Shows
牛哥講經丨廣東話哲學、書籍分享S2EP35 睡眠的秘密1：點解會瞓著？原來鍾意夜瞓係遺傳使然｜人嘅生物時鐘唔係二十四小時｜褪黑激素唔會導致入睡？丨《為什麼要睡覺》你自覺自己上個星期夠唔夠瞓？
你仲記唔記得上一次唔需要鬧鐘就瞓醒，唔使飲咖啡續命嘅日子？
若然你喺苦思之後，得出否定嘅答案。咁你並不獨單，據統計，所有已發展地區，有三分之二嘅成年人都達唔到每晚瞓八個鐘嘅建議睡眠量。
當然，大家唔係唔想瞓，亦都知道唔夠瞓會影響住身體，例如令人有幾高機率有冠狀動脈堵塞和脆化，從而得到心血管疾病、中風；又會加重精神障礙，包括抑鬱、焦慮、自殺傾向。英國作家夏綠蒂．勃朗特（Charlotte Brontë）講過：「煩躁之心，寢枕難安。」其實佢漏咗下一句，「寢枕難安，煩躁之心。」
只係忙碌嘅人生，已經使得「至死方休」呢個成語變成令人哭笑不得嘅幽默。唔夠瞓喺自然界係非常罕有；人類，係唯一一種喺無益嘅情況下故意剝奪自己睡眠嘅生物。
唔夠瞓嘅其中一個徵兆，就係喺疲倦嘅時候想食更多嘢，咁係因為人唔夠瞓嘅時候，會令感到飢餓嘅激素濃度提升，而另一種話畀身體知自己已經食飽嘅激素亦會受到抑制。所以人即使食飽，依然仲想食嘢。換言之，唔夠瞓，就會體重增加（唔好以為節食會解決到體重增加，當人節食，又瞓得唔夠，消耗嘅大部分都係肌肉，而非脂肪）。
若然你有睡眠不足嘅徵兆，咁你就要睇下比爾蓋茲喺2019年嘅年度選書──《為什麼要睡覺》，去認識睡眠更多。作者沃克（Matthew Walker）認為社會對於睡眠唔夠關心嘅其中一個原因係：科學一直解釋唔到點解人需要睡眠。喺科學史上，睡眠係一大未解嘅生物謎題。科學一路發展，已經出現高強嘅解謎手段，例如遺傳學、分子生物學、強大嘅數位科技，但係都係唔能夠撬開睡眠嘅牢固地窖。有一個有趣嘅故事去說明過去科學對於睡眠嘅蒙昧無知：
想像有一個bb出生。
醫生同媽媽講：「恭喜你，係一個好健康嘅男仔，我哋已經做完所有初步檢查，一切都無咩問題。」
正當媽媽滿意咁樣轉身離開，醫生繼續講到：
「只係，你嘅小朋友由依家開始，會有一個情況持續一生，佢會反覆而規律咁陷入一種睇落好似係昏迷嘅狀態，有時直頭好似死咗咁。而當佢瞓喺度唔郁嘅時候，佢個腦會經常上演驚人又奇怪嘅幻覺。呢種狀態唔會霸佔佢好多時間，計落都只係佢人生嘅三分一時間。我完全唔知點解會咁，亦唔知呢種情況有咩作用。anyway, good luck!」
你諗下，生命中嘅其他三種驅動力──食嘢、飲水、生殖，人都了解有咩作用。但係偏偏瞓覺呢個第四項生物主動驅動力，卻喺幾千年間都逃過科學嘅檢驗。大家都只係接受瞓覺作為事實，而無法解釋瞓覺。
如果我哋從演化論嘅觀點嚟睇，情況更為奇怪，因為瞓覺點睇都似係所有生物現象中最蠢嘅一件事。瞓覺嘅時候無辦法獵食、社交、繁殖、保護自己或者下一代，甚至成為獵食者嘅獵物。照道理，生物係有好大演化壓力避免瞓覺，阻止類似瞓覺嘅現象出現，但瞓覺卻係普遍到不得了，科學家暫時所檢驗過嘅物種通通都係會瞓覺。
正如世界頂尖嘅睡眠研究者瑞赫夏芬（Allan Rechtschaffen）博士所講：
「如果睡眠沒有提供任何關鍵性的重要功能，那就是演化犯下的最大錯誤。」
因此，作者認為瞓覺一定有重要作用，重要到千萬年嘅演化都篩唔走。
「睡眠在地球上是和生命本身一起演化的，或至少該是生命誕生後不久就出現。更進一步來說，睡眠在整個演化史上持續存在，表示它必然有強大的好處，勝過那些看似明顯的危險和不利之處。」
我唔會同大家講唔夠瞓有咩壞處，你有興趣自己去睇／去google 唔瞓覺嘅壞處，我只會同你講
有咩影響睡眠
點樣睡眠
今集，我哋會從生物學嘅角度，睇睇影響睡眠嘅因素。
內容分成咗兩大部分：
「澄清」：當我哋問「點解要瞓覺」往往預設咗瞓覺只有一個單一功能，呢點係非常唔正確，因為瞓覺有一系列作用。
「兩個因子」：我哋會講下影響睡眠嘅兩大因子：生物時鐘以及睡眠壓力。
喺「生物時鐘」方面，我哋會講講科學家親身做過實驗，證實人嘅生物時鐘唔係二十四小時；原來「夜貓」係天生；褪黑激素原來幫唔到入睡！？
喺「睡眠壓力」方面，我哋會講講腺苷會點樣影響人入睡；腺苷同生物時鐘呢兩套系統嘅作用會使得通頂嘅你，喺朝早非常精神……
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-12-1848 min
牛哥講經丨廣東話哲學、書籍分享S2EP34 原來內傾人好易睇錯自己嘅MBTI？一齊用將軍僕人比喻搵出「主導精神活動」，發掘你嘅人格優勢之處丨《天資差異》喺上集，我以一隻船去比喻MBTI嘅四個位置，而上集嘅內容只係夠時間講到第二、第三位置，即係船嘅兩組推進器。
今集就要講埋第一、第四位置。就算你同你嘅朋友只係有一個英文字嘅唔同，都可能會有住唔同嘅「主導精神活動」，思維上亦因而有住非常唔同嘅側重點。今集，我哋會一齊去搵出你嘅「主導精神活動」，同埋講講搵出「主導精神活動」嘅意思。內容包括：
「外傾，內傾（1）」：我哋會講講外傾同內傾會點樣影響一個人嘅感知（第二位置）、判斷（第三位置）
「感知態度，判斷態度(4)」：解釋一下點解以「船長態度」理解第四位置。順便講埋外傾人係好易搵到自己嘅「主導精神活動」
「主導精神活動過程」：睇下內傾人要點樣間接咁搵出自己嘅「主導精神活動」。同埋以「將軍」同「僕人」嚟理解「主導精神活動」嘅意思
正文內容嘅最後，我仲列埋個表，大家可以一眼就搵到自己嘅「主導精神活動」。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-12-0934 min
牛哥講經丨廣東話哲學、書籍分享S2EP33 MBTI歷史背景與理論入門：藉由MBTI作者所寫嘅書，講講ST、SF、NF、NT有咩特性，了解你嘅感知同判斷方式，以及MBTI嘅意義何在丨《天資差異》相信大家都會留意到MBTI非常盛行。唔理係同對方初次見面、定係面對識咗一排嘅老友，大家總會互相詢問彼此嘅MBTI。一個喜歡mbti嘅人，甚至會喺對方回答之前，估算對方嘅答案。當對方講出四個平凡嘅英文字母，人就可以掌握到對方嘅心靈特徵，點解會咁神奇呢？
要知道，MBTI嘅作者伊莎貝爾・邁爾斯(Isabel Myers) 並無一個同心理學相關嘅專業資格，而佢所發明嘅人格測試並無被心理學界重視。只係大眾對於MBTI嘅熱愛，令學術界大跌眼鏡。
今次我要同大家分享嘅書，就係邁爾斯為解釋自己嘅理論親手所寫嘅《天資差異》。當中指出美國500強嘅企業當中，有8成以上嘅高層管理者都使用過MBTI，去了解員工嘅處事風格、特點、職業適應性、潛質等等……MBTI嘅實用性已經不容忽視。
到邁爾斯82歲嘅時候，仍然修改緊MBTI、為呢一本《天資差異》校讀同改錯。今集，我哋就要一齊睇睇MBTI作者點樣總結自己嘅理論。
內容包括：
「歷史背景」：我會同大家講講邁爾斯面對嘅歷史背景，簡述MBTI係點樣回應「一種正常人觀點」以及榮格心理學
「理論基礎：人格差異的類型思考」：我哋會睇下mbti所代表住嘅「人格差異」理論到底有咩意義
「四種人格類型」：用簡單比喻了解MBTI四個位置嘅意思，明白MBTI嘅藍圖
「感知，判斷」：我哋會深入少少睇下MBTI嘅第二、第三位置嘅意思，以及第二、第三位置組合之後所代表嘅特徵，即係ST、SF、NF、NT
我寫咗個幾有意思嘅結語，記得聽到最後。其實MBTI唔需要記，因為佢同康德……
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-12-0347 min
牛哥講經丨廣東話哲學、書籍分享S2EP32 父母都係仁慈嘅獨裁者，蛤蟆先生為咗「適應」父母，成為一個唔識得憤怒嘅成年蛤蟆丨《蛤蟆先生去看心理師》上一次嘅諮商，蒼鷺給予蛤蟆一份作業──回憶童年。因為喺心理諮商嘅角度，童年時期會改造「自然型兒童」，「自然型兒童」會因應環境變化而成為「適應型兒童」。如果一個人喺思維上無咩大轉變，咁佢嘅「適應型兒童」會停留喺童年時期應對家人嘅時刻，換言之，佢會以應對童年嘅方法，去應對社會，因而作出「幼稚」嘅行為。
今集，我哋會同蛤蟆先生一齊回憶佢嘅童年。從童年嘅碎片，蛤蟆先生覺察到自己係一個唔識得憤怒嘅「適應型兒童」。今集內容分成兩個部分：
「第四日」：蛤蟆先生開始回憶自己憤怒處處嘅屋企，念及嚴厲嘅父親同永遠當蛤蟆先生係小朋友嘅母親，蛤蟆先生感到憤怒，但又唔懂得釋放。難以釋放憤怒原來係源自小朋友嘅「順從行為」。
「第五日」：蛤蟆先生開始懂得去疑問「點解發嬲嘅永遠唔係我，而係其他人？」之後，蒼鷺同蛤蟆先生一齊分析憤怒，蒼鷺仲講出「仁慈嘅獨裁者」呢個概念。
今集，應該係牛哥講經最後一集嘅蛤蟆先生，希望你會鍾意，如果有內容補充，咁就會員podcast再講。喺結語部分，我邀請咗會員寫一封信畀蛤蟆先生，大家記得聽到最後。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-11-2647 min
牛哥講經丨廣東話哲學、書籍分享【諗諗下唔對路】孔子係「野合之子」，仲將母親嘅棺木泊喺大馬路？佢老豆原來係...明明孔子有個老虎咁好打嘅老豆，點解《史記》話「孔子貧且賤」、係「野合之子」，仲話孔子要將母親嘅棺木泊喺大馬路？
孔子嘅說話，你就聽得多（咩學而時習之／三人行必有我師）。但你有無諗過孔子嘅人生係點呢？最簡單咁問，孔子嘅童年係點？點解《史記》所講嘅野合之子會成為萬世師表？今次，就用十五分鐘嘅時間同你一齊用《史記》回顧孔子嘅童年。
你會發現，孔子嘅故事唔係紙上談兵、議論天地嘅貴族之子，孔子係聖人，但首先佢係一個有血有肉、從現實掙扎嘅平凡青年。佢成長於單親家庭，自出生就唔被視為貴族，然後，營營役役、捉住機會，依靠亡母嘅棺木去換取貴族身分。對於當時人嚟講，孔子嘅行為係壞過凱婷。
一齊睇下，被人稱為「累累若喪家之狗」嘅孔子到底點樣去追夢。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】
2023-11-1917 min
牛哥講經丨廣東話哲學、書籍分享S2EP31 從「我好好」到「我唔好」，發現成年人嘅心靈有抹唔走嘅童年痕跡丨《蛤蟆先生去看心理師》幾經波折，蒼鷺終於說服到蛤蟆先生自願參與心理諮商。但係到第二次諮商之前，蛤蟆先生嘅情緒都無咩太大改善。
喺蒼鷺問：「How are you?」嘅時候，呢個傷痕纍纍嘅心靈自動回答出：「I am fine, Thank you」。雖然教科書式嘅回答只係自欺欺人，但係比起為別人帶嚟精神負擔，一個安全嘅回答都係一個唔錯嘅選擇。
蒼鷺並無止步喺呢個教科書式嘅回答，而係進一步詢問蛤蟆先生嘅真實情感，肩負住同蛤蟆先生一同回憶過去情感嘅任務。途中，蒼鷺發現到蛤蟆先生喺唔同事件嘅共同情感……
今集內容包括：
「第二日」：我哋會睇下「I am not fine」嘅蛤蟆先生經歷過咩事，然後蒼鷺講出咗「兒童自我狀態」呢個重要概念。
「第三日」：了解 「兒童自我狀態」嘅意思，搵出每個人都有嘅「基本情緒」，再理解「基本情緒」同往後行為嘅關係。當中有啲論述太似儒家，所以我會加兩句儒家對於人性嘅理解落去。
—
按：香港其實有唔少page 有講心理學，之前喺story 問聽眾有無推介心理學，大家主要提出四個：
樹洞香港 @treeholehk.psychology 以podcast 形式分享心理學相關議題，有線上線下活動參加。喺灣仔有辦公室。
點解學校無教情緒課 @whyemotionisnotasubject 出咗三本書講情緒同人際關係，ig 嘅圖都好貼近現代人嘅心靈。
說書人 @storytalerhk 由臨床心理學家同有精神病經歷所共同組成，旨在提高精神健康意識，減少對精神疾病嘅污名同誤解。親切又有資歷，近排仲係八週年。
心導遊 @jctourheart 馬會資助，請好多專業人士做免費講座，仲有個apps 可以同阿本傾偈。
佢哋嘅page 都有用簡易嘅圖片同字句同大家分享心理學相關知識，所以大家有需要都可以去睇睇。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-10-1143 min
牛哥講經丨廣東話哲學、書籍分享S2EP30 點解朋友苦口婆心嘅正向思維，唔及心理諮商師嘅沉默聆聽？丨《蛤蟆先生去看心理師》如果大家有行開書店，應該都會見到呢本《蛤蟆先生去看心理師》嘅身影，佢都頗為暢銷。《蛤蟆先生去看心理師》嘅暢銷，一方面，顯示住人對精神健康關注多咗，固然係好事；另一方面，說明佢所代表嘅議題受到關注，當一個議題會受到關注，往往係佢已經成為咗一個問題。
換言之，越嚟越多人發現自己或者身邊人嘅精神健康有困擾，先會關注精神健康。
藉由大眾對於精神健康同心理諮商師嘅好奇，配合輕鬆嘅動物故事，《蛤蟆先生去看心理師》打動咗唔少讀者。呢本書對兩類人特別適用。
1）如果你身邊有一個唔開心嘅蛤蟆先生，你應該會從呢本書中見到錯誤示範同正確示範，咁你就可以避免地雷同學識嘗試轉變態度對待蛤蟆朋友；
2）如果你本人就處於蛤蟆先生嘅憂鬱狀態，你應該會有時同蛤蟆先生感同身受，因為蛤蟆先生喺故事當中會受到唔少委屈同不被理解……心理諮商師到底會點樣從中協助呢？係唔係真係咁神奇地可以從對話就可以理解到蛤蟆先生呢？
今集內容包括兩部分：
「第零日」。我哋會睇下蛤蟆先生嘅情況同蛤蟆先生嘅朋友點樣面對蛤蟆先生
「第一日」。喺第一日嘅心理諮商，蛤蟆先生懷住聽大道理嘅預感去接受心理諮商，點知，心理諮商師蒼鷺就引導蛤蟆先生進入一個陌生狀態，佢發現，心理諮商師原來唔係說教者，而係……
依家，一齊進入蛤蟆先生嘅故事啦！放心，呢集會幾輕鬆。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-09-2432 min
牛哥講經丨廣東話哲學、書籍分享S2EP29 奧朗城與里厄醫生：人心堆積嘅平靜，其名為「荒謬」丨卡繆《鼠疫》大約一年前，我問大家有咩書想我講，結果係《鼠疫》。拖咗咁耐，依家終於找數。有兩個藉口，一來係因為我寫極都唔滿意，隔一排就修改、隔一排又修改……
二來，《鼠疫》係卡繆非常出名嘅著作，但要解釋佢嘅存在主義意味，總係要回顧存在主義嘅背景，適逢我喺西哲幼稚園以《非理性的人》解釋緊存在主義同古希臘、希伯來文化嘅關係，我認為係一個好機會介紹《鼠疫》，兩者應該可以相輔相成。
不知不覺，寫存在主義簡介已經寫過四萬字，呢四萬字講到底就係講述西方哲學點樣反思信仰與理性、存在與本質。個人而言，樂在其中。若然你對存在主義嘅背景有興趣，我誠邀你加入到會員，一齊閱讀西方哲學嘅源頭，原來存在主義嘅源頭，可以追溯到去柏拉圖……
今集內容會講講《鼠疫》嘅第一章。喺正文內容，我會簡述奧朗城以及里厄醫生面對鼠疫浮現嘅反應。同時省略某啲角色嘅描述，因為我主要嘅討論對象，就係里厄醫生本人。
我只能夠為你呈現呢本書嘅一部分有趣之處。如果有機會，我都想同你一齊睇埋後面，因為卡繆對信仰嘅反思係好到肉。
今集會分成四個部分：
「奧朗城」、「老鼠之死」、「恐懼與平靜」、「準備」
一齊聆聽一座平平無奇嘅海岸城市──奧朗城所發生嘅故事，睇下卡繆點樣去刻畫一個城市同一個醫生嘅態度。兩者嘅比對，引人入勝。
然後，我會喺結語同大家一齊思考第一章嘅內容。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-09-1045 min
牛哥講經丨廣東話哲學、書籍分享牛哥三個字｜「入門易」：絕對唔正宗嘅易經占卜方法，順便學識八卦結構歡迎你返到牛哥三個字，牛哥三個字，細訴人間事。今集，我哋會講講「入門易」。
第一季ep.51 我哋講過少少《易經》當中嘅易、象、辭嘅系統，如果未聽記得去聽咗先。如果我哋要使用《易經》去占卜，咁應該點做呢？
今次就用少少時間同大家講講《易經》占卜係點運作。易經占卜好似炒飯咁，占卜過程就係準備材料，解卦就係煮嘅方式。
今集，同大家講點準備材料，即係會同大家講講占卦嘅過程，同最最最基礎嘅解卦方法。
內容包括：
銅錢卦嘅占法，從而得出本卦
搵出動爻同之卦
簡述唔同人嘅解卦方法
我會講埋啲術語嘅邏輯，你明到就好易記。占卦方法好簡單，只不過入面有好多term，所以有幾分神秘咁。實際上，大家喺中學做過嘅數學題都可能會複雜過占卦方法本身。
講明先，我所講嘅內容，無話邊家邊派，所以係絕對唔正宗，我只係要講易占嘅精神。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-09-0339 min
牛哥講經丨廣東話哲學、書籍分享S2EP28 蘇軾人生簡述：躊躇滿志嘅青年，最後用十二個字總結人生丨《蘇軾文選》、〈念奴嬌〉仲記得中學嘅時候學蘇軾，當時教〈赤壁賦〉定唔知〈水調歌頭〉，老師淨係話蘇軾退隱，做官好hea，然後又將蘇軾同莊子扣連，以道家嘅出世去對比儒家嘅入世。所以總有個印象就係蘇軾係道家，道家就出世。
將世界一分為二，易唔易記？當然易記，我依家都記得，儒入道出，琅琅上口。我回憶當時對儒道嘅諗法，就係儒家攞苦嚟辛，道家不負責任。如果唔去檢視呢個「常識」，呢個一分為二嘅印象可能就會伴隨我嘅一生。
