitando o programa u existen quantas opcions...imos a recordar quáls:
A primera, clamando en directo a o programa, para ixo hetz de marcar o nueu siet seis trenta y seis uitanta y ueito novanta y quatro…….9 7 6 3 6 8 8 9 4. Tamién podetz clamar dinantes u dimpués d'o programa, para decir-me que queretz participar u que, una vegada s'acabe ista maldita enzarrona en a quala nos han abocau, queretz venir a participar en directo...brenca me fería mas feliz.
Tamién podetz mandar os vuestros comentarios, criticas, peticions...a o guasap siguient: Hashtag OSD seis uitanta y nueu novanta y ueito zero seis vintisiet….#OSD 6 8 9 9 8 0 6 2 7.
Aspera, que encara i hai mas. Como que ya expliqué en o primer programa, entre este langardiada semanal charraremos de tot un poquet, en especial de tot ixo que nos fa goyo y nos motiva. Dende a immortalidat d'o candrejo de río, as escombreras d'almas existen? Ye cierto que l'alma d'un politico no la quiere ni o Diaple? Existe?; Ye cierto que os ninos y ninas naixen con alas de cera? S'arrociega a uembra d'o muixón por o suelo? Y a de Peter Pan?. I hai unatra vida a la fin d'o túnel...de lavau?
U as dos preguntas que me deixó l'atro día o mío amigo Juancho *Drunken (por cierto, quatreno disco d'os Drunken Cowboys “Invocatio ad deos etilicorum”, a l'aspera que se les pase a resaca a os caballos y l´enzarrona a os mosicos)
A primera pregunta yera: Si te trobases en o desierto d'o Gobi, traza Anacleto achent secreto, sin augua y seicientos vinte euros en a pocha y te trobases con un beduín que t'ofrise una pichera bien tirada de biera fresca por seicientos euros, y a tuya vida dependese d'ixo… los pagarías?.
Segunda pregunta, y si a tuya vida no difuera en ixo?
A tercera ya la foi yo,y os vinte euros que sobran?
Queen of the road-------Los Drunken Cowboys (3:33)
Asinas que tamién puetz fer-me plegar as tuyas inquietutz, falordias, poemas u ixo que en ixe momento te pete compartir. Mete-lo por escrito y ninvia-lo a “osueniododragon@gmail.com”.
Recuerda que, como que a intención ye fer o programa de raso en aragonés, te pido permiso
d´antimano para traducir-lo a ista luenga. De no estar asinas, lo leyeré en l'idioma en que lo mandetz, en a medida de lo posible y d'as mías muitas limitacions.
Si, por o que sía, no puetz escuitar la fe eme, no i hai problema, puetz escuitar o programa en directo vía on line, l'adreza ye http// radiolagranja.caster.fm´. Y si asinas tampoco puetz escuitar-lo, pencharé en Ivoox os audios pa que cadagún pueda escuitar-los quán y án quiera u pueda
Y ixo no ye tot, existe una pachina de Facebook que se diz como o programa, o suenio d´o Dragón, encara en vimbres, pero...amoniquet
Sigues astí? Veyen pasa, no te quedes en a puerta. Mete-te comoda, yes en a tuya casa…
Beta Héctor-------Angie (3:43)
Bueno, pus ista semana m´aganaba charrar-te de La diosa blanca de Robert Graves, en an reconstruye o que considera o luengache machico d'a Europa antiga mediterrania y septentrional, vinculau a ceremonias relichiosas populars en honor a la diosa Luna."Ye una locura de libro y realment no yera a mía intención escribir-lo". En ell relata cómo en Europa y Oriente Próximo existiban culturas matriarcals que adoraban a una Diosa Suprema y que reconoixeban a los heroes masculins solament como que os suyos fillos, amantz u victimas para o sacrificio. Istas culturas, estioron eliminadas por a irrupción d'o patriarcau que arrebató a las mullers a suya autoridat, elevó a los amantz d´a Diosa a una posición de supremacía divina y reconstruyó mitos y rituals para amagar o pasau. Seguntes l'autor, a conquiesta patriarcal plegó a Europa occidental arredol d'o 400 a. C. La Diosa blanca , un tractau inverosimilment escrito sobre literatura, dioses, heroes, y fuesas, rosas y espinas, nombres y pronombres, o Olimpo y os infiernos, a Luna (la diosa blanca), o Sol, a Muller ( meya d´a diosa) os ciels, os mars, una cosmovisión alucinant que suchiere que o malestar d'a civilización occidental tiene o suyo orichen en o paper subordinau que se da a la muller, ixuplidando as culturas matriarcals que adoraban a la Diosa Suprema, unas culturas que estioron eliminadas por a irrupción d'o patriarcau que arrambló a las mullers a suya autoridat.
