Arrancamos setembro cunha interesante colleita de plans musicais que como cada venres selecciona Carlos Crespo.
Falamos con Pol 3.14 que actúa no Terraceo do Mar de Vigo. Maika Makovski encabeza o apartado musical do Festival de Cans no que tamén estarán Sés, Oh Ayatollah, Acordeireta e Chisme. Tamén repasamos a programación do Festiletras, que acolle a Fetén Fetén, Guadi Galego e Xosé Lois Romero e Aliboria; do festival Confluencias, no que concurrirán Nastasia Zürcher, Abe Rábade Trío, Uxía e Susana Seivane; e do Wild Fest, polo que pasarán Thee Blind Crows, Familia Caamagno, Los Zigarros e Stoned at Pompeii.
Lembramos que Miguel Lamas estrea o seu novo proxecto, Ardora. Que na sala Karma actúan Kings of the Beach; no faro de Corrubedo, Anxo Lorenzo e Laura Lamontage & Picoamperio; en Cambados, Zeltia e Irevire e Sabela; e en Xunqueira de Espadanedo, O Sonoro Maxín.
Tamén poñemos a mirada no festival Arteficial de Ribadavia e no Orballo Cultural en Carballo onde soarán Verto, Tanxugueiras e Sheila Patricia. Amparanoia actúa en Castrelo de Miño e en Muros, Viva Belgrado e Aphoniic.
O domingo, polo espazo Carabunhas, en Vilar de Santos, pasarán Paula Grande con Vic Moliner e Xisco Feijoó.
E Ortiga preséntanos o seu segundo disco, publicado o xoves.