所以，我通常唔怪罪人睇唔起中國文化，當學生接受一個咁弱嘅詮釋，試問又點會發自內心咁尊敬呢個文化呢？一套講中庸、講和諧嘅文化，被人講成走向極端，陷入二分，唔係好可悲咩？
中國文化理應係多元而立體，而對立同簡化將會令文化變得片面；如果老師一直以儒入道出教學，咁十年過後，佢就會令幾百人接受一套想像出嚟、無力嘅中國文化。
依家先發現，老師無一句講啱，道家已經係古舊講法、蘇軾有大半人生都係喺官場上為國為民，話蘇軾避世，實在太過輕描淡寫。藉由回顧蘇軾嘅人生，你會發現從蘇軾嘅背影，可以見到儒釋道思想嘅罔兩。
內容包括：
書香世家三門傑
少年得志得第二
多元思想儒釋道
直言極諫陷黨爭
黃州時期偷作閒
年閱三官若飛雁
輾轉南方至海角
面對北歸莫敢還
北宋政治都幾混亂，所以你會見到蘇軾周圍走；另外，有好多年號，因為唔少皇帝早死，蘇軾就做過幾朝臣子。最後，我會用「蘇軾」呢個名總結蘇軾嘅一生。
按：
考評局：「《念奴嬌‧赤壁懷古》是一首懷古之詞，蘇軾借懷念三國歷史人物，抒發個人懷才不遇之情。……，帶出千古以來的風流人物，也如被江浪淘盡，一個個消失於歷史舞台，時間無情，物是人非，感歎悲壯淋漓……借一樽酒沉醉江月，遣懷消愁。」
某：消失於歷史舞台，係被遺忘，但係蘇軾正正係記住公瑾小喬。總結再講。
出錯修正：
蘇軾應出生於宋仁宗景𧙗三年12月19日
我錯讀為宋熹宗，十分抱歉
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-08-281h 03
牛哥講經丨廣東話哲學、書籍分享S2EP27 胡適話莊子早喺二千年前就提出生物演化論？錯，其實係氣化宇宙論！丨《中國哲學常識》近日買咗一本胡適嘅書，叫做《中國哲學常識》，係開明書店所編。內容上同《中國哲學史大綱》有唔少重覆之處。點解我仲要買呢？
眾所周知，《中國哲學史大綱》係一部未完成嘅書，寫到戰國就無寫落去。《中國哲學常識》呢本書可謂圓咗唔少胡適愛好者嘅夢，將胡適對於漢、宋代哲學嘅講義都加入其中。僅僅為咗多出嘅內容，我又買一本新書。
不過，我認為《中國哲學常識》呢個書名實在唔貼切，雖然我知道書名係取自開明書店嘅《中國xx常識》系列，除咗哲學，仲有建築、歷史、文學。而出呢套書嘅目的，就係想人擁有文化常識，開明書店喺序言開首就寫到張岱所講嘅故事：
話說有個文士喺船上高談闊論，當有個僧人問文士：「堯舜係一個人定係兩個人。」文士話：「當然係一個人。」
相信聽開牛哥講經嘅你，都會知道堯舜係兩個人，而當文士答錯咁基本嘅問題，佢嘅一切偉論都會被人輕視。所謂基本問題，就係常識。序言之後仲講到：
「這類常識猶如眼鏡，沒有它，一片模糊；透過它，世界才變得清晰。平時我們不會去關注自己所戴的眼鏡，而只聚焦於眼鏡中所呈現的事實，殊不知，事實之所以成為事實，離不開作為眼鏡的常識所構成的判斷。就如瓦托夫斯基所說，它是「一種文化的共同財產，是有關每個人在日常生活的一般基本活動方面應當懂得的事情的一套可靠的指望」。」
實在講得唔錯，常識就係人認知嘅眼鏡，擁有常識就係要有一副好眼鏡。但問題係，胡適嘅哲學史唔應該被冠上「哲學常識」之名。認識我嘅大家都會知道我個人係尊敬胡適，因為胡適係中國哲學史嘅創始人，佢有好多洞見，所以我喺第一季講中國哲學就係用胡適。無論係以倫理理解儒家、以宗教家理解墨子……都係胡適發前人所未發嘅成就。
但同時，胡適擁有時代嘅局限，從依家嘅視角睇嚟，胡適寫嘅哲學史唔應該被認定為好似金科玉律般嘅「常識」，反而係等待被超越嘅對象。
舉幾個例子，一，胡適以老子為諸子開首，呢點已經被學界所唔承認，因為長沙馬王堆嘅發掘，顯示《老子》應該擁有眾多版本，比較完整嘅版本最早係成書於戰國（但都未搵到）。對於文本嘅年代理解唔同，已經足以影響人對哲學思想嘅傳承理解。加上馬王堆嘅《老子》係以德經開頭，同今本《老子》以道經開頭唔同，所以《老子》出現咗胡適所唔可能想像嘅變數；
二，胡適認定莊子係出世嘅哲學，如果以此為常識，就會加深現代人對於莊子「灑脫」嘅形象。陳鼓應作為現代嘅莊子研究者已經講得好清楚，莊子哲學絕非無所事事、遠離世間，佢嘅逍遙係建築喺充滿人間世嘅悲情之上：
「我深感莊子是古代知識分子中第一個對於「自由」提出深刻思考的哲學家。當我理解〈逍遙遊〉之自由主題的同時，也就曾留意到篇末一句「安所困苦哉」透露出的莊子那個時代生存環境的訊息。……所以，我一直能體會莊子的「逍遙」並非在空想的高塔上乘涼，他的「逍遙」可說是寄沉痛於悠閒，其生命底層的憤激之情其實是波濤洶湧的。」《莊子人性論》
以上種種，我唔係想顯示胡適已經過時，反而係佢錯得有價值，佢值得被人批評、超越，所以佢係經典。如果有讀者睇完呢本書嘅序言，然後覺得胡適講嘅就係定論，咁反而會同序言提到嘅文士一樣，身在錯中不知錯。
我哋要去思考嘅係：
建築學、文學、歷史可能可以有常識，因為呢啲知識係可以被確認。但正如我哋喺《更改主題》提到，哲學嘅根本精神係反常，佢就係要對常識進行反省，以常識稱呼哲學作品係咪有其需要呢？
哲學頂多可以話有個主流意見，如果用主流意見理解「常識」二字，咁漢儒以經學為常識、宋明儒以理學為常識、清儒以訓詁為常識，依家，我哋身處喺2023年奉百年以前嘅哲學作品為常識，又係唔係合適嘅舉動呢？
如果理解「常識」做普及知識嘅書，即係本來唔識都可以睇得明。但並唔會咁，因為胡適基本上係唔解引文，就好似佢預設咗讀者本身有足夠「常識」去理解佢嘅中國哲學。如果當胡適嘅書算係「常識」書，咁現代有唔少讀者都會係唔夠常識嘅讀者。
發咗一陣牢騷，我並唔係話呢本書唔值得睇，只係個名改得唔好。依家，請同我一齊睇下胡適對於莊子嘅創意，然後從中得出一啲意義。我會加強胡適嘅講法，然後從佢嘅錯誤，為你簡述莊子嘅氣化宇宙觀。
按：難得講莊子，呢集有難度。我要將說話壓縮嚟講，會令內容難咗。我會喺線上讀書組慢慢講莊子，結語再講。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-08-2052 min
牛哥講經丨廣東話哲學、書籍分享【諗諗下唔對路】虔信同科學其實唔係水火不容？耶穌會教士用幾十年時間還巴比倫祭司一個清白：希臘天文學係從巴比倫偷師，發明星座係理性嘅表現丨《人類大宇宙》如果你要去搵出托勒密同伽利略嘅共同點，你會指出啲咩呢？
佢哋係天文學家，umum……喺伽利略嗰集，我哋講過望遠鏡證明咗日心說，但托勒密講本輪，根本兩套系統。除咗都係人類，睇落已經無咩可以共通。
其實，佢哋都相信占星。
托勒密寫咗《占星四書》「關係到理性與心智的部分要透過水星的狀況來理解……感官與非理性部分的特質則是從……月亮而得知。」｛聽落有幾分似人哋話因為水逆搞到失戀｝
伽利略得閒會幫有錢人占星、開普勒相信住星球嘅光會影響地球上嘅環境同人類。
相信星座聽落好神秘，點解研究科學嘅近代天文學家都會信星座呢？
今集，我哋會從楔形文字嘅發掘，慢慢搵出耶穌會教士用幾十年時間所破譯巴比倫泥板，當中透露住巴比倫祭司嘅天文成就，包括星體運行嘅算式、劃分黃道十二宮星座……
你會發現，祭司以最虔誠嘅心，得出嚴肅嘅觀測結果同算式。呢種宗教精神下嘅科學，喺好長時間以嚟都係人類嘅主流，對天空嘅敬仰，貫穿住巴比倫祭司、亞里士多德、喜帕恰斯、托勒密、伽利略到開普勒，呢班觀星者嘅心靈。
喺新儒家嗰集，我哋提到西方科學觀嘅背後，係以基督宗教作為基底。但我想做個延伸，基督宗教唔係無端生起，從巴比倫祭司嘅記錄，我哋會發現西方科學觀背後嘅心志，其實係愛慕住天空中嘅理型。
科學，同虔信嘅關係比你想像中近得多。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-07-3129 min
牛哥講經丨廣東話哲學、書籍分享【會員Podcast 全集試聽】生活雜談（1）：從歷史觀看人類點樣用千奇百怪嘅方式「服用」咖啡。原來咖啡最初唔係用嚟飲……丨《咖啡癮史》對呢個系列有興趣，可以考慮加入會員聽晒成個系列、支持一下牛某！用相當優惠嘅價格，就可以聽到牛某用心製作嘅內容。
會員podcast 有牛哥解經，主要講中國哲學以及歷史；西哲幼稚園講西方哲學家嘅歷史同基本概念；生活雜談陪你輕鬆讀唔同種類嘅作品！
引子：
一個人就算飲唔飲咖啡，只要出街就總會見到幾間咖啡店。但係你認唔認識咖啡嘅來源、歷史？
文獻首次記錄咖啡，係喺十五世紀嘅阿拉伯世界，距離依家只係七百年。當時，咖啡可以話係阿拉伯人嘅專利，出名到啲人將咖啡豆同阿拉伯畫上等號，法國植物學家安托萬·德朱西厄Antoine de Jussieu 仲將見到嘅咖啡豆稱之為阿拉比卡咖啡豆(Arabica beans）。
你以為阿拉比卡咖啡豆就係源自於阿拉伯？少年你真係太年輕，正如阿拉伯數字係源自於印度數字，只係因為西方人從阿拉伯嘅文獻學到012345678910嘅系統，先稱之為阿拉伯數字。其實阿拉比卡咖啡豆唔係源自於阿拉伯。（我喺正文內容再同你講講關於0嘅小知識，原來0係一個幾獨特嘅「數字」。）
《咖啡癮史》嘅作者表示，阿拉比卡咖啡豆嘅真正原產地係喺衣索比亞，即係東非，仲要有千年以上嘅歷史，衣索比亞一開始唔會飲咖啡，而係……一陣再講。另外，如果我哋找尋咖啡嘅傳播路線，就會發現一條橫跨大海嘅路線，即係由衣索比亞、葉門，到印度、印尼同拉丁美洲，正正同殖民帝國嘅擴張路線不謀而合。
依家嘅中南美洲係阿拉比卡咖啡豆盛產地，占全球咖啡豆產量七成以上。其實喺十八世紀初之前，當地連一棵咖啡豆樹都無。所以咖啡嘅傳播同殖民帝國係密不可分，你飲嘅咖啡其實係殖民結果。
咁又唔使急於放低你杯咖啡，正如過去嘅鹽糖係奢侈品，古人為咗鹽糖而衝突、甚或戰爭，今日嘅鹽糖就變成工人汗水同工廠現化代機械嘅產出；過去咖啡係伴隨刀劍，今日嘅咖啡已經稱唔上係殖民貨物，而係影響世界嘅作物、普遍而重要嘅貨幣。我哋就會要去探索一下當中嘅有趣歷史，你會發現唔同民族對於咖啡有住好唔同嘅形容。例如作者喺印度加爾各答見到一本書，書中形容咖啡豆係「來自非洲的邪惡黑豆。」當中寫到：
「我想請問讀者，那些黑皮膚的野蠻人在祭神的動物犧牲前吃下咖啡豆，你們不覺得很古怪嗎？其實只要比較愛喝咖啡的暴力西方民族，和愛飲茶的和平東方族群，就可以清楚了解苦澀咖啡給人類帶來怎樣的害處，甚至致命影響。」
睇落就係將咖啡同西方殖民暴力扣連；相比之下，西方人對咖啡係非常重視，甚至視之為理性嘅象徵。十九世紀法國歷史學家朱爾・米榭勒(Jules Michelet)認為，本來歐洲係一個酒鬼國度，肆意放縱，但因為咖啡轉入西方，令西方成功轉型做一個飲咖啡嘅理性社會，係西方文明嘅啟蒙。米榭勒寫道：
「文藝復興發抒的新思潮，部分歸因於一件足以養成新生活習慣，甚至改變民眾氣質的大事件──那就是咖啡的出現。」
（被殖民者視之為暴力；殖民者視之為理性，實在係一個值得留意嘅對比）
到底食物會唔會默默影響住歷史呢？有研究民族植物學嘅專家表示，特定嘅蘑菇或者葷（音：勳）類的確會有改變腦部作用嘅成分。例如馬雅人描述「祭祀用美洲虎」其實係祭司準備迷幻藥時所用嘅青蛙；埃及法老嘅神聖紫羅蘭之所以神聖，係因為佢有迷幻作用嘅毒性。呢啲都係令人上癮嘅麻藥，而咖啡就係其中之一，咁咖啡係令人暴力定令人理性呢？
作者作為咖啡狂徒，決定走訪世界，誓要搵出一切關於咖啡嘅故事。
我分成咗三大部分，分別係：
衣索比亞：咖啡源頭。戰爭、山羊與巫術
土耳其：愛恨咖啡。旋轉、聖物與慛情
維也納：咖啡間諜。禁令、大軍與blue bottle
今集係「衣索比亞：咖啡源頭。戰爭、山羊與巫術」，會講講衣索比亞人係點樣看待咖啡、關於咖啡同山羊嘅傳說、同埋講講咖啡呢個名嘅可能來源，原來咖啡最初唔係用嚟飲……
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
2023-07-2133 min
牛哥講經丨廣東話哲學、書籍分享S2EP26 全港最簡明康德入門（下二）：透過為知識劃界，康德將傳統形上學一掃而空，為上帝留低終極後路。結果教會修士稱看門狗為康德丨《康德知識論要義》、《徘徊於天人之際》【記得去Patreon免費閱讀文稿！】
上集講咗第一部分「字詞定義、知識界限」，今集係第二部分「劃界之後，理性上帝」。
S2EP24（康德入門上）提到「康德嘅結論居然係指出本體知識位於知識界限以外，本體唔係認知對象，所以本體知識係唔可能成立（只係幻覺）」。
今集，我會解釋為知識劃界之後，確定上帝唔係知識對象，點解係對上帝嘅最大保留。我仲會講一講海德格，顯示哲學家有時所討論嘅上帝，同神學家志趣不同。
最後，我會用康德喺一批嘅導論嘅第一句（即係上集講經驗可以分為兩層嗰句），為你完整咁總結康德嘅諗法。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-07-1641 min
牛哥講經丨廣東話哲學、書籍分享S2EP25 全港最簡明康德入門（下一）：兩個比喻，串連一堆概念；簡介先驗、超驗、感性、理解嘅意思同關係，繼而為知識劃界丨《康德知識論要義》、《哲學的故事》記得聽幾次上集先好聽呢集。如果你覺得上集有難度，咁今集就要再認真啲聽。牛某唔識得通靈，只係識得為你展現系統。我相信，你係一個對知性有要求嘅人先會聽牛哥講經。所以，加油。
記得睇文稿！
上集，我哋搵到感性（紅色）、理解（藍色）、理性（黃色）三種拼圖，亦喺一開頭提及過康德分咗兩個知識過程，原料同加工物。
今集就要睇下康德點樣分析人類嘅認知方式。由於內容較多，分成兩個部分，以兩集嘅形式推出，兩集會分享同一個引子同結語。
第一部分係「字詞定義、知識界限」。
我哋以字詞嘅定義，睇清純粹理性批判嘅意思，亦會用簡單比喻睇下超驗、感性、理解、勞思光所講嘅「範疇化之雜多」等等概念嘅箇中意思；嘗試描述康德所講嘅知識產生嘅過程，最後為知識劃界。
第二部分係「劃界之後，理性上帝」。
上集提到「康德嘅結論居然係指出本體知識位於知識界限以外，本體唔係認知對象，所以本體知識係唔可能成立（只係幻覺）」（牛哥講經，S2EP24），我會解釋為知識劃界之後，確定上帝唔係知識對象，點解係對上帝嘅最大保留。我仲會講一講海德格，顯示哲學家有時所討論嘅上帝，同神學家志趣不同。
最後，我會用康德喺一批嘅導論嘅第一句（即係上集講經驗可以分為兩層嗰句），為你完整咁總結康德嘅諗法。
按：康德入門系列，我主要運用咗：
勞思光，《康德知識論要義》，第三章，有關康德要義部分
李澤厚，《批判哲學的批判》，第二章，有關於康德認識論（知識論）
威爾・杜蘭，《哲學的故事》，第六章，有關先驗感性、先驗邏輯
劉創馥，《黑格爾新釋》，第二章，對康德哲學嘅總結
*排名依照我使用嘅多寡
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-07-0849 min
牛哥講經丨廣東話哲學、書籍分享S2EP24 全港最簡明康德入門（上）：勞思光以基源問題，一語道破康德核心思想；牛某用一幅拼圖，話你知康德點樣從哲學廢墟中開出新路丨《康德知識論要義》康德哲學係一座大山。威爾・杜蘭喺《哲學的故事》講到：
「研究康德的哲學時，這世上我們最不願做的一件事，就是去讀康德自己的著作。我們的哲學家像又不像耶和華，彷彿是從雲端在對你講話，只是沒能配上耀眼閃電雷霆萬鈞的氣勢；他蔑視具體實例，他的說法是，因為它們會讓他的書中內容顯得過多。（在經過如此的壓縮之後，這麼精簡的一本書也包含了約莫八百頁的內容）」
勞思光亦講過：
「這本書｛純粹理性批判｝本身就是頭緒紛繁。許多論證重複得次數太多，另一些則常常匆匆說過。」
即係有啲論證老是常出現，有啲論證好似無論證過咁。常人如你我，要閱讀康德原文會係非常痛苦。
所以，我會同你用勞思光嘅《康德知識論要義》當中嘅「基源問題研究法」，去睇下康德喺《純粹理性批判》（簡稱一批）嘅藍圖，搵出貫穿康德嘅中心思想，從繁重文本當中理清一條道路。
所謂簡明，我會用唔同比喻幫你理解康德；因為入門，我唔會亦唔可能解釋所有論證。
我主要會將唔同部分嘅推論結果組合，話畀你聽，如果我哋接受唔同部分嘅推論結果，咁就會同康德一樣，可以為知識劃界。
今集會分成四個部分：
第一部分係「重智傳統」。講講西方主客問題嘅難關。
第二部分係「難讀之書」。從字詞歧義、句子矛盾、康德長氣講下點解康德咁難睇。順便睇下康德對於「經驗」嘅兩層睇法。
第三部分係「基源問題」。睇下勞思光點樣用基源問題一語道破康德核心思想，我哋都會睇下康德一批嘅結構，從結構分析康德嘅思想進路。
第四部分係「康德要義」。我會用拼圖幫你理解康德點樣突破前人所製造出嚟嘅困局。
分咁多個部分，係畀大家有多啲休息時間。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
【文稿可於Patreon免費閱讀】2023-07-0152 min