La diosa blanca ye ixe tipo d'exploración que va dillá de lo desconoixiu y en a quala nos preguntamos no solament cómo belún ha plegau dica astí, sino tamién cómo ha puesto contar-lo. Ye muit dificil que tanta información, amagada u semioculta, se sustancie en marabilla poetica. Tal vegada Graves no podría haber escrito ixe libro sin l'aduya d'a mesma diosa blanca, ixa musa que tamién nombramos como a Luna. Veyer con luz de luna coincidiría con a sensibilidat optica que Paul Celan describiba asinas, abreviando: i hai uellos que divisan un fondo y i hai atros que van a lo profundo d'as cosetas. Grieus escribiba con ixos uellos que no columbran un fondo, pero veyen mas profundo.
O cambeo, violento, d'una sociedat matriarcal basada en o culto a la triple diosa ye una tonica en quasi toda a obra de Graves. Tanto en los Mitos Griegos, como que en O vellocino d'oro , mesmo en Rei Jesús y pro en A Filla d'Homero. A perversión por parte d'os hombres de La diosa, convertindo-la en Mai de monstruos (Gea, mai d´as hidras, as *gorgonas, Tifón…) que ha d'estar combatida por o heroe solar, Heracles, Teseo, Jasón...ye decir, l'abance a sangre y espada d'os dorios, adoradors d'a divinidat masculina. En primeras, os mesmos druidas, en contraposición a las companyeras d'o dios cornudo, que terchiversan y recomponen l'antiga relichión para as suyas propias fins. Con l'adopción d'ista relichión por Roma y a suya difusión por totz conoixiu, ya solament calió asperar a o cristianismo pa que o dios *cornudo ise identificau con Satanás y, por tanto, as suyas companyeras, con broixas. D'a triple diosa a o triple enchendro: Pai, fillo y gamusino colorau
A o prencipio, y manimenos o historial literario y academico de Graves, dengún quereba publicar-lo.
O primer editor que no querió saber brenca de La diosa blanca feneixió pocos días dimpués d'un ataque a o corazón. O libro plegó a un segundo editor, que tamién lo refusó indignau. A o poco tiempo amaneixió enforcau. Levaba meso un sostiene y unas bragas de muller. O libro estió ninviau a la editorial Faber & Faber. Le correspondió a T. S. Eliot dictaminar a publicación u no d'o libro. O suyo informe yera mas que positivo. Caleba publicar y a l'inte La diosa blanca: “Cueste o que cueste!”.
Joana------------Urtz (4:47)
Sláine amaneixió por primera vegada en 1983, escrito por Pat Mills.
As aventuras de fantesía heroica de Sláine son basadas en as historias y mitos celtas. L'arma favorita de Sláine ye un astral a la quala clama «Brainbiter» («la minchasesos»). Quan Sláine combate en o fragor d'a batalla, absorbendo o poder d'a mai tierra Danu, d'a quala ye devoto, tiene o poder de convertir-se en una creyatura aterradora que no distingue amigo ni enemigo, l´esbrunce de furia-
“cada vinyeta ye un quadro” y ye que iste ye un d'ixos cómics de Bisley en os quals o dibuixant no se limita a dibuixar como que en un cómic habitual, si no que en cada vinyeta fa uso d'a suya habilidat mincho portadista, utilizando diversas tecnicas que van dillá d'o simple dibuixo a lapiz y posterior entintau, creyando un cómic desbordant de talent y recreyando d'una traza epica y machistral o mundo celta de Slaine, con a suya orichinal combinación de mitolochía celtica, feitos historicos y fantesía barbara.