牛哥講經丨廣東話哲學、書籍分享S2EP23 愛的理論（下）：人類總係會為咗愛，而花式虐待同被虐待；要離開互相傷害，就要明白成熟嘅愛嘅四大元素丨《愛的藝術》上集，我哋用一個比較宏觀嘅社會視角，從人類嘅失樂園，得知人類擁有原初分離；為咗解除分離，建造假樂園去尋求合一。今集，我哋會從心理學視角去分析兩種嘅合一傾向，分別係「共生合一」，同埋「成熟嘅愛」。內容會分成兩個部分。
第一個部分，係「片面的愛：只為你生」。
講述生物學同心理學上點理解「共生合一」。「共生合一」有非常多變化，不過萬變不離其宗。人喺「共生合一」有兩種主要身份，分別係施虐狂同被虐者，弗洛姆指出，雖然施虐狂同被虐者地位上聽落好唔同，但實際上係非常類似。甚至，施虐狂同「成熟嘅愛」都只係一線之差，因為兩者都只係想去探索生命嘅秘密。
書中引述咗一本以色列小說當中，一位軍官嘅說話：
「開槍——其實我是可以這樣做的——｛但是開槍｝ 只能讓你把一個傢伙幹掉……只用槍你永遠搆不著一個傢伙的靈魂深處，不會知道那靈魂是怎樣表現自己。但我不偷懶，我不只一次猛踩一個敵人一小時以上。你知道，我想要弄清楚生命究竟是什麼，生命在我們的猛踩下會變成什麼樣子。」
呢個就係唔成熟嘅愛會造成嘅後果，以傷害、踐踏作為手段，以此去滿足對生命秘密嘅渴望。弗洛姆就為我哋指出另一條路。
第二部分，係「全面的愛：自立並立」。
當我哋重新定義「活動」、「給予」嘅意思，了解愛嘅四種元素，人會發現，生命秘密就喺「成熟嘅愛」當中。聖經當中嘅人物被吞到鯨魚口中，其實係因為佢只知「正義」而不知「愛」。
有咗弗洛姆嘅指引，相信對於我哋日常生活會有唔少提醒。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-06-2458 min
牛哥講經丨廣東話哲學、書籍分享S2EP22 愛的理論（上）：失樂園後，人類得到根本孤獨；以狂歡、跟風逃避分離、焦慮。結果發現「自我」早已被「別人」吞噬丨《愛的藝術》上集，我哋講咗佛洛姆認為愛係藝術、係一個動詞。但點解人類要愛呢？若然唔愛，咪唔會錯愛。
佛洛姆會為你講述一個關於人類根本需要嘅故事：
喺遠古之際，當人類同動物仍然分別唔大，嗰陣時嘅人係唔會愛，亦唔需要愛。《聖經》創世紀嘅亞當夏娃食分辨善惡樹果子嘅故事，正正述說住人類進入一個能夠愛、需要愛嘅世界。亞當夏娃見到彼此裸體而羞恥，唔係因為裸體本身，而係因為當人擁有理性，就會發現自己同自然界、同他人唔同，呢一種分離感，逼使到人尋求合一。呢點我哋喺絕地天之通有提及到。
分離感嘅必然，使得人天生就處於分離嘅處境，因而有解除分離嘅需求。要解除分離，自然就將自己投身到「別人」。
海德格都有類似意思。佢講到：
「事實上，自我首先和通常地（zunächst und zumeist）都是非本真的，都是『別人自身』。」（引自關子尹，《徘徊於天人之際：海德格的哲學思路》）（不過海德格嘅「別人」（das Man）有特別意思，喺下文會簡單講講咩係「別人」，我哋遲下會詳細少少講海德格！牛哥解經新系列，西哲幼稚園）
人會點樣投身到「別人」？例如糊塗咁以部落狂歡、從眾行為得到假合一……
今集，會分成兩個部分。
第一個部分，係「失樂園：被逐伊甸」。我哋一齊睇下佛洛姆點樣寫實／科學地（？）描述，人點樣由和諧進入分離嘅世界、禁果嘅意義原來同分離有關。
第二個部分，係「假樂園：再尋合一」。講述離開樂園嘅人，從世界當中掙扎，用各種方式去尋回合一、尋找樂園；部落社會會常用狂歡、狂迷，現代社會會利用從眾。你會發現，「人，係不自覺地自願從眾」（牛某，今集）。每一個人都以為自己唔從眾，殊不知，人係自然從眾。
謹此引錄佛洛姆一段拳拳到肉嘅文字：
「大多數人甚至察覺不到他們有從眾的需要。他們生活在一種錯覺中，以為他們是順著自己的想法和嗜好行事，以為他們是個體，以為他們的見解是自己思考的結果──只是這些見解正好和大多數人的見解相同。所有人的見解一致又證明了「他們」的見解正確。又由於人們仍然有需要感覺一些個體性，他們便用各種微小不同來滿足這種需要。手提包或運動衫上的姓名縮寫，出納員的名牌，支持民主黨而不支持共和黨……這些都是個人差異的表達。廣告口號「它與眾不同」道出了對差異性那可憐兮兮的需要，哪怕在現實上這種差異性已近乎不存在。」（頁60）
現代嘅平等，早已利用人嘅從眾心態，成為去除差異、個體獨特嘅最大利器；平等變成一種新式從眾，令人變成一模一樣嘅「原子人」。佛洛姆仲因此批評唔真誠嘅男女平等，我會加把口去指責以「平等」之名，扼殺個體嘅做法。
有人話哲學家冷酷，我話佛洛姆呢個心理家嘅視角，係用最平靜、冷酷嘅語氣，去刺穿人心。
先用一段文字開頭：
身處伊甸服禁果，孤獨一身失樂園；
狂歡從眾又工作，逃避分離及焦慮；
縱身平等失自我，眾人昭昭我獨昏。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-06-1750 min
牛哥講經丨廣東話哲學、書籍分享S2EP21 點解咁多現代人會迷失喺愛情遊戲，出軌成為常態？你會做愛情浪子，定係一生去愛嘅匠人？丨《愛的藝術》每年都有好多本關於愛情嘅書出版，唯獨呢一本書被翻譯成34個國家嘅語言。呢本就係佛洛姆嘅作品，《愛的藝術》。
佛洛姆有兩個身份，佢係一個反對佛洛伊德嘅精神分析學者、亦係一個社會心理學家，佢對於個體心理同社會文化嘅扣連，有獨到嘅理解；寫過《逃避自由》、《自我的追尋》、《馬克思關於人的概念》……又佛洛伊德、又馬克思，你就可以知道佢嘅視野非常廣大。
如果你一心想從《愛的藝術》了解點樣可以識男仔、女仔，又或者點樣可以用花言巧語呃到伴侶，咁就誤會大了。因為《愛的藝術》唔係專講男女之愛，仲有講朋友愛、親人愛、上帝愛......喺最初出版嘅時候，《愛的藝術》仲有個副標題，寫住「an enquiry into the nature of love」，大概係「探討愛的本質」嘅意思。
書嘅正文只有百幾頁，想用百幾頁解決千百年以嚟咁多方面嘅核心問題，老實講，我一開始係唔覺得佛洛姆可以成功。
睇睇下，我會話《愛的藝術》看似通俗，但唔係愛情雞湯，而係一碗顏色似可樂嘅中藥，個老細聲稱唔苦，飲落都唔苦，嗒真啲就有一翻滋味。只要你去細睇呢本書，你就會明白我點解要講完神話先講呢本書。
佛洛姆喺理論部分，會嘗試檢視唔同社會（原始部落、資本主義）點樣影響人對愛嘅理解、人類嘅根源孤獨，導致人必需要愛……但今次我哋未講到，只能夠先去思考點解愛係一門藝術。
然後你會發現，呢本書唔係要教人做愛情浪子，而係解釋點解咁多人會成為愛情浪子，以及教人做一個人，一個用一生去愛嘅匠人。
據佛洛姆嘅助手所講，《愛的藝術》係為咗學術界同埋受過高等教育嘅人而寫，換言之，即係牛哥講經嘅聽眾。書中內容對應住當時嘅美國社會，順便測試大家對美國社會有幾了解。內容包括：
佛洛姆認為美國社會對愛有三大錯誤預設
從呢三個預設，《愛的藝術》呢個書名就注定會構成好多誤會，牛某：「咁譯成「行仁技藝」係合到個意思……退而求其次，可以承襲古人所用嘅語句……咁樣就會譯成「愛愛技藝」……再退到牆角，或者可以譯成「去愛技藝」。」點解我咁講呢？
佛洛姆點理解藝術同愛？
依家，我哋一齊進入到《愛的藝術》，喺經常談及愛嘅時代，重新理解愛。
喺開始之前，我想問你一個問題：
愛係一個名詞、一個對象，定係愛係一個動詞、一個過程？
你嘅答案，會顯示你係唔係佛洛姆想去提醒嘅嗰個錯愛嘅人。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-06-1042 min
牛哥講經丨廣東話哲學、書籍分享牛哥三個字｜電子書：KOBO SAGE 長期使用者嘅體驗報告本身想出一集去對比唔同電子閱讀器，但諗諗下，我直接同大家分享一下用KOBO SAGE嘅感受，相信會更有用同直觀。
內容包括：
牛某係實體書愛好者，點解會用電子閱讀器？
之前用iPad睇書，養成唔到習慣，用Kobo得唔得？
Kobo有無缺點？
最後會畀啲建議，提醒各位要考慮咩條件嚟選擇適合你電子閱讀器。
同埋講下我所預想嘅未來書店。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-06-0522 min
牛哥講經丨廣東話哲學、書籍分享【諗諗下唔對路】天文學家從兩萬年前嘅洞窟壁畫，發現金牛座嘅蹤跡。星座居然係舊石器時代嘅產物？｜《人類大宇宙》科學從十六世紀開始窺視宇宙，當宇宙變得極度宏大，地球亦慢慢從存在嘅中心被踢到銀河系嘅邊緣，最終構築出一個冷冰冰嘅宇宙，唯一嘅熾熱就只有一開始嘅Big Bang同恆星嘅核聚變。失去地心說，彷彿暗示住，生命只係隨機嘅意外結果。霍金話：
「我們只是「化學渣滓」，存在於一個中等大小的星球表面，繞著一個沒什麼重要性的星球運行。」
唔通，人只係「無意義宇宙中的被動機械」、喺無關痛癢嘅星球、過住無關痛癢嘅生活？
其實，自然科學並唔係對天文學嘅唯一詮釋。《人類大宇宙》嘅作者喬．馬錢特希望從一個宏觀視角去檢視人類對宇宙信仰嘅「深度歷史」，亦即係我哋喺上集所提到嘅「深邃時間」。用十二個故事，帶你重新體會「深邃時間」下嘅天文學，透過將人類有紀錄以嚟對天文嘅想像，我哋會發現天空點燃人嘅生命力同創意，引發人無限聯想。
好長時間以嚟，考古學家都唔選擇用天文知識去理解石器時代嘅建築、藝術、文化。作者表示，與其話學界否定石器時代嘅人擁有天文知識，倒不如話根本無討論呢個可能性。因為考古學家認為，星座最早嘅文字紀錄係源自於三千年前嘅巴比倫祭司，佢哋會將昴宿星團睇成天上公牛背上嘅鬃毛。
換言之，金牛座係三千年前嘅產物。所以當人發現拉斯科洞窟中畫住大大小小嘅公牛，都無諗過呢班二萬年前嘅狩獵採集者會有金牛座嘅概念。
但係，近年有唔少人類學、神話學同天文學等等領域嘅專家都主張，人應該徹底重新評估舊石器時代祖先嘅知識同能力；佢哋嘅故事，可能有住極深遠嘅影響力。甚至，有天文學家表示，兩萬年前嘅拉斯科洞窟壁畫上面嘅原牛，唔係畫緊狩獵場境，而係天上嘅金牛座。到底點解佢會咁諗呢？
今集，我哋就要一齊思索：金牛座係三千年前巴比倫人嘅創造，定係兩萬年前嘅產物呢？
你會發現，天空嘅故事植根於遠古文化，而天空對人類嘅影響，比你想像中深遠得多。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-06-0124 min
牛哥講經丨廣東話哲學、書籍分享S2EP20 西方始祖被逐伊甸園，注定一個絕對嘅上帝；中國文化喺二千年前以「絕地天之通」去除上帝，為「無上帝嘅世界」帶嚟解答丨〈「絕地天之通」與「巴別塔」──中西宗教的一個對比切入點之展開〉唔知你有無一種感覺，讀中國經典同讀西方哲學時總係會感受到明顯嘅分別，但又唔容易講出個分別？上集講到王邦雄，今集就用王邦雄有份搞嘅《鵝湖學誌》當中，林安梧寫嘅〈「絕地天之通」與「巴別塔」──中西宗教的一個對比切入點之展開〉，對照中西文化喺天人問題嘅答案（宗教），以此簡單了解中西文化嘅差異來源。
你可能會問，天人問題點解咁重要？依家廿一世紀，我都唔信天。
林安梧認為，人生於天地之間，講嚟講去都係三個問題，而三個問題當中，天人問題可謂係最為根本嘅問題。三個問題分別係人己、物我、天人嘅關係。
人己即係倫理問題，講人同人之間嘅義務同責任；
物我主要係知識論問題，到底人同物嘅關係係點，人要點接觸外物呢？
天人問題就係形上問題，世上有無冥冥中嘅主宰呢？係有個人格上帝、定係自然規律呢？而其中一個天人答案就係宗教，宗教訴說住人同神嘅點樣分隔、點樣契合，正正影響人點理解自己嘅存在。而天人問題嘅答案往往會決定人對人己、物我嘅睇法。
如果小明認為天人答案係梵天一夢，咁物我、人己都只係夢中之物，人嘅目標就係要回復清醒。所以唔少學者都認為，要研究一個文化，幾乎唔可以忽略佢嘅宗教，林安梧講到：
「因此，只要您把握了這個關鍵點，您就能清楚的掌握到人類文明的入路，從而清晰的論斷出彼此的異同。」
從絕地天之通與巴別塔，你會發現中西文化源頭上嘅南轅北轍，兩者對於天人問題提供兩個截然不同嘅解答──中國預設天人為連續，西方視天人為斷裂，由此生出性格唔同嘅文化。
內容包括：
「宗教」係譯唔到「Religion」嘅意思
巴別塔之前仲有個絕地天通
解構尚書同國語所提及嘅絕地天通
中國文化其實最講求現實，所以係講「實用理性」
西方講絕對愛，中國講等差愛
西方講人係上帝子民，中國講人係倫理中嘅人
從舜揹住老豆逃走嘅故事，可以反思乜嘢？
良知點解講求合情合理？
中國文化一早去除上帝，人點樣從「無上帝嘅世界」活落去？
依家，一齊睇下神話點樣影響文化性格。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-05-2058 min
牛哥講經丨廣東話哲學、書籍分享S2EP19 文化通識101：新儒家，新喺邊？簡介新儒家嘅歷史觀、反對佛教嘅原因、對民主科學嘅關懷丨〈當代新儒家面對的問題及其開展〉（呢一集本來係牛哥解經，你可以當係試聽版。覺得有意思可以支持一下）
現代人讀中國哲學，點都避唔開會讀到新儒家嘅作品。但係新儒家新咗喺邊？新儒家嘅視角點睇以前嘅儒學？新儒家嘅目標係咩呢？
今次想藉由王邦雄嘅《中國哲學論集》入面嘅〈當代新儒家面對的問題及其開展〉為大家講講咩係新儒家。雖然呢篇文章看似係陳述新儒家嘅特性，但我睇落似係王邦雄對新儒家嘅總結同寄望。
王邦雄確確實實係一位新儒家學者，佢曾經跟過梁漱溟、熊十力等等嘅新儒家大師學習，同有份創辦《鵝湖月刊》，當中收集唔同嘅中國哲學學術文章。佢嘅總結應該好能夠展現新儒家嘅精神所在。
事先聲明，我唔係一個新儒家。我有部分唔同意王邦雄嘅諗法，所以我會將佢一啲帶有主觀情感嘅用字，轉化為較中性陳述（尤其係王邦雄對於漢儒、清儒、馬克思主義嘅睇法）。所以呢篇文唔係我嘅立場，又唔完全係王邦雄嘅文字。
希望能夠以一個第三人身嘅角度，為你轉述一位新儒家學者點樣整理新儒家嘅理念。
內容包括：
簡述新儒家嘅歷史觀──中國文化經歷三大轉變，兩次思想輸入
回應西方文化進入中國，有三大派思想回應，而新儒家作為三派之外
儒學三期說，顯示新儒學嘅繼承同願景
儒家拒絕佛教嘅根本精神
新儒學同民主、科學嘅關係
簡介良知坎陷
按：如果我無指明引文係邊個講，照道理就係引緊王邦雄。
《牛哥講經》嘅內容係牛某全職寫作而得出，加上牧草嘅用心製作，所以你嘅支持對《牛哥講經》非常重要！如果你覺得《牛哥講經》值得支持／你想聽到牛某製作嘅更多內容、聽返線上讀書組嘅重播，好歡迎你加入到patreon，一齊閱讀、一齊思考。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-05-1353 min
牛哥講經丨廣東話哲學、書籍分享S2EP18 日本遊記：香取神宮半日遊，串燒鰻魚口水流。三百年歷史嘅鰻魚老店，到底值唔值得去呢？｜淺談日本「敬」文化丨《日本書紀》全職做咗《牛哥講經》一年，無放過咩假。喺早排去咗日本，就同大家分享一下「日本遊記」。呢一集當然唔會係咩旅遊指南（雖然當中會有我中伏後嘅提醒），因為係我第一次去東京，所以我係以一個大鄉里出城嘅心態去面對眼前一切。你可以當係旅程紀錄或者聽下我嘅心路歷程。
整個旅程去咗香取神宮同埋日光東照宮，所以會喺呢集最後補充少少日本神話。
呢集會講第一日行程，內容包括：
清晨機到成田機場，無我想像中辛苦
點樣上網買JR Pass，再去到當地拎？
遊覽香取神宮，感受神社嘅優美
品嘗三百年歷史鰻魚飯，我覺得如何？
惠比壽嘅燒肉，入面只見到日本人
正文主要係陳述行程。感想會喺結語度講。
我會藉住遊神社後嘅感覺，思考一下日本人嘅「敬」，再以三言兩語反思一下西田幾多朗講述「他人」同自我嘅關係。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-05-0652 min
牛哥講經丨廣東話哲學、書籍分享牛哥講電影｜《死屍死時四十四》：如果門口出現一個無生命跡象嘅裸體男人，攤咗喺度，郁都唔郁，你會點做？喺4月9日，fallformovies（夏冬）搞咗個包場，睇《死屍死時四十四》。感謝佢嘅邀請。完場仲有導演何爵天同演員楊偉倫嚟謝票。何爵天講到戲中有一幕古人捉西洋棋，係想致敬《第七封印》。
講起《第七封印》，你應該會記得我講過《更改主題》，入面嘅導論就係講《第七封印》。既然咁巧合，就借機引伸，去講講《死屍死時四十四》同《更改主題》嘅關係。
正文內容我主要會講劇情同「共同的荒謬」嘅關係，我會分出三種荒謬，再講荒謬字源上嘅意思。
到結語部分先會係思考部分。我相信觀賞荒謬時感到不適，先係正常反應。如果觀賞荒謬而樂在其中，咁反而未必係件好事。
【注意：呢篇文唔係介紹，而係詮釋，所以我會劇透，驚劇透就唔好睇落去。】
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-04-2927 min
牛哥講經丨廣東話哲學、書籍分享S2EP17 哲學：同死神捉一場西洋棋丨《更改主題：哲學從蘇格拉底到阿多諾》【只要你Like咗呢個Podcast嘅IG post，喺序言書室出示畀店員睇，就可以用8折優惠價購買呢本《更改主題：哲學從蘇格拉底到阿多諾》！】
如果你問乜嘢係哲學、喺咩情況下哲學會出現、哲學想做到啲咩......諸等問題實在難以給予一個明確答案，好似哲學唔鍾意答問題咁。就算有哲學家肯答你，你都會發現每個哲學家嘅答案都唔同。
但如果你以一個科學問題問一個科學家，例如問點解太陽會由東邊升起，佢會答你因為地球自轉加圍住太陽公轉，所以地球上會睇落太陽由東邊升起。你一問，科學家識答就會答出答案，而往往會得出同樣嘅答案（當然，未有定論嘅問題就會有差異嘅答案）。
將哲學同科學回應問題嘅態度做個對比，你就會發現哲學有一個特點：
「一般而言，哲學會避免對直接的問題提供直接答案。與其直接回答答案，哲學會更改所問的問題：研讀哲學最有趣及最有啟發性之處，就是去細看探究為何及如何那問題會轉變，它改變的理由為何，同時更改之後有甚麼後果。」（頁29）
所以，如果你問《更改主題：哲學從蘇格拉底到阿多諾》嘅作者雷蒙德・蓋斯（Raymond Geuss)：「乜嘢係哲學？」
佢就會用一篇導論，邀請你回想一套1957年公映嘅電影──《第七封印》（維基話佢係一套存在主義電影）（喺《死屍死時四十四》都有出現致敬《第七封印》嘅情節（comfirmed by 導演））《第七封印》嘅故事講咩？講有個死神同一個騎士捉棋，點解捉棋？因為……
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-04-2741 min
牛哥講經丨廣東話哲學、書籍分享S2EP16 為咗遺忘「巴力的恩典」血洗羅馬軍團嘅惡夢，羅馬人決定向迦太基人開出最殘忍嘅和約。時至今日，腓尼基人仲存唔存在？ ｜《腓尼基神話》（下集）上集「進擊的亞歷山大」我哋提到希臘同腓尼基嘅關係匪淺，但結果喺公元前332年被亞歷山大圍城。正喺推羅影響力大減之際，位於北非嘅迦太基急速掘起，迦太基喺腓尼基語當中，意思係「新的城市」。
公元前四世紀，西西里島上嘅希臘歷史學家菲利斯托斯(Philistus)喺記錄迦太基建城歷史嘅時候，將第一批移民首領稱為推羅人阿佐羅斯（Azoros）同埋卡爾塞頓（Carchedon）（卡爾塞頓應該同腓尼基文嘅「新的城市」有語源關係）。學者亦都喺迦太基遺跡當中，搵到唔少碑文將迦太基貴族稱之為「推羅之子」／迦太基貴族自稱為推羅人。
直至推羅陷落之前，迦太基每年都會派貴族回訪母國，更會將年收入嘅十份之一上繳畀推羅嘅美刻爾神殿，可見兩者文化上嘅扣連、關係緊密。
迦太基喺公元前351年，聰明咁喺羅馬呢個新勢力成長之際，同羅馬交好。當羅馬人戰勝薩莫人，迦太基送咗一個十一公斤重嘅皇冠畀羅馬作為賀禮。又喺公元前348年，同羅馬簽訂條約，約定兩國商人喺對方城市擁有同等權利。迦太基同羅馬共同成長。
天意弄人，腓尼基同希臘文化總係要向住同一個軌跡前進。希臘城邦同腓尼基海岸嘅反目成仇再度重演。迦太基同羅馬本來嘅夥伴關係，隨住雙方都越嚟越強，唔再願意受到對方約束，成為彼此最大嘅敵人。
但今次唔同嘅地方在於，迦太基成功喺當地建立一個強大嘅軍事政權，更出現羅馬人最恐懼嘅惡夢──漢尼拔。
我哋會喺今集睇睇漢尼拔點樣用出人意表嘅戰術，令羅馬喺坎尼會戰失利。
最後反思一下，從推羅同迦太基嘅結局，可以為我哋帶嚟乜嘢啟示。
內容包括：
簡介坎尼會戰，aka 羅馬最大嘅敗仗
羅馬人兵臨城下，迦太基為求和，向羅馬奉上金錢、貴族後代、武器。但當羅馬人開出唔使需要流血嘅和平條件嘅時候，點解全城拒絕投降？
迦太基文化點樣同羅馬文化結合
檢視希臘人對腓尼基人嘅印象
腓尼基人，到底依家仲存唔存在呢？
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-04-2251 min
牛哥講經丨廣東話哲學、書籍分享S2EP15 孫文無叫過自己做孫中山，童年時期想做「洪秀全第二」，結果以孟子二程作為基底，吸收西方理論，用三民五權提倡儒家共和｜共和之路（下集）孫文嘅一生受到中西文化深深影響，佢讀《聖經》時不忘去睇英文版嘅四書五經；講共和不忘孟子二程；讀醫但係用「生元」翻譯細胞；講國民革命但又深受太平天國影響。
呢一個被中西文化不斷衝擊嘅頭腦，最終建構出一個相當龐大嘅政治藍圖，即係依家嘅人仲會聽過下嘅「三民主義」、「五族共和」、「五權憲法」。
而講咁多三民五權，都只係為咗一個理想──喺當時引入「共和」概念到中國。
上集我哋講到亞里士多德對共和嘅理解，大致了解共和由古代嘅支持階級，變成近代嘅打破階級。孫文就唔滿足於近代共和，提出含有中國文化嘅共和制度，亦即係儒家式嘅現代共和。
我哋會簡單睇睇孫文童年同求學時期嘅經歷，再睇下佢所提出嘅儒家式現代共和有咩咁特別，你就會明白西方精神有咩缺陷、而中國古代精神又有咩可取之處。
今集內容包括：
簡介孫文同時代背景，「孫中山」呢個名其實係源自誤會
太平天國嘅先進同巫化
基督教點解有反抗帝國嘅精神
孫文自稱「洪秀全第二」、暗示自己係「漢人摩西」
三民主義同儒家之間嘅關係
孫文作為一個意欲推翻滿清帝制嘅革命家，點解會抽取中國文化精神？原來佢一早清醒咁發現先秦嘅儒家係反對專制
簡介五權憲法
1924年，孫中山喺《三民主義》中講過：「真正的三民主義，就是孔子所希望之大同世界。」你又知唔知道點解佢咁講？
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-03-2354 min
牛哥講經丨廣東話哲學、書籍分享【諗諗下唔對路】明明人類一早搵到化石，點解辨別唔到恐龍？演化論點擺脫中世紀嘅「年輕神造論」？ 最終發現演化論只係科學咁講老子！？｜《恐龍的啟示》（二）過去我一直都唔明白，呢一位教科學嘅先生點解要講述一個主流以外嘅世界觀。
但當我閱讀完呢一本《恐龍的啟示》，我先發現呢位先生所守護嘅係悠久嘅教會傳統──喺「公元前4004年10月22日，星期六，大約日落時分」，世界被神所創造。
我哋可以稱呢種神造論做「年輕神造論」，佢預設一個年輕嘅地球，充滿住神蹟，所有事物都係依靠上帝嘅大能由無到有創造出嚟。
你可能會覺得，世界年唔年輕只係無關痛癢嘅預設。但你有無諗過，如果世界真係年輕，咁神造論會比起演化論更加合理；如果世界真係古老，先有演化論嘅一席之地。
今集，我會用唔同時代嘅人對化石嘅理解，去為你講講改變預設點樣開啟現代嘅科學視角，同埋地質學家係點樣看待深邃時間。
內容包括：
古人原來會將挖出嘅恐龍化石，當成神話生物
你睇得出係牙齒化石，但古人偏偏叫佢做「舌石」
「公元前4004年10月22日，星期六，大約日落時分」到底有咩意義？
十九世紀前嘅人，多數都無諗過地球有久遠歷史
「舌石」同地質學發現嘅關係
喺深邃時間下，老子嘅哲學睇嚟意味深遠
一齊從化石嘅發現嘅過程，檢視古人，以及我哋嘅視角盲點。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-03-2123 min
牛哥講經丨廣東話哲學、書籍分享S2EP14 「古代共和」同「近代共和」有咩分別？Republic會譯成共和，原來係為咗紀念一個叫「共和」嘅人？｜共和之路（上集）今集起因係要補充迦太基同羅馬政制上嘅不同，有啲講遠咗，我相信仍然有意思。
本來今集個標題係：「由迦太基到孫文，為你簡單講講共和制度嘅三大變遷，窺探民主精神嘅意味」，但係我又寫多咗，所以拆做兩集。所謂三大變遷，其實係我分咗三個階段去為你講講「共和」意思上嘅轉變，分別係：
古代共和：以羅馬共和同迦太基共和作為例子
近代共和：以西方嘅英、法、美國作為例子
孫文共和：以孫文嘅三民五權作為例子
今集就只講到頭兩大變遷，即係古代共和同近代共和，最後，我哋仲會補充「共和」譯名嘅來源。
你可能會知道，「共和」係翻譯自羅馬概念，res publica，英文即係republic，好多人都會因此認為共和制度源自羅馬共和國，又或者羅馬共和國已經定義出咗共和。但中國史家施治生喺評論羅馬政體嘅時候就提醒我哋：
「共和國……以羅馬共和制為其歷史典範。這並不意味著古代的民主和共和僅僅限於古希臘羅馬地區，單純地把古代西方當作民主和共和的發源地。其實，東方文明古國並非所謂的東方專制主義一統天下，許多國家都留存了民主和共和的歷史痕跡。 」（施治生，《試論古代的民主與共和》，1997，頁3－13）
換言之，「共和」呢個概念，雖然源自羅馬，其他文化亦未必稱自己嘅政體做共和，但唔代表其他文化無共和。即係即使無「共和」之名，都可以有「共和」之實。正如我哋喺《宇宙與歷史》提到，古人並無「存在」呢個概念，但佢哋會用神話思考「存在」一樣。
所以，要了解「共和」嘅根源，最好就睇埋同羅馬同時期嘅國家，睇下當中有無「共和」精神。迦太基亦被史家視為係共和政體。咁古代共和精神到底係咩呢？
呢層就要交畀亞里士多德為我哋定義，然後檢視羅馬同迦太基邊個更加「共和」，再睇睇「共和」隨住時間喺意思上嘅巨變：共和國點樣由有君主，變成人民之國嘅意思。當中會稍稍講講孟德斯鳩同林肯。
用一個鐘（兩集）由迦太基講到孫文，內容一定會比較簡略。但我相信，有時「見林」比起「見樹」更為重要。因為一個歷史視角首先要夠廣大，先能夠容許人細緻研究嘅時候，搵出唔同時代、地區嘅特性。
有機會嘅話，我會同你一齊逐個逐個部分慢慢睇。今次就先提綱式咁睇睇「共和之路」，了解共和，下集再睇孫文。
提提大家，如果你覺得《牛哥講經》值得支持／你想聽到牛某製作嘅更多內容、聽返線上讀書組嘅重播，好歡迎你加入到patreon，一齊閱讀、一齊思考。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-03-0734 min
牛哥講經丨廣東話哲學、書籍分享S2EP13 進擊的亞歷山大：隔岸遙望被五十米高牆包圍嘅海島，亞歷山大無摩西、無艦隊，居然要用陸軍過海、擊落高牆？｜《腓尼基神話》（中集）上集我哋主要講咗腓尼基人喺埃及時期、腓尼基時期嘅輝煌，既富可敵國、又有海外殖民地，但係腓尼基所擁有嘅財富被近東強國虎視眈眈，最終喺公元前八世紀正式落入亞述控制。
一個商業王國被亞述掌控住稅務權力，其實就係命脈被人掌管。但即使情況咁唔理想，腓尼基人仍然靠住航海，將先進嘅文化傳到地中海沿岸。
如果你想像地中海做一個圓圈，咁本來喺地中海東邊嘅腓尼基海岸，就將佢嘅影響力擴展到整個圓圈。喺地中海嘅中北部，腓尼基喺希臘人嘅失落時期拖以援手，希臘又影響北方嘅馬其頓；喺地中海南部，即係北非地帶，腓尼基建立出最富強嘅迦太基（下集會講）。
今集，我哋嘅目光放到地中海嘅中北部，睇下希臘點樣掘起，到亞歷山大決意要攻陷推羅。
不過，推羅城位於海島、 擁有五十米高嘅圍牆，亞歷山大點樣喺無海軍嘅情況下，諗出一個令陸軍過海嘅計策呢？
內容包括：
1. 希臘文化嘅根源，同埃及、西臺、腓尼基千絲萬縷
2. 原來埃及聖書體都係字母系統，點解唔將聖書體當成第一套影響世界嘅字母系統？
3. 字母系統嘅發明有咩咁重要？
4. 腓尼基人曾經係希臘人嘅老師，帶領希臘離開黑暗。點解兩者最終成為敵人？
5. 馬其頓點同希臘融合
6. 亞歷山大點樣用陸軍進攻推羅
一齊睇睇公元前814年－公元前149年嘅迦太基時期，推羅城點樣迎接自己嘅未來。
提提大家，如果你覺得《牛哥講經》值得支持／你想聽到牛某製作嘅更多內容、聽返線上讀書組嘅重播，好歡迎你加入到patreon，一齊閱讀、一齊思考。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-02-2847 min
牛哥講經丨廣東話哲學、書籍分享【諗諗下唔對路】演化證據顯示恐龍並無滅絕，喺日常中仍然可以見到恐龍？｜《恐龍的啟示》（一）問你一個問題：滄龍、翼龍、鱷魚、企鵝，以上邊一種係恐龍？畀啲時間你去估下，如果你估錯就要考下你身邊嘅朋友，照計佢都會係錯，咁你就順便叫佢聽呢個podcast。Deal唔Deal？OK，Deal。
答案係——企鵝。無錯，係海洋公園都有嘅企鵝。佢哋唔係恐龍嘅近親，而係恐龍嘅直屬演化血脈。雖然滄龍、翼龍都有個龍字，但睇落蠢蠢地嘅企鵝同無畏龍嘅關係，要比滄龍、翼龍同無畏龍之間更加親近。
歡迎你返到嚟《諗諗下唔對路》，今集要同你講講「演化證據顯示恐龍並無滅絕，你我喺日常中仍然見到恐龍後代」。
「滄龍、翼龍、鱷魚、企鵝」嘅問題，係《恐龍的啟示》嘅作者肯尼斯・拉科瓦拉(Kenneth Lacovara）經常喺演講中詢問人嘅問題，因為佢希望以地質學家同古生物學家嘅身份，去帶畀人正確嘅科學理解。佢明白企鵝呢一個答案可能會顛覆你我嘅常識，但佢就好幽默咁表示：
「你可能會想，這聽起來很不可思議。然而確實是這樣，而這就是科學存在的原因。正如歷史一再證實，在理解宇宙的結構與複雜時，常識是很糟糕的指南。愛因斯坦說常識是「偏見的累積」。如果常識有用的話，我們就不需要科學了，但常識並不牢靠。」
常識係「偏見的累積」，相信各位聽完伽利略嗰集之後都會深有感受。常識話畀古人知，太陽圍住地球轉，但科學（望遠鏡）話畀我哋知，地球圍住太陽轉。今次，就想打破各位對恐龍嘅常識，科學咁檢視恐龍，搵下恐龍、蜥蜴同鳥類之間嘅關係。
今集內容包括：
- 講述點解滄龍、翼龍、鱷魚唔係恐龍後代，但企鵝係
- 恐龍同蜥蜴嘅共同祖先同分別
- 恐龍同鳥類嘅關係
- 科學精神同常識嘅分別
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com
2023-02-2222 min
牛哥講經丨廣東話哲學、書籍分享S2EP12 傳說中嘅紫紅民族「腓尼基」，處於彈丸之地，但竟然係希臘之前嘅海上霸主，仲嘲笑埃及人只夠錢買樹皮｜《腓尼基神話》（上集）沿住地中海嘅東部海岸線，有一個民族住喺南到北有三百二十公里嘅狹長領土，大約位於依家嘅敘利亞、黎巴嫩一帶。就喺呢一個彈丸之地，誕生咗古地中海第一個航海同商業霸權。只係因為佢嘅文化被徹底摧毀、連根拔起，而被人遺忘。
可能你有少少疑惑，地中海第一個海上霸權唔係希臘咩？又真係唔係。
地表上嘅腓尼基雖然已經消失，但近來考古學家從地表之下嘅腓尼基墳墓，搵出腓尼基人自己所述嘅故事；考古學嘅發掘，打破咗腓尼基嘅沉默、打破希羅文明對腓尼基嘅一言堂。今日我哋終於可以稍稍清除歷史嘅迷霧，一窺腓尼基人揚帆遠航嘅英姿、知道影響住希臘─羅馬神話（同時影響住舊約聖經）嘅腓尼基神話。
一齊藉由呢一本《腓尼基神話》去用三集嘅時間、以三個階段梳理腓尼基歷史，順便係一次簡短嘅地中海史，然後再用一集時間講講腓尼基神話。
今集，就要由歷史開始，講講第一階段──埃及時期。
內容包括：
1. 腓尼基吸收並改進大量埃及文化，包括命名、喪禮同文字，發展出世上第一套字母系統，係希臘文、拉丁文、英文、法文最原初嘅祖先
2. 埃及非常在意腓尼基人，係因為腓尼基擁有兩樣埃及寶物
3. 隨住埃及衰落，腓尼基唔再受埃及控制而變得獨立，甚至嘲笑埃及祭司
4. 解釋腓尼基係一個複雜民族嘅原因
5. 推羅城作為其中一個腓尼基城邦，完善腓尼基嘅宗教，令佢作為一個商業國家，居然擁有海外殖民地
6. 腓尼基嘅航海技術領先整個地中海，做到無其他民族做嘅到嘅壯舉
7. 富甲一方嘅腓尼基點解因為主業係海上貿易，而註定會走向衰亡
睇睇曾經嘅海上王國，點解最後地上不留半點痕跡。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-02-1140 min
牛哥講經丨廣東話哲學、書籍分享【諗諗下唔對路】明明一日得24小時，點解有人可以做到咁多嘢？《原子時間》教你點樣做時間管理大師，打破循環嘅鹹魚人生（今集有YouTube影片版本，可以喺下面連結去睇睇）
今集，我哋一齊諗諗生活中嘅時間。
你有無試過想搵一個興趣，但結果三分鐘熱度？好驚一個未完善嘅開始，而唔敢踏出第一步？咁你就要睇下《原子時間》，睇睇作者柳韓彬點樣以佢嘅個人經歷，去講述自己由一個收工之後就乜都唔想做嘅人，變成一個擁有正職、又有多姿多彩副業嘅時間善用者。
作者嘅生活聽落好理想，因為現實咁講，大多數人返嘅工都唔係可以實踐到自己興趣嘅工作；就算工作同自己興趣相關，都會有諸多嘅規限，唔易發揮自己。以前嘅世代提倡一個人一生只做一件事，就係專注工作，所以能夠捱苦、能夠安然喺重覆當中；但係依家嘅世代有唔少人唔想安於原型嘅重覆，覺得工作以外，應該要有個work-life balance，即係工作同生活嘅平衡，抗拒重覆而實現唔到自己嘅工作。
但即使想work-life balance，往往現實就係work-life 唔 balance。明明想放工之後享受生活，偏偏唔容易離開工作嘅影響，被工作嘅勞累拖垮嘅身體令人難以全心投入生活當中。結果係工作吞噬咗生活，體會人生就係working-life。既然工作用咁多時間、咁大壓力，收工其實飯都唔想食，返到屋企就梗係想hea 下、喺梳化攤喺度碌電話，仲點會有咩原子時間，恨不得搵方法去增加自己嘅休息時間。由尋求工作同生活嘅平衡，變成工作同休息嘅平衡。時間耐咗之後，發覺尋求休息嘅自己好似慢慢跌入一種變成「工作機器」嘅循環當中：
睡醒好攰、返工、放工、休息（打發時間）、夜瞓、睡醒好攰、返工、放工......