o cómic solament se puede qualificar de barbaro, pero s'aluenya d'os topicos instauraus por Conan y nos presienta un personache que encara seguindo a linia arquetipica d'o barbaro d'as historias d'espada y broixería, l'amuestra d'una traza muit diferent.
qué cuenta exactament este álbum de Sláine? Pus as fetas d'o poderoso guerrero que o suyo nombre da titol a la obra, y que a suya prencipal misión ye a d'intentar unir d'una vegada por todas a todas as tribus celtas d'as tierras de Tir Nan Og. Para ixo habrá d'aconseguir as tres armas prohibidas d'a desapareixida Atlantis... tal como relata en as suyas cronicas Ukko, un nano ya viello que en a suya choventut estió companyero d'aventuras d'o propio Sláine.
Ye en iste zaguer aspecto, a elaboración d'as cronicas por parte d'o personache de Ukko, an radica un d'os mayors atractivos d'o guión de Mills: se recurre a una chicota variación d'o viello taboners literario d'o manuscrito trobau, recontando as peripecias de Sláine a o mesmo tiempo que se nos amuestra a redacción d'as cronicas protagonizadas por aquell, esdeviniendo en exercicio metaliterario cargau d'un agradexible sentiu d'a humor y bella capacidat autocritica, en a medida que s'estableix un paralelismo entre o personache de Ukko y os propios autors d'o cómic que o lector sostiene entre as suyas mans.
SLÁINE: O DIOS CORNUDO
“Has prebau con a tuya vulnerabilidat asinas como con a tuya fuerza…
con o tuyo dolor asinas como con a tuya brutalidat…
que tu yes realment o dios cornudo”
O Dios Cornudo ye un relato relichioso y belico. De cambeo. Con un enradicau mensache, talment confuso u masiau denso, pero implicito en tot acto, en toda decisión. S'alienta igualdat, una deseyada y posiblement inchusta. Como que a propia Nest le diz a Ukko: “ye un intento de transmitir l'orichen matriarcal d'o mito”. Un mensache para os que una vegada estiemos y una alvertencia para os que agora somos, siempre con una machestuosidat petria tant elegant como que barbara, violenta. Ye imposible esbarrar o ficacio d'a historia dau que ye mancau de descanso, solament lieus treguas protagonizadas por a propia Nest y l'incansable nano Ukko, que dan l'aliento chusto para ir arduos a la gloria que nos aspera en Tir Nan Og.
Y dica aquí, nuestra charrada de hue sobre a triple diosa; pero ista puerta queda ubierta, porque de seguras que tornaremos a charrar d'ella...
Jùlia--------Doctor Calypso (3:42)
Gloria-------------The Gants (3:40)
Gloria-------------Them (2:36)
Gloria» ye una canta d'o mosico norirlandés Van Morrison publicada en o album d'o grupo Them The Angry Young Them en 1964 y como que cara B d'o sencillo "Baby, Please Don't Go".
A canta se convirtió a o poco tiempo d'a suya publicación en un tema basico d'o garache rock y parte d'o repertorio d'atras bandas de rock. A causa d'a suya estructura en tres acordes, o tema ye facil d'aprender con a guitarra. Ha estau, amás, versionada por centenars de bandas, dica o punto que l'humorista Dave Barry *bromeó dicindo: "Si lanzas una guitarra escaleras abaixo, tocará "Gloria" dica plegar a la fin".1?
A popularidat de "Gloria" estió descrita por o critico musical Bill *Janovitz en *Allmusic:
"A belleza d'a canta orichinal radica en que Van Morrison solament ameneste charrar cantando, con o suyo grunyiu a lo Howlin' Wolf, , pa transmitir a suya pasión adolescente. O significau orichinal d'o nombre en latín no se pierde con Morrison. Them nunca vareya os tres acordes, usando solament cambeos dinamicos pa aumentar a tensión"?