休息只係機器過載後嘅冷卻，一冷卻完又要再度工作。你或者都試過突然之間的起心肝，覺得自己要打破呢個循環，開始計劃放工要做自己有興趣做嘅事。然後你就會發現維持計劃唔係一件易事，嘆息work-life balance點解咁難，明明想好好生活，反而因為想好好生活而精神衰弱。既然咁難，又想返去休息……呢個又係另一個循環。掙扎與浮沉，失敗感慢慢減弱呢個循環嘅動力，最後連掙扎都無埋。接受陽光嘅暴曬、以鹽份嘅傷害作為麻醉嘅保障，喺對生活嘅忙碌抗拒嘅同時，成為心不甘情不願嘅鹹魚。
其實，生活忙碌唔一定會有精神上嘅疲累，精神上嘅疲勞往往係因為我哋無處實現自己、再唔係就係太過燃燒自己。一位臨床心理師洪仲清就喺推廌序提醒我哋應該要「用減法過生活，用加法看自己」，即係減少關注一啲唔重要嘅事，而去多感受自我實踐嘅滿足感。佢話：「當我們有意識的蒐集時間的碎片，好好完成重要的事，那會相當有成就感。醒着的時候能盡力已沒有遺憾，睡眠的時候就可以更香甜。」呢個就係所謂嘅充實，人就好似一個氣球一樣，充實嘅氣球先係一個靚嘅氣球，正如孟子所講：「充實之謂美，充實而有光輝之謂大，大而化之之謂聖，聖而不可知之之謂神。」無氣會顯得頹廢，太多氣又會爆煲，咁點先可以有動力去充實自己，又唔爆煲？
一齊聽下作者點樣去尋找、使用原子時間，突破「工作機器」嘅時間循環，從而成為時間管理大師。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-02-0529 min
牛哥講經丨廣東話哲學、書籍分享S2EP11 天皇以玉音放送，親自埋葬人民嘅理想；《日本最漫長的一天》，顯示神話原型最後嘅綻放同沒落｜日本二戰簡史（下）｜《日本最漫長的一天》+《戰後的日美同盟真相》早喺1931年，日本就藉由九一八事變控制中國東北地區，更喺1932年協助成立偽滿洲國，所以直到1945年，日本已經起碼侵佔中國東北達15年之久。喺1941年日本更氣勢洶湧地宣佈「大東亞戰爭」，就係想以中國東北作為跳板，一統整個東亞。佔領嘅時間同野心，顯示當時日本陸軍嘅軍人並無任何打算放棄中國東北。
決心投降嘅裕仁天皇同內閣當然知道士兵同人民會對投降感到無所適從，所以天皇作出咗史無前例嘅舉動──喺1945年8月15日正午時分，天皇本人去朗讀《終戰詔書》，要求人民同軍隊停戰，史稱「玉音放送」。當日，係日本人民第一次耹聽到天皇嘅聲音。而「玉音放送」嘅出現同日本投降，決定天皇自始要一步步褪去神聖。
今集，我哋就係要透過《日本最漫長的一天》同孫崎 亨嘅《戰後的日美同盟真相》，講述唔同嘅軍人點樣面對天皇嘅「玉音放送」，呢一日點樣改變日本國體、以及原型最後嘅綻放同殞落。
今集內容包括：
1. 「宮城事件」嘅經過同結果
2. 軍人嘅遺詩同遺言
3. 《終戰詔書》同《人間宣言》嘅意義
4. 日本憲法嘅一個稱呼，顯示戰後日本憲法從根本上摧毀天皇傳統
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-01-2347 min
牛哥講經丨廣東話哲學、書籍分享牛哥三個字｜或然率：從巧合討論命運，用莊子睇《First Love》兩個人嘅相遇，往往係因為巧合。但面對呢個機率咁低嘅巧合，應該相信巧合係由命運譜寫，定係隨機事件嘅碰撞呢？愛情，係命中註定定係一場偶然？
相信呢個問題，係唔少喺Netflix 睇完《First Love》嘅人都會去思索。
今次，牛某一齊同你思索「或然率」，去分析「命運」呢個概念嘅意思。然後，你會發現「命中註定」係非常現實。
今集內容會以《First Love》 嘅故事為基底，驚劇透嘅話就唔好聽落去喇。
內容擇要：
「人習慣忘記自然巧合、忘記搵到嗰一個蘋果既係命中巧合，同時亦係自然巧合嘅事實。」
「人想要解釋過去、想要保證未來，結果自己想像成自己或某人人生嘅編劇，去將過去發生嘅事件串連，稱之為命運嘅進程。其實......」
「傳統中國文化並無「命運」呢個概念，你搵晒成個先秦嘅文獻都唔會有。古人就唔想像有一個高高在上嘅視角去透視人嘅未來、決定人嘅未來。古人只有提倡「知命」。」
「命中巧合，係我生命中嘅巧合，我生命，就係由我掌管。知命唔係要知道他人為自己譜寫嘅命運，而係......」
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-01-1532 min
牛哥講經丨廣東話哲學、書籍分享【諗諗下唔對路】十二星座一早已經由巴比倫傳入古代中國，仲變咗做天干地支？｜《郭沫若《釋支幹》與泛巴比倫主義》（今集有YouTube影片版本，可以喺下面連結去睇睇）
點解有史家話天干地支係嚟自巴比倫嘅十二星座？攝提格、赤奮若究竟係咩嚟？原來十二生肖根本對唔上十二支？
今集同你諗諗天干地支同十二星座。
————————
嚟緊又到一年一度現代人會接觸天干地支嘅時間──農曆新年。
你有無諗過點解十二支就係對應鼠牛虎兔龍蛇馬羊猴雞狗豬？一位中國歷史學家話畀我哋知，十二支未必係對應地上嘅動物，而係對應天上嘅動物──星座！？
如果你去打開中國第一本訓詁書（即係字典）《爾雅》，就會發現《爾雅》去解釋十二支嘅時候，講到「大歲在寅曰攝提格」、「在丑曰赤奮若」，但一直無人知道攝提格、赤奮若係咩意思。
而中國歷史學家郭沬若曾經寫過一篇叫做《釋支干》嘅書，當中將中國嘅十二支（亦可以理解成十二生肖）去對應巴比倫嘅十二星座，嘗試去解構《爾雅》所記載嘅迷團同一窺支干嘅原初意思。
今集，我哋會用王獻華嘅《郭沫若《釋支幹》與泛巴比倫主義》去睇睇呢一個講法有無合理之處。
今集內容包括：
- 簡介支干嘅意思上嘅轉變
- 將十二支對應《爾雅》、巴比倫十二星座，發現中文字藏住答案
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2023-01-1120 min
牛哥講經丨廣東話哲學、書籍分享S2EP10 沒落行動：喺日本軍人預備本土作戰之際，原子彈、蘇聯軍隊、天皇點導致日本內閣投降，避免人類史上最大規模嘅兩棲作戰發生？｜日本二戰簡史（中）｜《日本史1600-2000》+《日本最漫長的一天》本來我打算日本史只講兩集，但結果都係要分成三集。今集，仍然未講到天皇嘅玉音放送。
上集，我哋提到日本面對同美國明顯嘅戰力差距，喺太平洋節節敗退。如果你認為日本喺頹勢之下就一定會投降，咁你就太唔了解日本，又或者應該話，你唔了解太初存有論嘅力量。
原型所給予嘅意志力，足以叫人從無到有，拔地而起出城池、亦足以叫人死守本來係石頭嘅城牆、為家人而戰、為理想而戰……何況當時嘅日本仲有超過二百萬軍民喺中國領土之上，仍然係一股不容忽視嘅戰鬥勢力。
喺日軍意志仍然高昂、軍事力量尚未用盡嘅情況下，盟軍已經預定以過百萬嘅軍人參與「沒落行動」，強行攻佔日本本土，逼使日本投降。日本軍人亦打算下定「本土決戰」嘅決心。今集，就要為你講講點解日本政府喺軍人準備死戰之際，執意投降。
內容包括：
1. 簡介原子彈嘅歷史同沒落行動嘅規範
2. 面對連日轟炸、無力重返太平洋，日本決定宣佈「一億特攻」
3. 日本政府對盟軍勸降嘅《波茨坦公告》不作理會，被當成拒絕投降
4. 點解美國咁想盡快令到日本投降
5. 廣島被原子彈攻擊同蘇聯對日宣戰之後，日本內閣嘅反應
6. 天皇喺投降當中嘅角色
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2022-12-2636 min
牛哥講經丨廣東話哲學、書籍分享S2EP9 發動大東亞戰爭，同天皇神話有咩關係？｜日本二戰簡史（上）｜《日本史1600-2000》喺《宇宙與歷史》當中，我哋單獨咁理解神話點樣運用原型反覆、大時論、因果業力等等嘅系統去令人應對痛苦。但現實上，神話單獨運作並唔常見，往往會同政治、社會風氣結合。有時候，會將原來嘅神話意味改寫，將神明變成一個含糊嘅概念，甚至令到代表和平嘅神明成為戰爭嘅原因。
今次，就想透過二戰時候嘅日本講講天皇喺戰爭時期嘅角色，我會分開兩集內容。
今集我會喺開頭補充傳統天皇嘅角色同時代背景，然後透過詹姆斯・麥克萊恩嘅《日本史1600-2000》所收集到嘅資料，去講講二戰時候嘅日本政府點樣將天皇制結合軍國主義、以教育同宣傳令到國民自願投入到戰爭當中。我哋會藉住日本青年同軍人用嘅說話、書信、行動去寄托自己對於天皇嘅情感，去顯示天皇制點樣影響當時嘅日本人、睇睇點解有當時嘅人認為大東亞戰爭係一場聖戰。你會發現當一個概念變得含糊，會出現乜嘢危險嘅後果。主要係以歷史自己說話。
下集會用半藤一利嘅《日本最漫長的一天》去講講即使日本本島被連日轟炸、被投擲兩粒原子彈之後，天皇打算投降，仍然有日本軍人以造反去阻礙投降嘅歷史，總結「太初存有論」嘅作用同失落嘅結果。
今集會講講：
1. 日本天皇制嘅特別之處
2. 社會達爾文主義對時代嘅影響
3. 天皇地位高舉、「八紘一宇」同大東亞共榮圈嘅關係
4. 喺天皇同國體結合嘅情況下，日本青年點樣看待「大東亞戰爭」
5. 戰況轉差，日本軍人點樣面對必敗嘅戰爭
6. 「神風特攻隊」嘅起因同遺書
有時只要擁有理論背景，當你聆聽鮮明歷史嘅陳述，就會聽出更多嘅內容。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2022-12-1935 min
牛哥講經丨廣東話哲學、書籍分享【諗諗下唔對路】「哥貝克力石陣」為文明進化論掛上大問號，顛覆考古學家對農業發展同舊石器時代嘅理解｜《諸神的魔法師》今集同你一齊聽聽哥貝克力石陣發掘者點諗。
哥貝克力嘅意思係肚臍之丘，有時會被譯成大肚丘，就正如佢個名一樣，只係一個微微突起嘅山丘，並唔起眼，人經過都未必會留意到。但正正係呢一座小山丘，改寫咗考古學家對農業發展同舊石器時代嘅理解。因為哥貝克力有一個石陣，係目前被科學所確認嘅最古老嘅人造巨石建築。
本來考古學家相信人類喺舊石器時代（300萬年前－1.2萬年前）主要係以狩獵採集者形式生活，而到舊石器時代末期慢慢開始去逐少逐少咁發展農業。呢種諗法我哋暫稱為文明進步論。
其實都好合理，因為通常事物都係由簡單到複雜咁演變。所以1.2萬年前嘅人應該係啱啱嘗試脫離狩獵採集，只有鬆散嘅分工同簡單嘅農業。
喺舊石器時代之後，就係新石器時代，而新石器時代嘅巨石陣多數係喺早六千年前建立，自然有住發展耐啲社會分工同農業。佢哋有能力統合一班人，並且供養到一班人搬石頭，都仲算係合理。
但係，呢種文明進步論難以解釋喺哥貝克力石陣所發現到嘅一切。
點解？因為哥貝克力石陣嘅精美同規模本來被考古學家認為唔可能係舊石器時代嘅產物，但結果被放射性碳定年法確定佢就係舊石器時代嘅產物。因此，坊間就有唔少對於哥貝克力石陣嘅想像，例如既然舊石器時代嘅人根本無能力去起石陣，咁哥貝克力石陣證明咗有外星人去建造呢啲巨石建築。
今次呢一本《諸神的魔法師》嘅作者，葛瑞姆・漢卡克(Graham Hancock)就喺2013年9月嘅時候，訪問咗發現呢一個石陣，並將呢個石陣嘅奧妙展現畀世界嘅考古學家──克勞斯．許密特。聽聽佢親身講講點樣喺文明進步論嘅主流下，將哥貝克力石陣發掘出嚟，同埋佢對於哥貝克力石陣嘅理解到底係點。
今集會講講：
- 哥貝克力石陣係少數舊石器時代嘅戶外遺跡，原因同放射性碳定年法嘅盲點有關
- 石陣中有為數唔少嘅鵝卵石，顯示石陣有住一個刻意而令人費解嘅行為，但卻令人能夠用放射性碳定年法測出佢處於舊石器時代
- 石陣嘅建築，係越舊嘅越精美，越新嘅越衰弱
- 石陣發現最早期嘅農業痕跡，但呢一個農業嘅發明唔合乎文明進步論嘅邏輯
希望你聽完今集之後，會明白到點解許密特話：
「嚴格來講，我們不能說哥貝克力石陣是一座神廟。且讓我們稱呼他是一座山丘聖城。我不能說會改寫歷史，而是對現存的歷史增加一篇重要的章節。我們認為從狩獵採集者到農夫的變遷過程很緩慢，是一步一步地進展。但現在出乎意料的是，在這樣的時期，這令人興奮的遺跡被建造出來。」
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2022-12-1524 min
牛哥講經丨廣東話哲學、書籍分享S2EP8 如果人類嘅通病叫做痛苦，神話同信仰就係醫病嘅藥，咁思考係毒藥定係良藥？｜總結｜《宇宙與歷史：永恆回歸的神話》（四）本來呢一集係《唯一與進程》嘅下，諗諗下不如將佢整成三部曲嘅總結。重溫一下，我將耶律亞德嘅《宇宙與歷史》分咗做三部曲──原型與模仿、時間與反覆、唯一與進程。
喺原型與模仿，我主要想指出初民對於原型嘅共同想像就係天上、中心嘅原型，佢哋分出兩個世界，一個係模仿神明嘅世界，一個係未被光明照亮嘅黑暗世界，呢一個模仿神明嘅世界需要靠住每年嘅儀式維持。以此去進入初民嘅視角。
到時間與反覆，我哋講到初民仲將世界分成神聖時間同世俗時間，從一次羅馬尼亞嘅民族學家嘅考察，可以見到人會用英雄原型去消除歷史，用範疇代替歷史。而呢種範疇係無時間性，無論二千年前定五百年前嘅英雄都係做同樣範疇嘅事；同時範疇係為咗消除個體，任何個人經歷都只會被轉化英雄或祖先。呢種諗法嘅背後就係時間以年嘅重覆，去消除人嘅罪惡。而人雖然模仿自然，但呢種模仿同動物大有不同...
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2022-12-0641 min
牛哥講經丨廣東話哲學、書籍分享【諗諗下唔對路】以前咁多天文學家講日心說都無事，點解伽利略提出就被軟禁？原來關鍵喺個望遠鏡度｜《人的條件》如果我同你講：「地球係圍住太陽轉嘅。」你好可能會覺得我點解要講廢話，圍住太陽轉係一個常識嚟㗎嘛。但係喺古代，地球圍住太陽轉就唔係一個人人都知嘅知識。當然有小部份嘅人知道地球圍住太陽轉，但對於大部份嘅古代人嚟講，太陽圍住地球轉更合符感官。太陽東升西落，仲唔係圍住自己轉？
我哋依家會知道地球圍住太陽轉，係因為一個意大利男人，伽利略・伽利萊（Galileo Galilei）。霍金話：「自然科學的誕生要歸功於伽利略。」近世最著名嘅科學家稱呢位十六世紀被教會判定為「有強烈異端嫌疑」嘅伽利略係「自然科學之父」。
換言之，喺伽利略之前，根本就無自然科學。
呢個講法到底有無誇大呢？今次用鄂蘭嘅《人的條件》對事件同觀念嘅分析，為你講講一個望遠鏡點樣開啟自然科學。
今集內容包括：
- 日心說喺伽利略之前一早有人提出，點解大家最在意伽利略？
- 原來教會容許日心說用嚟計數，咁伽利略點解被判異端？
- 望遠鏡點樣改變所有人嘅思維方式？
- 自然科學嘅阿基米得點到底係咩？
- 人得到科學後，失去咗咩？
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2022-12-0327 min
牛哥講經丨廣東話哲學、書籍分享S2EP7 古人點走出神話嘅輪迴？睇下信仰點樣令人類直視歷史，仰望上帝之城｜唯一與進程｜《宇宙與歷史：永恆回歸的神話》（三）今集係宇宙與歷史嘅第三部曲，唯一與進程嘅上部分（由於我寫得太長，會分上下集出，今集係上集，會講正文嘅內容，下集會講講結語）
喺第二部曲，時間與反覆，我哋提到初民會將一切事件消融到範疇當中，咁係因為佢哋面對住嚴峻嘅生存環境，所以渴望真實嘅中心去給予保證。
苦難係一個重要課題，係實在嘅個體感覺，遇到洪水旱災、暴風山火、勞役......就會受到切身嘅肉體痛苦。但人除咗肉體會受苦，更會喺精神上製造痛苦，呢個就係人所擁有嘅獨特嘅痛苦──罪惡感，呢一種精神上嘅痛苦為自己嘅過錯、為未來嘅擔憂，一直折磨住人。初民為咗解除肉身同精神上嘅痛苦，進入到神話嘅輪迴當中，望向神明、將自己消融到神明當中。
我哋可以問，神話嘅輪迴點樣解除初民嘅痛苦？神話嘅輪迴有咩變體？初民喺咩契機之下走出輪迴呢？走出神話嘅輪迴點解有可能為人帶嚟痛苦？呢四個問題就係我哋今集想解答嘅目標。
今集內容包括：
1. 初民點樣用苦痛原型同因果業力去理解苦痛嘅源頭
2. 以大時論去縮細人嘅痛苦
3. 現實嘅殘忍，世界慢慢走向天啟末日嘅絕望當中
4. 羅馬突破一切嘅絕望，宣告住輝煌嘅「永恆之城」
5. 聖奧古斯丁點樣用「上帝之城」取代「永恆之城」
6. 信仰點樣要人直視歷史
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2022-11-2633 min
牛哥講經丨廣東話哲學、書籍分享S2EP6 古人對時間嘅理解同你差天共地？睇下初民點解放棄歷史，進入時間輪迴｜時間與反覆｜《宇宙與歷史：永恆回歸的神話》（二）歡迎你返到嚟第二集嘅《宇宙與歷史》，主題係「時間與反覆」。上集講咗初民嘅四個預設，今集就要講講喺呢四個預設之下，初民點樣放棄歷史，進入到時間輪迴當中。
點解時間係一個循環？因為宇宙雖然係神明嘅造物、分享住神明嘅完美，但呢個完美會自然衰敗，就好似四季嘅流轉。神話以一個原型解釋住一切事物嘅起源、成長、巔峰、衰落嘅週期性發展。從起源到衰落，又必定會回歸到起源，又再到衰落，周而復始，彷彿永不止息。循環嘅模型之下，有超自然嘅存在者、神話嘅英雄會負責成就、整頓宇宙嘅秩序，而宇宙亦會因為英雄嘅失去而落入失序。
初民嘅視角專注於呢個美好嘅原型，一方面透過反覆呈現、實現原型，一方面將具體嘅現實時間——即係歷史，置諸門外，抗拒歷史、棄絕歷史。
透過理解初民對時間嘅理解，或者可以令你窺探一下點解初民會接受飄渺嘅神話，明明活喺時間嘅反覆，但又好似活喺樂園當中。現代人從時間嘅反覆當中逃脫出嚟，但又喺歷史嘅進程當中感到被時間嘅長河拋棄。透過神話同歷史，我哋一齊思考時間。
內容包括：
・初民將時間分成神聖同世俗
・睇下一位人類學家點樣搵出傳說嘅誕生，同歷史事件會雷同定有重大差異呢？
・歷史上嘅英雄同神話嘅關係
・歷史事件、個體性同儀式之間嘅關係
・時間係點樣反覆？
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2022-11-2033 min
牛哥講經丨廣東話哲學、書籍分享S2EP5 進入神話原型視角，理解古人點解咁「迷信」｜原型與模仿｜《宇宙與歷史：永恆回歸的神話》（一）現代人好習慣留意到時間嘅線性特質，今日係星期三、上一個月係九月、下年係2023年，今年嘅2月20日同2024年嘅2月20日會係兩個截然不同嘅日子，歷史總係有住條理，無處含混。但唔知你會唔會覺得好奇怪，有一啲地區嘅神話往往會重複一段神話故事去解釋四季嘅輪轉，每年嘅冬天就係女神被捉走／神明被殺死，春天就係女神被救返／神明又復活。現代人一睇就會覺得荒謬，點會年年都重覆一樣嘅故事呢？其實荒謬，係源自於我哋用歷史視角嚟判斷。而你有無諗過，人類只係最近先擁有歷史視角？
喺擁有文明之後，大部份時間之下初民（喺文明開初、被神話籠罩嘅古人）都會用神話去否定歷史、時間嘅進程，進入一場「永恆回歸的神話」。對比現代人同初民對時間嘅理解，就係耶律亞德嘅《宇宙與歷史：永恆回歸的神話》想達到嘅目的（所以呢本書嘅副標題本來係「歷史哲學導論」，只係為咗避免狂妄先就此作罷。）
耶律亞德認為古代社會意識到「歷史」，但會用盡一切努力去抹殺歷史。而初民會以神話作為原型，即係將神話視為一個model（模型、模範），作者稱之為神話原型。而喺原型之下會形成一個神聖嘅循環，令初民活喺循環當中。
我會用三集去講講呢本《宇宙與歷史》，次序係：原型與模仿、時間與反覆、唯一與進程。
而今集「原型與模仿」就係要同你一齊進入初民嘅視角，睇睇佢哋眼中嘅原型與模仿。你可能會驚訝，唔同文明之間嘅原型嘅相似，難以用巧合嚟解釋。亦只有理解初民嘅神話原型，先可以令我哋放低現代人嘅視角，重新返到初民嘅視角，睇下佢哋點解會睇落咁迷信，同埋接受時間嘅輪迴。
內容包括：
・地上嘅一切原來都係模仿天上原型
・對中心崇拜，原來同天堂地獄有關
・解釋初民點解會喜愛中心，有住「文明中心主義」
・朝聖之路或者儀式都係一種參與神聖，作為對原型嘅模仿
・其實你每星期都經歷緊呢種模仿
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2022-11-1328 min
牛哥講經丨廣東話哲學、書籍分享【諗諗下唔對路】「我思故我在」聽落好勁，原來呢個笛卡兒哲學嘅第一原理係推唔出其他知識，仲要一早有人講過？｜《被誤讀的哲學家》歡迎你嚟到牛哥講經嘅新系列，「諗諗下，唔對路」。呢個系列會用一啲唔對路嘅疑問作為起點，然後一步一步得出一個對路嘅答案。
問你一個簡單嘅問題，邊個開創咗西方嘅近代哲學？畀三秒時間你……三、二、一。無錯，就係大名鼎鼎嘅笛卡兒。因為佢用一套徹底嘅懷疑論去得出一句最為人熟悉嘅哲學標語——「我思故我在」。但如果我哋去檢視笛卡兒嘅懷疑論，就會輕易發現「我思故我在」並無帶嚟太多嘅創新，因為早喺公元四世紀，聖奧古斯丁就已經講過類似嘅說話。
笛卡兒嘅著名，更大可能係因為得出「我思故我在」之後嘅推論太過薄弱，所以受到大量批評。可以話，笛卡兒唔係因為哲學上嘅成就而被人記住，反而係因為哲學上嘅失誤而被人記住。
但係，點解笛卡兒講嘢會又唔係原創、又推得薄弱？因為佢嘅主業根本唔係一個哲學家，而係一個科學家，佢好可能唔會介意呢篇六日沉思編合而成嘅《沉思錄》被指責，佢更在意成功同牛頓battle 數學成就、發表自己嘅科學見解。歡迎你嚟到《被誤讀的哲學家》，今次我會為你講講點解好哋哋一個科學家，會被人以哲學家嘅身份記住。
今集內容包括：
・簡單講講笛卡兒嘅懷疑論方法
・聖奧古斯丁同笛卡兒嘅類同
・笛卡兒對上帝有住勉強嘅論證，但又抱以堅信嘅態度
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2022-11-0218 min
牛哥講經丨廣東話哲學、書籍分享S2EP4 人類點解咁少毛？裸體係爲乜？從動物學角度分析人類性行爲｜《裸猿》（下）從動物學家嘅視角嚟睇，智人係裸猿。但係，點解裸猿要咁特別、裸咁多呢？今集，我哋繼續講講《裸猿》。
如果我哋將視角放大啲，去睇下現存嘅4237種哺乳類動物，差唔多全部都有具保護作用嘅皮毛，只有好少喺無毛皮嘅覆蓋下生存。哺乳類嘅遠古祖先固然係爬蟲類（爬蟲類無乜毛皮），但哺乳類身體結構已經非常唔同、變得好依賴毛皮。因為哺乳類演化成恆溫動物，即係體溫維持恆定、同時較高體溫（就好似人類嘅正常體溫係36、37），咁就可以有一個比較高嘅代謝率，換取更強嘅生理能力。一層毛鬙鬙嘅皮毛，就能夠有效隔絕溫度嘅散失。喺豔陽之下，又可以防止體溫過高、避免太陽直曬所造成嘅皮膚灼傷。
有人曾經喺沙漠做過一個實驗，結果證明着輕便嘅衫可以減少水份嘅蒸發，因而減少體溫嘅流失；另外，同裸露嘅身體比起嚟，身體吸收嘅熱量亦都減少左55%。可見遮蓋身體喺高溫環境下嘅重要。阿拉伯人就好明白遮蓋身體嘅重要，佢哋會偏好着嗰啲質地好厚嘅寬鬆罩袍喺沙漠度行。
咁點解有動物要放棄呢個又可以保溫唔驚凍、擋熱唔怕曬嘅體溫調節工具？
多數係為咗適應一個嶄新嘅環境，好似蝙蝠為咗飛上天而減輕體重；穴居嘅哺乳類，例如裸鼹鼠、土豚、犰狳，長年都唔需要出現喺地面，就放棄皮毛；水生哺乳類，好似鯨魚、海豚、海牛、河馬都係為咗身體變為流線型，咁樣可以方便游水。但係，對於典型嘅地表生活嘅哺乳類嚟講，基本上都有濃密嘅體毛。作者給予嘅結論係：
「撇開像是犀牛和大象這些在身體調溫方面有問題的異常大型動物之外，在數千種長滿濃密體毛的陸棲哺乳動物當中，全身無毛的裸猿算是獨一無二的例子。」（頁37）
咁到底裸猿係為咗穴居定係水棲，定還是係因為獨特嘅裸猿生活方式？
喺今集你會搵到答案。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2022-10-2322 min
牛哥講經丨廣東話哲學、書籍分享S2EP3 智人點解咁特殊？動物學家研究猿人起源，發現咗演化上嘅關鍵分別｜《裸猿》（上）今次要為大家講嘅書係一本動物學家寫成嘅書——《裸猿》。
我哋喺第十四集講美國女最高法院大法官金斯伯格回憶民權運動嘅時候講到西方喺六、七十年代仍然有唔少男尊女卑、認為黑人低人一等嘅餘韻，而《裸猿》嘅英國作者德斯蒙德·莫利斯居然喺1967年寫咗呢本將「智人」稱為「裸猿」嘅書（下文嘅人、智人、「裸猿」都係同樣意思），可謂語不驚人死不休。當時嘅世界對基因、遺傳學依然非常保守，而書中嘅觀點到今日睇嚟依舊前沿。
由於呢本書嘅破格，即使呢本書只係用咗四個星期寫出嚟、加上已經出版咗50年，喺2012年嘅《新科學家週刊》列出嘅十大最具影響力嘅科普書當中，《裸猿》仍然排名第六（本書，頁11），莫利斯所產生嘅迴響之大，可想而知。
呢本書開宗明義寫明係一本針對一般讀者所寫嘅書，所以無引用到學術文章，莫利斯解釋到：
「我多年來一直都在學術圈裏打滾，但是當我意識到這些大部份工作背後的意義，是這些科學家們將難以理解的無聊議題，用來顯示地位時，我便拒絕再玩。他們已經不覺得溝通有其重要性，反而去參與了一場與學術競爭而不是與傳播理念相關的遊戲。我所要做的就是告訴人們，我是如何看待人類的，所以我用最簡單、最容易理解的語言來寫作，就好像我是和別人在聊天，而不是在講課。」（本書，頁19）
呢本250頁嘅書係運用咗6頁嘅參考書目，可謂一本別具匠心嘅科普書藉。
適逢我由老子講到「自然狀態」同孔子嘅人倫，咁就一齊同大家講講一個動物學家用簡單語言講述嘅對除低文明嘅華衣嘅智人（「裸猿」）嘅研究成果，去反思「裸猿」嘅行為模式、反應模式點樣無聲無色咁影響我哋嘅生活。今集內容包括：
・簡單講講典型靈長類同肉食動物嘅演化邏輯
・智人揀咗一條九死一生嘅演化路線，但明明靈長類生活喺森林活得咁寫意，點解走咗條同典型靈長類唔同嘅路？
・智人點成為一個狩獵者，得以同肉食動物競爭？
・作者話，智人嘅優勢在於長期嘅幼體階段，就算將智人嘅大腦畀黑猩猩，黑猩猩依然係一隻黑猩猩，此話何解？
・人嘅大腦要去到幾多歲先完全成長？答案可能係你意想不到
・人有人所專屬嘅跳蚤，有咩意思？
希望你聽完呢本書，會對儒家所講嘅人倫、荀子講嘅性惡，有更多嘅反思。亦可以了解到智人同其他動物嘅不同之處，點解會係演化上嘅特殊案例。
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2022-10-1636 min
牛哥講經丨廣東話哲學、書籍分享S2EP2 戈巴卓夫點樣喺蘇聯落實改革？仲可以同冷戰敵人握手言和？｜《戈巴契夫冷戰回憶錄》（下）今集，會同你講講戈巴卓夫點樣從內政同外交方面着手，喺最冰冷嘅國度，伸出溫暖而堅實嘅友誼之手，去落實新思維。繼續講講《戈巴契夫冷戰回憶錄》。
上集大致講咗戈巴卓夫對新思維嘅諗法，呢個口號嘅提出本身雖然唔容易，但若然要實行出嚟更係艱難處處。
改革，意味住將舊有制度改變。而蘇聯作為一個如此巨大嘅聯盟，對內要應對加盟國對改變嘅反應，對外同維持幾十年冷戰狀態嘅潛在敵人──美國嘗試協商。每一個改變，都係牽一髮動全身，實在係如履薄冰。呢集就要講講佢點踏出改革第一步。內容包括：
・戈巴卓夫為改革撤換資歷深厚嘅外交部部長
・戈巴卓夫喺1986年對世界局勢嘅評論
・蘇聯同加盟國嘅關係改變
・戈巴卓夫同雷根嘅首次切蹉
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2022-10-0922 min
牛哥講經丨廣東話哲學、書籍分享S2EP1 蘇聯最後領導人戈巴卓夫點解要推「新思維」，搞到蘇聯解體？｜《戈巴契夫冷戰回憶錄》（上）牛哥講經依家有埋YouTube喇！有興趣記得去睇！
今集，要同大家講講親手結束冷戰、解散蘇聯嘅男人——戈巴卓夫嘅自述。呢一本書係《戈巴契夫冷戰回憶錄》（戈巴契夫係台灣譯名，我會用返戈巴卓夫）。 戈巴卓夫係一個傳奇人物，佢喺1931年出生於農民家庭，經歷過1932年蘇聯大饑荒，妻子係莫斯科國立大學哲學系學生，最為人熟知嘅，當然就係佢係最後一屆蘇聯共產黨中央委員會總書記（1985年3月15日－1991年8月24日）。戈巴卓夫不斷推行「改革重組」同「新思維」，令蘇聯開始同西方建立和平關係，仲因此喺1990年得到諾貝爾和平獎。政治上嚟講，佢將一黨制嘅蘇聯，推向西方嘅多黨制、總統制。而佢亦喺政制改革之後，成為第一屆同最後一屆蘇聯總統（1990年3月15日－1991年12月25日）。
喺佢總書記同總統嘅任期裹面，見證住美國同蘇聯放棄軍事競賽、東西德統一、1991年12月26日嘅蘇聯解體，象徵冷戰嘅徹底結束。而蘇聯嘅解體，可以話注定近年俄羅斯同烏克蘭嘅衝突。到底戈巴卓夫係咪蘇聯解體嘅罪人呢？
戈巴卓夫嘅「改革重組」同「新思維」並唔係以蘇聯解體作為目標，但係佢的確給予咗蘇聯解體嘅可能。2006年，喺戈巴卓夫75歲生日嘅時候，曾經有記者問佢：
「如果您上臺時不著手後來您所謂的改革重建，現在會幹什麼？」
戈巴卓夫答：
「仍當著蘇共中央總書記！在我執政的時期，體制也還是足夠穩固的。」
點解要放棄穩固嘅體制，以地球最大嘅國家冒險去「改革重組」同推動「新思維」？呢本《戈巴契夫冷戰回憶錄》，就係戈巴卓夫自己去回憶作為蘇聯總書記同總統嘅經歷同諗法，你可以喺當中得到屬於戈巴卓夫嘅答案。佢嘅視角所陳述嘅世界，可能會同你有所不同，但你可以了解到點解喺佢嘅任內會結束冷戰，同一個蘇聯高層改革者嘅視角。
戈巴卓夫仲為呢本書嘅中文版寫咗個序，日期係2022年3月。而佢本人喺2022年8月30日因病離世，享年91歲。依家，或者係一個好好嘅時機去檢視呢位改變世界嘅政治家。今集內容包括：
・簡述蘇聯內部對新思維嘅睇法
・回憶核畫面對戈巴卓夫嘅震撼
・藉由甘迺迪遇刺顯示改革難關
・承認新思維同舊意識形態衝突
_____
Instagram： @cowgortalk
YouTube：讀物農莊 Anybooks Farm
Patreon：patreon.com/cowgortalk
文字版：cowgortalk.wordpress.com2022-10-0218 min
牛哥講經丨廣東話哲學、書籍分享EP47【特備節目】史上最難DSE文言文？究竟「藏天下於天下」即係點？｜《2022DSE中文閱讀卷：文言三則》，莊子哲學今集係特備節目，我會講講2022年DSE中文卷卷一嘅三篇文言文所涵含嘅莊子哲學思想。
今年嘅DSE 中文卷卷一，居然全份卷（白話文同文言文）都一齊考哲學嘅文章，而牛哥仲貼中咗文言文嘅文章，因為有聽眾喺心事解難問過，如果你想聽返，可以去返 EP25 嘅 51:40。
我哋會一齊嚟睇下2022年考咗嘅三篇好短嘅文言文當中嘅意思，呢三段文字雖然短，但係好能夠揭示當時知識份子討論緊嘅問題，亦好好咁對應我哋近排嘅集數。
呢次DSE考咗楚共王遺弓、荊人遺弓、莊子〈大宗師〉三篇文，出卷嘅人好明顯對老莊有啲理解，否則出唔到三篇咁連貫嘅文章，可惜嘅係，我認為出卷嘅人嘅注釋顯示住佢錯解莊子，當然，咁可能係因為要令到熟讀範文〈逍遙遊〉嘅學生去好快知道篇〈大宗師〉講咩。我就借呢個機會同大家一齊去睇下莊子嘅思想，睇下「泉涸，魚相與處於陸，相呴以溼，相濡以沫，不如相忘於江湖」點樣顯示住莊子對生死、天地、轉化嘅睇法。
如果你係未考DSE 嘅中學生，我有少少說話想同你講。我講嘅內容係超出考評局嘅範圍，我甚至會指出考評局嘅詮釋係錯，所以可能同你喺學校學到嘅資訊唔同，對你嘅卷一未必有幫助。但我仍然希望你會願意聽落去，因為莊子嘅哲學係討論人生嘅哲學，係值得細讀、值得用一個系統去讀。有機會因為DSE 而讀到莊子係一個幸福，但如果讀莊子只係為咗DSE 咁就會好可惜。
而如果你係已經考完DSE／唔需要考DSE嘅聽眾。咁就請你同我一齊用幾個字嘅時間，去忘記有形嘅形驅，一齊進入到莊子嘅夢鄉。今集內容包括：
・教授重要嘅DSE睇文言文方法，用圖表為你解釋楚共王、孔子同老子嘅分別
・莊子話生命只係氣聚氣散，咁人要點樣面對？
・原來「相忘於江湖」個「忘」字唔止係忘記嘅意思
・用〈逍遙遊〉範文理解「與其譽堯而非桀，不如兩忘而化其道。」
・「魚相與處於陸」其實同《莊子》全文一開始所講嘅鯤鵬寓言有關
・我話「DSE考卷將山注為舢板，將「藏大小有宜」改為「藏小於大有宜」，咁當然係錯改文意」
・我哋往往唔明莊子嘅說話、覺得佢講嘅係神話，但其實要有開放心靈先能夠明白佢嘅深意
・莊周夢蝶，有咩寓意？
・莊子話死亡係「懸解」，係咩意思？
・我最後總結出「楚共王係藏弓於楚，孔子係藏弓於人，老子係藏天下於天下。」到底點解？
希望聽完呢一集嘅你，可以分辨到坊間對莊子一知半解嘅解說，我並唔係話佢哋有意去講出一個弱嘅莊子，只係佢哋未必有時間去細閱莊子。亦希望你聽完之後，有興趣去拎起《莊子》，睇下莊子廣大而連貫嘅世界。如果世界係一場夢，莊子會係你同遊夢境嘅好夥伴。
我為呢集作咗首詩，唔知你聽完呢集會覺得呢首詩點呢？
有為成心無為道
昨日喜怒今日忘
鯤潛鵬飛皆時機
蝶翩人遊一回夢
_____
Instagram： @cowgortalk
Patreon：patreon.com/cowgortalk
文字版：cowgortalk.wordpress.com2022-05-0958 min
牛哥講經丨廣東話哲學、書籍分享EP46 個個都講仁，唔通真係有仁咩？老子話天地不仁，有爲嘅政府只會壓迫人民｜《中國哲學史大綱》（四）胡適去編定中國哲學史嘅順序同大多數人都唔同，佢第一個介紹嘅唔係孔子，而係老子。可能係因為老子最早出現，亦可能係因為胡適認為老子嘅政治理念最能夠對應當時人民嘅哀嗚。佢更加形容老子嘅哲學係一個革命、係一種反動。
「在中國的一方面，最初的哲學思想，全是當時社會的現狀所喚起的反動。」（本書，頁五零）
哲學係對當前嘅解決方法提出疑問嘅精神。周人唔滿意帝辛漠視人民，提出反動。同樣，老子面對本應該回應上天嘅禮制，如今變成食人嘅禮制，唔滿意一個處處講禮義嘅社會之下，人民生活喺虛偽嘅壓迫之下。既然禮制變成依賴一個具道德意識嘅人格神所維持嘅強逼，老子去重新思考上天嘅時候，就提出一個無喜怒哀樂、自然嘅「道」作為萬物嘅根源，同時「道」成為思想嘅終極，推翻周初對天嘅理解。後嚟嘅思想家都變成「尋道者」，對道本身、同尋求道嘅方法作出唔同嘅詮釋。儒家以仁心作為終極、墨子以天志為終極，重新發展周初嘅道德人格神、法家將老子嘅無為逆轉……今集，我哋會嘗試顯淺咁講少少道嘅意思，同埋呢個道點樣回應時代，所以主要會講老子嘅政治哲學。內容包括：
・詩經用一個個無名詩人嘅詩句，去唱出春秋時期人民嘅苦況
・老子以「天地不仁」宣告禮制嘅喪鐘，好似西方嘅「上帝已死」一樣
・老子對「有」同「無」嘅關係作出分析，「無」係顥示住靈活嘅可能
・胡適指老子提出無為其實係因為「當時的政府不配有為， 偏要有為；不配干涉， 偏要干涉。」
・「『有為』只係一個過程，『無為』先係終極。」到底係咩意思？我會用獨狐求敗作為例子，你估唔估到點解？
（按：由於胡適講得有啲簡單，大部分對老子嘅補充都係我嘅詮釋，基本上呢次多數時間我都係合埋胡適本書嚟寫。）
_____
Instagram： @cowgortalk
Patreon：patreon.com/cowgortalk
文字版：cowgortalk.wordpress.com2022-05-0153 min
牛哥講經丨廣東話哲學、書籍分享EP45 「人文精神的躍動」：回帶睇下中國哲學嘅起源｜《中國人性論史》上集我哋對照完墨子同耶穌，今集我哋返到去諸子百家嘅世界。本來今集係要去講老子，但我想先為大家補充一下老子面對嘅時代背景，所以我今集會以徐復觀嘅《中國人性論史》作為補充，去講講周初嘅思想。
你可能會覺得，周初嘅思想咪就係封建禮制。其實，如果我哋去重睇周文王同周公嘅講法，就會發現周人去反抗商朝，係因為對人民痛苦嘅憂患，後嚟建立禮制，並唔係用嚟限制人，反而係一種解放；禮制，係周人對於商朝崇拜宗教嘅哲學反省，將天嘅地位拉低，重新將視角放返到去人嘅身上。如果要講中國哲學嘅起源，就唔能夠唔了解文王同周公嘅諗法。徐復觀更認為，周初嘅思想，係中國人文精神嘅躍動。換句話說，中國人文精神唔係始於老子、孔子，而係始於周朝開國。
只係，周初嘅哲學思維仲未成熟，當中嘅一個缺憾令到呢一套原本係以民為本、解放嘅思想，慢慢變成天子無力控制天下、禮制壓迫人民、諸侯混戰嘅血腥年代。面對住呢一個背景，先引發到老子用一個否定嘅態度去對禮制作出「反動」；孔子用一個肯定態度，承先啟後，嘗試將周初唔成熟嘅哲學思維改善、將缺憾解決。如果唔了解周初嘅哲學思想，咁只會對老子、孔子嘅思想一知半解。今集會用一個鐘嘅時間，為你完整講講中國哲學嘅起源。內容包括：
・商朝嘅時候，人都認為天命不可逆，但周文王提出，人只要努力就可以改變命數
・周文王嘅自覺嘅憂患，令到佢得以憤發，用以人為本嘅哲學回應商朝嘅宗教迷信
・商朝係宗教氣氛最濃厚嘅朝代，視天為終極。周人就用「敬」字將天嘅地位拉低
・天唔再係主宰一切、只為祭祀喜悅嘅天，而係一個為平民幸福而感到喜悅嘅上天
・周初嘅禮，原來只係祭祀，但原來有另一個字顯示周初禮制其實係為咗教育德行
・周初禮制有一個缺憾，令到本來理想嘅制度變成後嚟虛偽但無人能夠停止嘅野獸
一齊聽下，周初嘅先進，點解會造成春秋面對住「率獸食人」嘅禮教，然後我哋先會明白老子對禮制作出反動宣告當中嘅意義。
_____
Instagram： @cowgortalk
Patreon：patreon.com/cowgortalk
文字版：cowgortalk.wordpress.com2022-04-2551 min
牛哥講經丨廣東話哲學、書籍分享EP44【特備節目】耶穌帶頭搞事，最後因叛亂罪被判死刑｜《革命分子耶穌》喺上一集，我哋提到墨子喺春秋呢一個諸侯混戰嘅時候，抱持一個宗教感應嘅心，以天志作為根源。從墨子嘅苦難同真正改變當時戰局嘅能力，我哋就可以知道宗教嘅力量可以去到幾大。或者，你可以叫墨子做「中國耶穌」。適逢依家接近復活節，用呢一個中國嘅宗教家去對照西方嘅耶穌，會相當有趣。所以，今次要講嘅書係《革命分子耶穌：重返拿撒勒人耶穌的生平與時代》。
墨子同耶穌都係雅士培喺《歷史的起源與目標》提到「軸心時代」嘅人物，「軸心時代」表示世界各地喺公元前8世紀到2世紀之間，都有革命性嘅思想改革，而喺公元前後，一啲影響力可以去到二千年後嘅今日嘅思想家好似雨後春筍咁喺同一個時期出現。
中國進入諸子百家時期回應行將就木嘅周朝封建、印度有釋迦牟尼回應婆羅門教嘅祭司、希臘有柏拉圖思考民主、耶路撒冷有耶穌去回應腐敗嘅猶太聖殿（雅士培甚至為此寫咗本《四大聖哲》），呢四個文明嘅思考結果看似唔同，變成儒家、佛教、西方哲學、基督教，但其實佢哋有一個同通點，就係佢哋不約而同都係回應原本當地嘅階級制度，都係變革嘅思考。
要了解當中嘅變革，就必然要了解佢哋嘅時代背景，就好似《孔子大歷史》咁，而《革命分子耶穌》嘅作者，雷薩・阿斯蘭都同樣係想重構耶穌身處嘅時代，甚至將歷史中嘅拿撒勒人耶穌同信仰上嘅耶穌基督分開。
「經過這二十年對基督教起源的嚴謹研究，今日我有信心說，我對耶穌的信從要比過去更為忠實，只不過我現在信從的是拿撒勒人的耶穌，而非耶穌基督。我希望本書能以我當初傳布基督故事的熱忱，來傳布歷史上的耶穌的福音。」(p.16)