Patti Smith en o suyo album de 1975 Horses. A versión ye basada en a mosica de Morrison, si bien a letra estió rescrita por Smith, retenendo solament os coros y adhibindo alusions ironicas a os primers versos.
Gloria-----------Patti Smith (5:56)
Cristo murió por os pecaus de belún, pero no por os míos
perdida en una espelunga de ladrons
alzo un comodín en a manga
impenetrable corazón de piedra
os míos pecaus, a mía propiedat
me perteneixen a yo, a yo.
a chent me diz “para cuenta!”
pero no m'importa
as parolas son tant solament
normas y reglamentz pa yo, pa yo.
Dentro en una cambra y, ya sabes, soi enlucernadora
me muevo en iste ambient, an tot ye permitiu;
soi aquí en a fiesta, pero soi empecipiando a aborrir-me
dica que m´asomo a la finestra, y veigo bella cosa dulza y choven
amontando en o parquimetro, emparada en o parquimetro
Oh, ye tant polida, ye tant fermosa
y tiengo ista loca sensación y alavez voi a ah ah fer-la mía
oooh, voi a lanzar-le un enchizo
aquí viene
carrera abaixo
aquí viene
cruciando a mía puerta
aquí viene
reptando por a mía escalera
aquí viene
bailando o vals por o corredor
con o suyo precioso vestiu royo
y que polida ye, que fermosa ye
y tiengo ixa loca sensación que la voi a fer mía
y alavez siento clamar a la mía puerta
siento clamar a la mía puerta
y miro ent'o gran reloch d'a torre
y digo “Oh dios mío, ya ye aquí a meyanueit!”
y a mía nina dentra por a puerta
emparando-se en o sofá me mormostia y decido lanzar-me
y estió tant bien, y estió tant estupenda
y voi a contar-le a o mundo que ah ah la facié mía
y dicié, carinyo, di-me o tuyo nombre, y me dició o suyo nombre
m´o mormostió , y me dició o suyo nombre
y o suyo nombre ye, o suyo nombre ye, o suyo nombre ye, o suyo nombre ye G-L-o-R-I-A
G-L-O-R-I-A Gloria G-L-O-R-I-A Gloria
G-L-O-R-I-A Gloria G-L-O-R-I-A Gloria
Yera en o estadio
I heba vinte mil mocetas chilando-me os suyos nombres
Marie y Ruth pero si quiers que te diga a verdat
No las sintié, No las veyié
Deixé que a mía mirada s'elevase ent'o gran reloch d'a torre
y sintié ixas campanadas doblando en o mío corazón
fendo ding dong ding dong ding dong ding dong.
ding dong ding dong ding dong ding dong
contando as horas, y dimpués viniés a o mío quarto
y me mormonias-te y nos lanzamos
y estiés tant bien, estiés tant estupenda
y he de contar-le a o mundo que ye mía, ye mía
ye mía, ye mía, ye mía, ye mía
G-L-O-R-I-A Gloria G-L-O-R-I-A Gloria G-L-O-R-I-A Gloria,
G-L-O-R-I-A Gloria
y as campanas d'a torre bandean “din-dan, din don”
son cantando “Cristo murió por os pecaus de belún pero no os míos.”
Gloria G-L-U-R-I-A Gloria G-L-U-R-I-A Gloria G-L-U-R-I-A,
Gloria G-L-U-R-I-A, G-L-U-R-I-A Gloria G-L-U-R-I-A Gloria
G-L-O-R-I-A Gloria G-L-O-R-I-A Gloria G-L-O-R-I-A Gloria,
G-L-O-R-I-A Gloria G-L-O-R-I-A Gloria G-L-O-R-I-A Gloria,
G-L-O-R-I-A Gloria G-L-O-R-I-A Gloria G-L-O-R-I-A Gloria .
Bueno, y agora #venir con yo que imos a preparar beluna receta saborosa…
A semana pasada tos amostré a forma de fer manteca u margarina caseras; imos a repasar un poquet o que diciemos:
Pillaremos entre trenta y cinco y 50 gramos de fuella y restas de cannabis y los picaremos mu, muit finos. Lo ficamos en una cazuela con augua y le damos fuego, no ye necesario que bulga, encara que d'estar asinas tampoco pasa brenca. Isto para qué lo femos? Pus basicament pa sacar-le a clorofila y as posibles impurezas que pueda levar.