作者想將耶穌褪去神化嘅形象，嘗試唔用耶穌係神嘅諗法嚟理解耶穌，單純當耶穌係一個人，而呢一個耶穌唔需要係神，只當佢係一個人都已經係一個極為動人嘅人。
「耶穌以猶太農民與革命分子之姿，挑戰世界有史以來最強大的帝國而失敗的形貌，在我心中反而比教會塑造的超然絕塵形象更為真實。」（p.2)
耶穌身處喺身處嘅耶路撒冷係一個等待革命到嚟、等待天啟末日嘅猶太地區，猶太歷史不斷同羅馬交錯。佢面對住眼前嘅一切不公，選擇一個人對抗猶太祭司以祭祀去聯同羅馬人剝削猶太人嘅荒謬、以一人之力去公然反抗當時最強大嘅羅馬帝國，無懼十字架嘅下場。同當年起義反清、埋於黃花崗嘅烈士一樣，為民族而犧牲自己嘅精神一樣，令人敬佩。內容包括：
・我會邀請你想像你係二千年前嘅猶太人，見證猶太悲苦嘅百年歷史
・解析猶太民族喺羅馬統治下嘅苦況，窮人點解潦倒、聖殿點被褻瀆
・龐培、凱撒、奧古斯都、提庇留、尼祿、維斯帕先穿插喺猶太當中
・猶太民族多次反抗羅馬，企圖靠住熱誠同信仰去再建立猶太人嘅國
・猶太有唔少自稱係彌賽亞嘅人、行奇事者出現，耶穌只係其中一個
・耶穌細佬雅各同保羅對耶穌理解唔同，依家基督教被保羅深深影響
・耶穌死後復活之後三十年，耶路撒冷被夷為平地，改變所有猶太人
・保羅將基督教同希臘文化融合，最後成為羅馬國教，同猶太教分裂
歷史中嘅拿撒勒人耶穌被厚重嘅歷史掩埋，今集，我哋一齊解構歷史中嘅耶穌，或者你會因此對信仰中嘅耶穌基督，有另一重嘅睇法。
_____
Instagram： @cowgortalk
Patreon：patreon.com/cowgortalk
文字版：cowgortalk.wordpress.com2022-04-181h 09
牛哥講經丨廣東話哲學、書籍分享EP43 墨家好似宗教組織？墨子講天講鬼講兼愛，其實都係爲咗實現尚同社會｜《中國哲學史大綱》（三）墨子雖然又有科學精神、又講邏輯，但其實佢諗法之中嘅宗教成份好重，依賴住天志，令佢可以奉獻個人俾天下、喺刻苦當中去品嚐甜美。呢層就唔知道係唔係因為墨子對於宗教嘅感召好大，定係佢因為當時嘅社會背景而借用宗教去將理念實踐。墨子以天志、兼愛、非攻、明鬼、非命、節葬、非樂、尚賢、尚同，簡單兩個字嘅概念，就對應時弊、對照出每一個尋常百姓卑微嘅仁心，呢個就係墨子對百姓困苦嘅體察、呢個就係墨子喺諸侯以外去建立一個追求和平嘅勢力嘅基礎。呢一集，我哋一齊用系統理解一下墨子由宗教感動而嚟嘅思想。內容包括：
・先講講天志嘅內容
・再講兼愛嘅實際用途，係對兼併嘅根本解決方法
・非攻係因為有利，攻打人哋國家往往無利
・墨子講利，其實係一種樂利主義
・明鬼睇落迷信，但原來有教化作用
・墨子講天志、兼愛都唔係佢被君王抹殺嘅原因，而係因為尚同，尚同思想令到大一統王朝唔必然存在
・講講天災同政治嘅關係，天災往往唔會消滅一個朝代，而係反映一個政府嘅能力
・仁心，係比難事更難嘅事
內容節錄：
「我哋可以見到陽文君認為自己係替天行道，所以咁就係義嘅行為。但墨子指出，替天行道其實只有兩個可能性，一，係唔相信天但以天嘅名去打人； 二，相信天而又話要替天行道只係好似幫鄰居教訓個仔，多管閒事。而陽文君即使義氣凜然咁講出替天行道，仍然只係講出義嘅名，而唔知道義嘅取。」
「天只係人兼愛嘅根源，鬼神只係賞善罰惡嘅保證。天無論幾想人去兼愛，鬼神就算點保證果報，路都係由人自己行出嚟。胡適總結得好好，「禍福全靠個人自己的行為，全是各人的自由意志招來的，並不由命定。」（本書，頁182）正正因為咁，墨子先相信人有能力去改變睇落無可能改變嘅嘢，社會依家睇落好混亂、好多戰爭？墨子或者會同我哋講社會只係由好多個自由意志組成，每一個自由意志都有可能兼愛，咁社會亦有可能兼愛，所以混亂唔係命定，人一定有能力改變，呢個係墨子給予人嘅信心。」
「而墨家嘅思想的確好能夠可以好似教會咁深入到當時平民百姓嘅心，因為無論咩國強咩國弱都好，只要一日國與國之間仲有戰爭，直接受苦嘅一定係平民百姓，貴族發起戰爭，但犧牲嘅就係平民。墨家嘅「非攻」思想最受惠嘅就係平民百姓，咁平民百姓愛好、投身到墨家當中就唔難理解。亦正正因為墨家嘅影響力咁大，所以墨子先可以同楚王「講數」。墨家，因為緊貼當時人民嘅苦楚，成為諸侯（政治勢力）以外嘅宗教力量，有住赴火蹈刃嘅弟子去守備弱國，呢一個以卵擊石強逼我哋去思考：如果北宋行政良善，咁又點會有梁山泊上嘅一百零八個好漢呢？墨子面對一隊隊軍隊所築成嘅高牆，選擇走到當時無知無助嘅百姓面前，阻止軍隊去蹂躪弱小。呢一種行為唔通唔係仁心嘅表現咩？我嘅問題係，同墨子同時代嘅人，仲有邊個比墨子更能夠表現出仁心呢？」
_____
Instagram： @cowgortalk
Patreon：patreon.com/cowgortalk
文字版：cowgortalk.wordpress.com2022-04-101h 04
牛哥講經丨廣東話哲學、書籍分享EP42 墨子因愛孔子而反儒家？睇下墨子點帶領春秋時期最大嘅黑社會同楚王講數｜《中國哲學史大綱》（二）喺《中國哲學史大綱》入面，主要就講咗儒道墨法。喺呢四家當中，依家嘅人最唔熟悉嘅，應該就係墨家。但其實喺春秋戰國時期，墨家係非常著名，孟子形容：「天下之言，不歸楊，則歸墨。」意思係當今天下嘅言論，唔係討論楊朱，就係討論梗墨子，楊朱係為我主義，我哋有機會再講，今集我哋要講嘅，係為我主義嘅相反－－講兼愛嘅墨子。我哋喺EP38講儒墨之別嘅時候，有提過墨子就好似一盞照亮天下嘅聚光燈，大家有無諗過呢一盞燈點解要咁辛苦去照亮天下呢？點解要苦口婆心對天下人講「非攻」、喺春秋戰國嘅諸侯國互相兼併嘅時候去說服國君唔好打其他國家呢？
如果用政治光譜去理解墨子嘅兼愛，咁墨子就非常之左，甚至可能會左到被人稱為左膠，但呢個左膠有春秋時期諸子之間嘅最強動員能力，唔單止有理想，仲有實牙實齒嘅實力。「講機械叻過魯班、義字當頭、為人哋國家趕十日十夜路、用比喻說服楚王唔好打人、有能力同弟子去守一座城池，對抗一個國家嘅軍隊、靜靜做事唔張揚、談論天下，呢一個，就係墨子。」手下嘅弟子個個願意捨生取義，「墨子服役者百八十人，皆可使赴火蹈刃，死不還踵。」《淮南子・泰族訓》如果要我將墨子去類比金庸當中嘅角色，就會係郭靖，為咗天下放棄一切個人私利、兒女私情，頭也不回咁去襄陽抵禦蒙古南下，呢一種嘅「俠義」精神，就係墨子精神嘅體現。
即使墨家呢個名已經從我哋嘅日常當中消失，其實佢嘅內容、精神仍然一直流傳至今，只係我哋好易忽略咗。我哋就要用兩集嘅時間去為你講講墨家嘅關懷、動人之處，而墨家嘅哲學態度好重，去求出個分別。今集內容包括墨子嘅背景同埋墨子哲學中嘅應用主義：
・墨子嘅哲學係一一對應住儒家
・其實墨子反對嘅只係僵化嘅儒家，佢個人係尊重孔子
・墨子以大禹為目標，大禹即係點？
・一齊睇下墨子點樣一個人同楚王講數，阻止楚王攻打宋國
・就算孟子同莊子唔同意墨家，仍然要稱讚墨子為人
・應用主義意思係「一個好嘅理念，一定係一個可以應用出嚟嘅理念」，到底咩意思？
墨子：
「......但宋國何罪之有？楚國明明有大把地但唔夠人，打仗就會令本身嘅唔夠人再減少（因為會戰死），爭奪一啲本來就有多嘅嘢，唔能夠話係有智（智慧）。宋國無罪但楚又打佢，唔能夠話係有仁。知道楚要打宋又唔阻止，唔能夠話係忠。試過阻止楚王但阻止唔到，唔能夠話係強。依家你嘅義話唔可以殺一個人但可以殺一個國家嘅人，咁唔能夠話係知類（知道分寸）。」
「有朋友問墨子：「呢個天下嘅人都唔行義，你自己一個咁辛苦行義做咩啊？不如算啦。」墨子就話：「依家有十個人，九個喺度hea，一個喺度耕田，｛咁耕田嗰個應該點做？｝耕田嗰個就唔可以唔努力啲。點解？因為食嘢嘅人多，而耕田嘅人少。依家天下唔行義，你應該支持我去行義，點解要阻止我呢？」」
_____
Instagram： @cowgortalk
Patreon：patreon.com/cowgortalk
文字版：cowgortalk.wordpress.com2022-04-0549 min
牛哥講經丨廣東話哲學、書籍分享牛哥三個字｜活下來牛哥講經嘅新系列──牛哥三個字正式推出。避免長篇大論，以十五分鐘去同你講講唔同嘅主題。牛哥三個字，細訴人間事，今集同你講講一件心事。
呢一次有一位聽眾講咗一件深刻嘅感想，係努力過後感到嘅疲憊感，甚至突如其來有一陣想尋死嘅感覺。我諗呢種諗法，好可能會引起唔少人嘅共鳴，因為我哋或多或少都想尋覓人生嘅意義，想去填滿自己心靈，然後一次次落空，感到虛無。
「我哋都想去腳踏實地，只係搵嚟搵去，發現自己就好似身處喺一隻喺太平洋飄流嘅船仔，你知道太平洋嘅中心係連魚都唔多條，上望住無垠嘅天空，眼前係茫茫嘅大海，每晚有明月伴你、每朝太陽由東方升起，而你經歷過日日子子之後，知道一切都係遙遙無期，你甚至唔記得自己喺邊度出航，唔知道咩方向可以返去、唔知道咩方向可以前進
…
現實話俾我哋知，當初嘅「目的地」，只係一個又一個嘅中轉站，所以一次又一次嘗試前往「目的地」，只係一次又一次到達中轉站。更慘嘅地方係，你唔知呢個中轉站下一站要去邊。最慘嘅係，你甚至唔知道依家呢個中轉站啱唔啱方向。然後你知道自己已經盪失咗路。」
我哋好想去尋覓一個目的地，但如果我哋一齊去思考一下目的地嘅意思，你就會發現要去尋找呢個目的地唔係一個逃避荒謬嘅方法，而係尋找目的地本身係一件荒謬嘅事。
如果唔去尋覓「目的地」，我哋要駛向何方呢？Stoic 話，我哋係呢個世界嘅旅人，有人遊走於書籍之間、有人遊走於運動、美食、思考......我話，你我都係巧合嚟到呢度嘅旅人。
「依家嘅太陽、地球、你我可以出現，都係需要億年前嘅聚變先有可能出現，你我，如果係巧合出現，都係星辰以億年嘅生滅先出現嘅巧合。
所以，你我，係億年嘅產物，去生活幾十年，然後喺千年以後消失嘅存在。」
「旅行嘅人無嘢會帶得走，旅行嘅人可以享受每一個夜晚。」
旅人，往往係孤獨，而其實孤獨並非我所獨有，孤獨係一個共相。牛某會繼續以牛哥講經，同諸君一齊孤獨。希望同你一齊渡過人生，然後到某日成為「歸人」。
希望你會喜歡呢集，亦會喜歡最後送俾各位嘅三個字。
_____
Instagram： @cowgortalk
Patreon：patreon.com/cowgortalk
文字版：cowgortalk.wordpress.com2022-04-0226 min
牛哥講經丨廣東話哲學、書籍分享EP41 胡勞之別，牛某插嘴：九成人都解錯克己復禮！｜《中國哲學史大綱》（一）上一本書，《人慈》足足講咗七集，就係想用西方哲學家同現代嘅科學考據去理解一下人性向善係咩意思。而你好可能會發現到我喺當中不斷滲入儒家、墨家嘅討論，因為其實對於人性向善與否，中國哲學一早就有討論，不過要講中國哲學就唔能夠抽空咁去討論一個問題，必先理解唔同學派嘅關係同每個學派自己嘅系統，哲學史就係一個好好嘅入手方向。
今次，我先唔從新儒家嘅書去討論，而係用一個民國好著名嘅思想家切入，一個擁有三十六個博士學位嘅人類。今次要為大家講嘅，係胡適嘅《中國哲學史大綱》。今集會同你講講胡適想喺呢本書做到咩、同埋勞思光對呢本書嘅睇法，加上我嘅回應。今集內容包括：
・勞思光點解會不停批評《中國哲學史大綱》
・胡適點理解哲學史・胡適點睇宋儒清儒
・勞思光點批評清儒嘅考據方法（同時批評胡適）
・牛某嘗試指出勞思光漠視考據嘅錯解，以勞思光對「克己復禮」嘅解釋同考據結果對比一下
「所以睇呢本書你會感受到當時嘅民國知識份子面對梗一個乜嘢社會環境。而正正係因為咁，胡適有時會用非常獨特同新奇嘅方式去詮釋諸子，例如話老子係反動派、易經嘅作用係演譯出禮、孔子原來唔留意個孝字而多講倫理、墨子係宗教教主同講樂利主義、莊子有生物演化論……」
_____
Instagram： @cowgortalk
Patreon：patreon.com/cowgortalk
文字版：cowgortalk.wordpress.com2022-03-2644 min
牛哥講經丨廣東話哲學、書籍分享EP40 復活節島滅亡之謎……｜《人慈》（七）上一集我哋講完農業同文明之間嘅關係，呢一集我哋用復活節島去反思一下文明同人類嘅未來。復活節島係講梗人自取滅亡嘅貪心，定係島民一直友好，而被外在侵擾而導致滅亡呢？今集內容包括：
・復活節島喺「災難預言者」口中，充滿暴力戰爭、飢荒、過量砍伐樹木、人食人，到底真相係咪咁呢？
・賈德．戴蒙嘅《大崩壞》，原來搞錯晒？
・「災難預言者」話如果智人唔改變，未來就好似復活節島咁因為智人破壞自然而滅亡，到底點解復活節島會滅亡？
・作者帶我哋睇下考古證據、航海日記，然後就會發現好多喺「災難預言者」口中嘅情況都係捏造
・作者話復活節島嘅滅亡原來係因為奴隸販同病毒，點解？
・最後反思，到底點解作者話人性向善係新嘅現實主義，並且總結EP.33-EP.40
引述一下最後嘅文字：
「愛唔能夠發電，但愛能夠照亮一處。當一個又一個人嘅仁心匯聚，就可以照亮一條街道、一個城市、甚至，呢個天下。
復活節島係一個悲劇，但係人類未來係一個可以改變嘅未來，唔需要承認向惡然後死裹復生。任何對文明嘅未來嘅判定，都係言之過早，未來係由人建構。文明作為潘朵拉盒子，係人類嘅工具，就算有壓逼不公諸如此類又如何，人就係有能夠去改善，憐憫係呢一切嘅根據。」
唔知你聽完呢個系列之後，會點感受呢段文字呢？點面對文明呢個潘朵拉盒子呢？
_____
Instagram： @cowgortalk
Patreon：https://www.patreon.com/cowgortalk
文字版：cowgortalk.wordpress.com2022-03-191h 07
牛哥講經丨廣東話哲學、書籍分享EP39 農業革命帶嚟文明世界，是好是壞？｜《人慈》（六）喺上一集，我哋提到農業似乎係一條分水嶺，喺一萬年前嘅農業之前，我哋搵唔到智人戰爭嘅痕跡，睇落智人喺農業之前係相對和平。而我哋喺ep.35提過，盧梭認為萬惡嘅根源係嚟自鐵同穀物，就係講梗農業嘅出現，令到爭奪、斂財、比較好似瘟疫一樣蔓廷。喺呢集就係要討論一下農業革命同文明嘅關係，內容包括：
・一萬一千年前，智人喺未有農業革命前就起到哥貝克力石陣
・農業革命前後嘅生活對比
・狩獵部落嘅行為好似有民主嘅影子
・農業同國家、奴隸、壓逼之間嘅關係
・文明係九千年嘅階級同近三百年嘅改變
聽完之後，或者你會問辛勤係一個美德呢一種諗法，到底係咪農業革命嘅結果？
_____
Instagram： @cowgortalk
Patreon：https://www.patreon.com/cowgortalk
文字版：cowgortalk.wordpress.com2022-03-1432 min
牛哥講經丨廣東話哲學、書籍分享EP38 你係幼犬人定殺手猿？｜《人慈》（五）上一集，我哋提到智人其實係幼犬人，友善、愛好社交，令智人有能力捱過冰河期，成為依家最後倖存嘅人類。今集，會先同你用科學啲嘅角度，去檢視一下友善嘅盲點、暴力係唔係智人嘅傳統、馬歇爾上校發現戰場上嘅士兵係好少開槍、用考古去再睇睇遠古嘅智人有無暴力痕跡。內容包括：
• 友善都有盲點，原來聽落美好嘅催產素喺帶嚟「自己人優先」，同時好似一盞聚光燈一樣，光照目標，忽視周圍。
• 以聚光燈比喻，比較一下儒家墨家嘅分別，原來墨家係「二本」，儒家係「一本」
• 介紹殺手猿理論，原來黑猩猩好兇殘
• 有數據顯示殺手猿理論仲適用於部落嘅人
• 殺手猿理論顯示暴力係人嘅天性，文明令人脫離呢種可怕，係唔係真呢？
• 作者邀請我哋睇睇戰場上嘅士兵係好少開槍嘅數據
• 挖掘戰場，發現半數本應只可以一次射一粒子彈嘅火槍入面，有兩粒或以上嘅子彈，你估下點解？
• 武器嘅發展原來顯示人類嘅討厭暴力，作者點解咁講？
• 最後檢視一下殺手猿理論嘅數據
• 除咗黑猩猩係同智人99%基因相似，原來仲有巴諾布猿都係99%相似，巴諾布猿係出名友善
• 一個人類學家喺支持殺手猿理論嘅時候，以有利自己嘅數據去立持自己立場，我話佢犯咗盲人凸字式盲撐，同時我再用karl popper去講講最出名哲學家都會犯呢個錯
• 農業革命之後嘅骸骨有戰爭傷痕，但之前有無呢？
• 有無發覺洞穴壁畫都只講捉牛而唔講打仗？
一齊嚟睇下，藉由考古數據嘅檢視，睇睇到底你係幼犬人，定係殺手猿。
_____
Instagram： @cowgortalk
Patreon：https://www.patreon.com/cowgortalk
文字版：cowgortalk.wordpress.com2022-03-081h 30
牛哥講經丨廣東話哲學、書籍分享EP37 人慈、人類大歷史與盧梭，從科學角度，彼此印證｜《人慈》（四）上一集我哋終於講完盧梭對人類演化嘅理解，由孤獨野人、到家庭野人、到部落野人、到高貴野人、到霍元甲、再到利維坦凌駕每一個人。今集，我哋就要由人慈同埋人類大歷史嘅考古發現去反思到底盧梭所講嘅人類起源啱唔啱呢？
我哋從考古發現當中，發現原來呢個世界以前除咗智人（我哋）之外仲有其他人種，當中，尼安德塔人有住比智人大嘅大腦、而對比智人bb 同其他動物嘅認知能力又睇唔出智人有咩出眾嘅地方，有啲方面甚至比黑猩猩仲要差，到底智人點樣喺脫穎而出、喺所有其他人種都消失嘅時候，一枝獨秀呢？今集內容包括：
• 對比智人、尼安德塔人同動物嘅天生能力，原來智人嘅天生能力無咩突出之處
• 以《人類大歷史》簡述唔同人種嘅此起彼落
• 《人類大歷史》提到智人經歷認知革命，構成虛構故事，有足夠能力驅趕其他人種，呢種係霍布斯式嘅自私嘅諗法
• 認知革命點嚟？哈拉瑞話：「我們無從得知」，《人慈》給予一個解釋----友善
• 以銀狐馴化實驗，顯示馴化唔單止令動物變得可愛，更係「可愛即無敵」，做到野外動物所做唔到嘅能力
• 智人，其實係幼犬人，友善嘅馴化後嘅人
• 幼犬人既鍾意社交、又鍾意學習，呢兩種能力都對應住盧梭，你醒唔醒得起？
到最後，多謝聽眾嘅疑問，我會一字一句為你解釋，到底人性向善係咩意思。下一集會同你一齊睇下人性向善之下，出現人做出禽獸不如嘅事又係點解。
_____
Instagram： @cowgortalk
Patreon：https://www.patreon.com/cowgortalk
文字版：cowgortalk.wordpress.com2022-02-281h 14
牛哥講經丨廣東話哲學、書籍分享EP36 【盧梭特集】野人生而自由，今人盡在枷鎖｜《人慈》（三）好多謝你願意了解更多盧梭嘅諗法，上集我哋提到盧梭同霍布斯對自然狀態有唔同理解。今集牛某會為你帶嚟全香港最清晰易明又詳盡嘅盧梭口中嘅人類演化故事，內容比較hardcore，但我認為好有意義，你會發現如果因為活喺一個只講霍布斯嘅世界而無聽到盧梭，其實人生會係一大缺憾。
我哋會一齊睇下野人點樣由無自由、到有自由、到高貴野人嘅幸福時間、再到霍元甲嘅時候被自由束縛。盧梭用呢個演化，強逼我哋重新看待自由，反思點樣使用呢個自由。無錯，呢個自由令我哋由本來同動物類同，變成今日嘅多姿多采、科技發達，只係有幾多個活喺現代社會中嘅人，活得出先祖嘅幸福快活？當日嘅自由，到今日有無變質？
盧梭有一句說話好出名Man was born free ,and he is everywhere in chains，好多翻譯會直接譯成「人生而自由，無處不在枷鎖之中」，但其實更準確咁譯個意思，應該係「野人生而自由，今人盡在枷鎖」，點解我會分個野人同今人呢?
原來盧梭認為野人因為反抗而得到自由，只係後嚟被文明所束縛，先會有枷鎖。如果你認識柏拉圖嘅洞穴比喻，盧梭就係解釋一個本來自由嘅人點解會走入漆黑嘅洞穴。你有無諗過，如果今人係奴隸，點解野人會放棄自由而為奴呢?