Agora, en unatra perola, mete varios vasos d'augua( no importa quántos, dimpués se desepara una coseta d'unatra). Calentamos l'augua y, sin que plegue a bullir, desfemos os cincientos gramos de manteca u de margarina. Quan ista s'haiga desfeito d'o tot, adhibe o cannabis en polvo y a remover; recuerda que o fuego ha d'estar muit baixo. Agora ye qüestión de paciencia y de no deixar que se creme a manteca. Entre dos y 3 horas pa que agarrapice bien, siguiemos rechirando. Dimpués colaremos cudiadosament la mezcla, y l'alzaremos bien zarrau en a nevera. Deixamos que pase un tiempo y, quan lo quitemos d'a nevera, veyeremos una capa verdosa solidificada por alto de l'augua puerca; deseparamos una d'unatra y ya tenemos a nuestra manteca u margarina espacial...Recuerda que no ye d'efecto immediato, que va con a dichestión; y no, no ye qüestión de cargar-lo mas, solament de deixar que faiga o suyo efecto.
D'a mesma forma, podemos preparar-nos nuestro aceite espacial. Pa ixo. Yo utilizo aceite de oliva extra virchen. Como que tos deciba dinantes, la cocina *cannábica no ye una qüestión de grans cantidatz pa intentar efectos mayors...no o cuerpo humano tiene una tolerancia a o cannabis, se calcula que arredol de 10 miligramos...a partir d'astí, no pasa brenca...ye decir, a partir d'ixe limite o cuerpo humano ya no reacciona; con o qual, usando mas cantidat solament somos malmetiendo-lo . Por ixo utilizo aceite de oliva virchen extra, pa recordar-me que con un poquet ye suficient...podemos combinar aceites y mantecas cannábicos con atros que no lo sían, etc.
Bueno, pus mas u menos as mesmas cantidatz que con a manteca, entre treintaycinco y 50 gramos de restas de cannabis muit bien picaus. Podemos sacar-le a clorofila previament, ixo sí, dimpués caldrá deixar que s'ixugue bien, pus o que imos a fer contino ye meter aceite y cannabis en un tarro y deixar-los astí. Yo normalment preparo potes con uns 4 litros d´aceite y 200-250 gramos de restas de cannabis.
Caso que no quieras, u no puedas, asperar, tamién puetz vulcar l'interior d'o pote en una cazuela y, a fuego mu muit lento, ir-lo cocinando entre dos u tres horas dica que o aceite se i haiga untau d'o tot.
Pa qué lo puetz usar? Obviament , pa cocinar; tamién pa aduyar a conciliar o suenio...uello!! no ye un somnifero, pero as propiedatz relaxants d'o cannabis lo convierten en un portentoso relaxador muscular y, por tanto, un potent inductor d'o suenio.
Y, cómo no, para friegas, masaches etc.; o que s'ha dito, un portentoso relaxant muscular que nos aliviará de chicotas molestias, contracturas y dolors varios. Encara i hai mas, si se da a coincidencia que tiens fuella y ganas de relaxar-te y/u conciliar o suenio, no fa falta que asperes, prepara-te una infusión. No ye necesaria una gran cantidat, simplament chita un zarpau de fuella ixuta en una perola con leit, mete-la a o fuego minimo y tienla entre 20/30 menutos dando-le tornadas pa que no se nos apegue y, lo mas important, que no plegue a bullir; puesto que en plegar a la ebullición, o cannabis pierde buena parte d'as suyas propiedatz...Que aprofite.
Legalize it----Peter Tosh (4:39)
Y por hue, nos despedimos dica o proximo programa, siempre recordando que en o suenio d'o soniador, o soniau dispertó...Asinas que nos imos, pero ya sabes que si no quiers ir...por favor, nena , no vaigas…
Baby please don´t go--------Bobby Blue Band& Little JR Walker (2:31)