我哋需要睇清文明嘅雙面性，文明帶嚟舒適、便利，但同時係巨型嘅枷鎖。事物唔係非黑即白，文明嘅文化創新同毀滅自然係一體兩面，好似一蚊銀咁，一邊係女王頭，一邊係一字。去到最後，我會用一段共產主義奠基人對盧梭嘅Comment，去為你展現文明嘅雙面性。文明係一個潘朵拉盒子，令貪婪、虛偽、誹謗、嫉妒、痛苦遍及大地，但盧梭同時提醒我哋，仍然具有希望，希望在於人性嘅憐憫、同自我完善，儒家咁講，就係人嘅良知。
盧梭唔認為今人要返到去野人嘅自由，但又認為人唔應該受到束縛，對於擺脫利維坦嘅控制，盧梭就提出一個公民社會，但如果我哋唔明白盧梭嘅人性觀，就唔會明白公民社會嘅精髓。今集會為你講講：
• 原來孤獨野人本來係無自由，自由係源自於反抗
• 人除咗好似霍布斯所講咁有自愛，更擁有憐憫
• 點解盧梭認為家庭作為社會最基本嘅單位，一開始係由憐憫建立?
• 高貴野人係人類最幸福嘅時期，又點解?
• 社會契約唔係源自人嘅自利自保，而係嚟自富人嘅謊言，到底係咩大話要最幸福嘅人放棄自由?
• 人要進步嘅目的在於乜嘢？更多嘅進步、無止境嘅進步係為咗乜嘢？
• 如果一開始家庭係由憐憫而建立，一個社會係由富人嘅謊言而建立，咁富人要人相信人性向惡有無咩原因？點解憐憫唔被人重視？
• 喺社會束縛之下，點樣自由呢?
• 盧梭為儒家落咗一個好大嘅註腳。你會發現如果盧梭所講嘅係啱，咁霍布斯同荀子都只係講梗霍元甲之後嘅世界，而霍布斯嘅諗法就有偏頗，荀子嘅諗法其實可以承繼盧梭，荀子嘅禮教，就係要為霍元甲之後嘅人建立一個喺社會中嘅自由。
仲有好多內容，不能盡錄，如果你一次聽唔晒，請分兩次聽。希望你聽到最後，你會對自由、文明、良知有更多嘅理解，以及明白點解我話，「人生而自由，無處不在枷鎖之中，解放始於良知」。
(按：總結喺1:55:10開始，就算幾無時間/興趣都好希望你會聽！〔雖然只聽總結會唔太明點解咁講，所以結論都係請聽晒全集。〕）
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3H9GU2X2022-02-192h 09
牛哥講經丨廣東話哲學、書籍分享EP35 回應《蒼蠅王》，小朋友喺荒島互相殘殺嘅故事只不過係想像｜《人慈》（二）今集，人慈嘅作者要正式用事例去回應人性向惡嘅睇法。呢次要對應嘅，係好出名嘅小說──蒼蠅王。蒼蠅王講述一班小朋友流落荒島，結果互相殘殺嘅故事。如果連天真無邪嘅小朋友都喺荒島呢一個自然狀態中做出惡行，咁人性向惡睇嚟無容置疑。
但作者就指出，蒼蠅王只係蒼蠅王作者對人性嘅想像，如果搵出一個類似蒼蠅王設定嘅真實故事，到底結局係同小說相似，定別有洞天呢？
而無論係小說蒼蠅王定係真人版蒼蠅王都好(或者係電視嘅荒島實境show都好)，都係想要人返回到去自然狀態之中，呢一種諗法好明顯係來自於霍布斯對於自然狀態嘅想像，大家因此覺得人原本就係要去相爭。但原來盧梭認為霍布斯嘅諗法有一大缺陷，就係霍布斯口中嘅自然狀態只係將文明人放返到去自然當中，而唔能夠呈現原始人生活喺自然狀態嘅情況，喺霍布斯口中嘅自然人之前，仲有好多好多嘅人性變化階段。我會為你講講盧梭同霍布斯到底點解有一個對自然狀態嘅唔同理解，或者你就會發現盧梭嘅超前。
以前嘅人，只見到日出日落，知道軌跡係圓，所以認為太陽圍住地球轉動。
今日，當人探測到整個太陽系，就會發現太陽圍住地球轉動只係一種地上人類嘅視角。
人話康德對理性嘅批判，為哲學帶嚟哥白尼式嘅轉變。咁深深影響康德嘅盧梭，會唔會係哥伯尼嘅哥伯尼呢?
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3Lm9em32022-02-091h 17
牛哥講經丨廣東話哲學、書籍分享EP34 邊個話畀你聽人性好醜惡？唔好人講你就信！｜《人慈》（一）(正文內容只有一個鐘，其餘係心事解難)
今集，我哋終於要開始講講鋪塾已久嘅《人慈》。作者嘅立場非常大膽，居然想喺罪惡嘅人間當中，提倡人性向善，作者仲話自己用梗新現實主義。話人性向善都算，仲話人性向善係現實嘅理解，到底係洞見定愚見呢?
呢本書用咗明顯嘅先破後立，但由於要破除嘅觀點，係我哋日常習慣嘅人性向惡，所以作者用咗比較長嘅篇幅去破除我哋嘅既有諗法，內容包括：
1. 二戰時候，英國同德國互相不停轟炸，一齊聽下兩國嘅市民喺轟炸之下嘅反應，思考一下戰事苦難同人民團結之間嘅關係。
2. 又，轟炸係加速戰爭完結，定係相反呢?
3. 揭示飾面理論無處不在
4. 聽下颱風卡崔特喺記者嘅鏡頭之下同研究者嘅筆下嘅分別
5. 成千個小朋友病咗，佢哋嘅共通點都係飲過可口可樂，係可口可樂出事，定係有咩原因?
6. 簡介安慰劑效應，同作者提出嘅反安慰劑效應
7. 新聞同社會點樣塑造世界因為人性向惡而漸趨混亂，到底係咪真?
8. 又，點解新聞經常報導暴力、邪惡事件?同人嘅心理有咩關係?
希望你聽完呢集，會對我哋嘅日常經驗有多一分謹慎。去好奇一下，如果揭開社會所呈現俾我哋嘅現象之後，到底係充滿惡臭嘅人性向惡，定還是，另有乾坤?
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3Lm9em32022-01-291h 34
牛哥講經丨廣東話哲學、書籍分享EP33 個個都話人性醜惡？人類其實好善良｜《人慈》（預告）我本來想喺十二月嘅時候就想講講《人慈》，但呢本書不時會講返二戰時嘅歷史，所以我就想喺《人慈》之前就講一講二戰歷史，結果就揀咗《25座二戰紀念碑教我們的事》，一講就唔小心講咗四集。然後又想為德尼思化突破一萬人follow而給予一個賀禮，就想講下德尼思化嘅作品，咁就想喺講《人慈》之前，講講德尼思化所寫嘅荀子，作為《人慈》嘅對比引入。一直有聽開嘅你，相信會發現到1984之下嘅老大哥、暗黑儒家荀子當中，仍然可能見到人性當中嘅光輝。只係我哋可以見到，荀子仍然認為人性自然向惡，文明教化先可以改導人向善，咁到底相信人性當中擁有光、文明係假象，係咪只係童話嘅想像?今次嘅《人慈》正正係想回答呢一個深刻嘅問題，作者羅格．布雷格曼唔係只透過思辯，而係透過考證，去嘗試回答呢個充滿童真嘅問題。開始之前，我哋試一試一個荷蘭格羅寧根大學（University of Groningen）社會心理學教授湯姆．波茲美斯（Tom Postmes）嘅思想實驗做引入，向右一拉，你就會見到圖二。
A星球?你好可能會覺得唔係講笑下話，平時睇開啲netflix啊、荷里活都唔係咁，一但災難發生，人就會陷入混亂、自私。戰爭嘅殘忍、新聞嘅見死不救、小說對人性黑暗嘅刻劃、歷史當中文明隕歿都係因為互相殘殺、心理實驗對自私嘅證明，種種都同意住人性邪惡，而咁樣先同我哋日常經驗相似。
人慈呢本書用一個好得意嘅方式去回應人性邪惡嘅講法，作者用一種類似「辟謠」嘅方式回應。當中會提及戰爭中嘅數據、新聞嘅片面、復活節島真實嘅結局、同小說《蒼蠅王》類似嘅真實情況、《路西法效應》當中提到嘅心理實驗嘅造假，我哋可以見到呢本書會對應嘅範圍係十分之廣，無論你嘅興趣係新聞、歷史、文學定心理學都好，呢本書都仍然有提及。呢啲敢於同日常、同大作去衝撞嘅態度，令人好好奇，到底作者想表達啲咩呢?我諗Stephen Fry嘅推薦已經講得好清楚。
「對於人類天生的善良正直，做出一段非常強力的信仰宣言。羅格．布雷格曼從不使用那種眼光帶淚、感傷留戀或天真幼稚的手段，而是提供扎實且有說服力的理由來證明，即便有太多明顯的反面證據，我們仍然可以相信，自己不是別人會讓我們以為的那種野蠻而貪婪到無可救藥、暴戾又巧取豪奪的物種。」──史蒂芬．佛萊（Stephen Fry）
《人類大歷史》作者話「本書刷新了我對人性的長久信念。」
呢本書，就係一本用科學去檢驗盧梭同霍布斯嘅書，如果你對人性/政治有興趣，請同牛某一齊閱讀呢一本書。
_____
Instagram： @cowgortalk
Patreon：https://www.patreon.com/cowgortalk
文字版：cowgortalk.wordpress.com2022-01-2309 min
牛哥講經丨廣東話哲學、書籍分享EP32《荀子by德尼思化》：荀子性惡，儒門外道？（下集）上集嘅荀子我哋仲未解決點解荀子認為人能夠化性起偽，今集我哋會更深入去了解荀子可以點樣解答新儒家嘅質疑，最後講講荀子嘅性論點樣順暢解釋孔子嘅「性相近也，習相遠也」，內容豐富，牛某錄到即將油盡燈枯，敬請聽完全集。內容包括：
開頭嘅時候先講講禁晚市堂食嘅延長，然後講講
1) 禮原來唔係為咗限制情感，而係要順應人類情感，禮同仁義嘅關係，更係密不可分
2) 荀子認為禮嘅根源在於天，但呢個天又唔係道德天，咁價值根源喺邊度?
3) 價值根源在於心，心能夠虛壹而靜、積思慮、具自主意識，有咩咁重要?
4) 為你總結出荀子嘅全幅人性觀，好可能係全港最強義嘅荀子
5) 再用荀子同孟子打交，加埋胡師傅嘅健身健心
6) 荀子性論同人類由荒蠻到文明發展嘅契合，引出荀子同《人類大歷史》異曲同工
7) 以荀子性論同去解孔子嘅「性相近也，習相遠也。」極其通順
8) 「君子生非異也，善假於物也」
9) 「天地殘缺，良知不滅，天地始者，今日是也。」呢十六個字，總結出荀子關懷
最後會有Q&A環節(開頭都有預告到特別計劃)，想知就即刻聽聽!
你我本非聖人，與禽獸類同，惟吾心自可變可積可思，而有能成聖人之可能，有能使他人成聖之可能，此之謂文明社會，此之為孔荀之同也。
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3IcBUf52022-01-151h 37
牛哥講經丨廣東話哲學、書籍分享EP31《荀子by德尼思化》：荀子性惡，儒門外道？（上集）今集係牛某喺2022年錄音嘅第一集，今次我要拋開宋儒、新儒家嘅包袱，以德尼思化嘅文章，去為你講述一個充滿關懷嘅荀子。如果你曾經認為荀子就係講人性本惡、荀子就係儒門外道，咁我今集將會為你帶嚟一個唔一樣嘅荀子，荀子唔係講人性本惡，而係人性向惡，只要分清一個字嘅差別，你就會明白點解荀子係一個儒家，於我而言，比起孟子，荀子係更近孔子嘅儒家傳人。荀子對人性嘅剖析，值得你我重視。
喺開頭會同大家講講香港政府同中國政府喺施政上嘅雷厲風行。然後會講講：
1) 呢集係適逢德尼思化IG突破一萬人follow嘅賀禮，稍稍講下點解想用德尼思化嘅文章
2) 簡介孟子嘅關懷，澄清孔孟根本無講過「性本善」，以及將孔孟詮釋成「性本善」嘅問題
3) 講講荀子同當時嘅時代背景、荀子嘅治學精神同埋荀子點樣被後人片得體無原膚
4) 將荀子〈性惡篇〉剖析，解釋人性向惡嘅原因、偽字對荀子嘅意義同埋狙擊孟子嘅原因
5) 荀子話聖王同暴君同你我嘅性都係一樣，點解?
6) 無論係朱子同王陽明，都有荀子嘅影子，但佢哋都同樣反荀子
7) 牛某化身荀子，力指孟子嘅盲點同展現荀子嘅關懷
好老實講，呢篇同德尼思化嘅合作，可能會係我2022年寫得最好、講得最好嘅講稿，但願各位用時間去慢慢聽。荀子，值得你我去了解。
在此再次感謝德尼思化嘅允許，有時我同戈登探長有啲理解不一，我諗係非常平常，始終每個人理解不一，但希望做到和而不同。
聽到最後有重要消息口述！
(總結於1:29:30開始）
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3IcBUf52022-01-121h 51
牛哥講經丨廣東話哲學、書籍分享EP30【特備節目】《製造聖經》：一個聖誕，各自表述(正式內容由12:30開始）
我哋成日話聖誕，但又有無諗過耶穌自娘胎出世之前，到底存唔存在呢？到底聖誕節係慶祝梗耶穌出現，定係耶穌一直存在，慶祝佢道化肉身呢？今集要講嘅書《製造聖經》就係想解答一系列關於新約嘅問題。顧名思義，《製造聖經》仲想搵出聖經係咪製造出嚟，而如果係製造出嚟，製造過程係點呢？
呢本書嘅作者係巴特‧葉爾曼，佢所採用嘅方法係歷史批判法，佢接受過專業嘅神學院訓練，喺導讀當中，台灣神學院副教授邱凱莉補充，所謂嘅歷史批判法係一系列嘅方法論，用嚟檢視聖經文本嘅起源，同埋同其他同時代文本嘅關係，形成一種批判性嘅閱讀聖經方式，務求盡量接近原意，人話少少講，即係睇埋聖經作者嘅語境。
我哋今集會講講：
1. 馬太福音同路加福音講耶穌出世嘅唔同
2. 馬太福音同路加福音點講耶穌之死
3. 馬可福音有天啟末日嘅背景，同約翰福音有喺神學意義上嘅唔同 我無跟足作者嘅引述，而係睇完《製造聖經》，再嘗試模仿作者思維去自己睇返聖經，希望仍然能夠呈現到一個合理論述俾你。聽完呢一集，希望你有更多嘅角度去閱讀聖經。
一月七日，喺東正教嘅聖誕節，牛某同你一齊思考聖經。
_____
Instagram： @cowgortalk
Patreon：https://www.patreon.com/cowgortalk
文字版：cowgortalk.wordpress.com2022-01-071h 46
牛哥講經丨廣東話哲學、書籍分享EP29《25座二戰紀念碑教我們的事》：我迷失在這場歷史遊戲中（尾集）《25座二戰紀念碑教我們的事》：猶太人最後嘅提醒
上集提到韓國同日本喺慰安婦一事之中，韓國作為一個受害者，多年嚟想向日本呢個施害者討回公道。而今集嘅受害者數量更大，所得到嘅待遇亦折然不同。二戰時嘅猶太人唔係被狂暴嘅軍人殺害，而係被冷血又冷靜嘅理性所諗出嚟嘅大規模殺穆方式所殺害，強逼我哋去思考，點解德國黨衛軍自己發明出毒氣室去誅殺眼前嘅猶太人。
今集會去講下尼德蘭(荷蘭)、匈牙利同波蘭點樣去以紀念碑去記住六百萬猶太人嘅亡魂。
我哋先會講講尼德蘭嘅國家紀念碑拒絕將猶太人納入自己嘅民族受難之中，唔願意承認猶太人喺集中營嘅苦難，而時移世易，我哋發現國家紀念碑原來唔再係猶太人嘅忽視，而係重視猶太人命運嘅開始，點解會咁?
然後，我哋再講匈牙利以德國占領遇難者紀念碑去形塑受傷者嘅形象，但歷史學家同民間都共同承認匈牙利喺二戰當中同德國合作嘅過去，匈牙利幾乎無受過納粹嘅催殘，實際上，匈牙利同德國合作，用四個月將超過四十萬猶太人送到德國/波蘭赴死。民間面對政府以紀念碑企圖以紀念碑去建構一個虛假嘅歷史，以紀念碑對抗紀念碑，到底講梗咩?
最後，講返一百萬猶太人魂斷嘅地方，奧斯威辛。我會為你講講奧斯威辛喺德國治下嘅歷史、毒氣室嘅由來、德國黨衛軍嘅哲學基礎。一齊同牛某思考呢場冰冷嘅屠殺，相信你下次嘅歐洲之旅，會不再一樣。
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3qZjLMd2021-12-191h 29
牛哥講經丨廣東話哲學、書籍分享EP28《25座二戰紀念碑教我們的事》：我迷失在這場歷史遊戲中（下集）今集，先會略略引述立場新聞就黎智英、鄒幸彤、何桂藍未經批准集結全部罪成嘅記錄。
然後繼續《25座二戰紀念碑教我們的事》，上集講大洋國，今集講英國，同埋意大利、韓國、日本。本來呢本書嘅第一部係講英雄，講到英國同意大利就完咗第一部，但係我嘅貪心，偷偷地寫多個韓國，再忍唔住講埋日本，就係咁，呢集比較長。
喺講英國嘅轟炸機司令部紀念碑嘅時候，我哋會發現一個政府會將一啲醜惡嘅現況隱藏，就好似唔透露轟炸機以炸平民為目標，而不斷話轟炸機係結束戰爭嘅方法、只攻擊軍事目標。到底英國社會點睇轟炸機，而退伍嘅軍人又點睇呢？理應作為主角嘅退伍軍人，係咪好似雕像上嘅英雄一樣，昂首闊步呢？
然後我哋會講講意大利嘅陣亡者神龕，陣亡者神龕同呢一部嘅其他紀念碑唔同，陣亡者神龕係由民眾自發去建立，再被政府承認為一個永久嘅紀念碑。喺陣亡者神龕，你唔會見到一個個體代表全體嘅雕像，而會見到二千幅反法西斯嘅英雄嘅遺照。係咩驅使到民眾咁團結去自發起呢個紀念碑？呢個紀念碑象徵嘅意思，同二戰時候嘅意大利軍隊有咩關係？
我哋可以喺整個第一部當中，發現英雄具有好多唔同嘅面向，「實際上，英雄可以係舊時代嘅眼淚、鎮壓者、國家嘅靈魂、人造嘅再世基督、被遺忘但俾人擺上檯嘅軍人、同埋烈士、受害者，但我哋好多時忘記/忽視咗呢啲身份，全部統稱為英雄。」
我諗呢一部最值得我哋去記住嘅，係每一個英雄紀念碑象徵住某某意底牢結，而某某意底牢結具有一啲目的，想去說服人民一啲嘢，當我哋深入去搵呢個意底牢結嘅根源，我哋會發現故事比我哋想像嘅，往往要複雜，面對複雜嘅世界唔容易，但我相信比起用簡單嘅思維去面對複雜嘅世界，最終嚟得要無咁痛苦。
跟住，我哋講講第二章──烈士，先講嘅係韓國嘅和平少女像，睇睇一個咁簡樸柔弱嘅紀念碑，背負住一個幾沉重嘅歷史，而呢個歷史點樣借由紀念碑將舉國嘅憤怒壓喺日本身上。
最後，講講日本靖國神社點解會帶嚟咁多嘅爭議。
我會同大家一齊思索一下，受害者、加害者同政府之間嘅關係，希望大家唔會，亦唔需要成為歷史嘅囚徒。
歷史會被某啲人視為鼓勵、勇氣嘅泉源，但對我嚟講，歷史係會令人受傷，每個人都係歷史嘅受害者，因為今日嘅一切，源於過去嘅唔文明所建構，歷史嘅鮮血，造就今日嘅我，無論係多面嘅英雄，定係如恆河沙數嘅烈士，如今都一一逝去，踐踏住佢哋屍骨嘅我，要做啲咩先唔會辜負呢啲亡靈呢？
下集，會延續烈士嘅話題，去同大家繼續面對歷史。
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3qZjLMd2021-12-121h 29
牛哥講經丨廣東話哲學、書籍分享EP27【特備節目】《一九八四》：對極權最深刻嘅反省《一九八四》：關於一九四八年嘅社會主義者對極權共產最深刻嘅反省
《一九八四》當然係一本好出名嘅書，如果我哋只睇書嘅內容，會發現呢本書講梗極權社會下嘅人性扭曲，但如果我哋睇埋作者同成書嘅時代背景，我哋就會發現《一九八四》係對蘇聯未來嘅刻畫(而我哋可以話佢預計得好準確)，同時係想用呢個未來嘅極權政府，對應作者心目中嘅馬克思嘅共產主義，以極權顯示共產嘅真意。
今集會為你講講：
1) 點解《一九八四》唔會係一本禁書，講講作者背景同歷史
2) 作者對一個聰明嘅極權政府嘅想像，顯示極權政府最大嘅問題唔在於奴役人民，而係極權政府一但成熟，就不可逆轉。
3) 不可逆轉係因為極權政府有三個特性去維持下層建築：利用矛盾維持階段，以矛盾消除民眾理性同強調對老大哥嘅愛。
4) 極權同共產有咩分別?講講馬克思嘅共產主義浪漫到令好多人支持嘅原因，原來共產主義追求自我毀滅，講梗乜?
5) 作者話不可逆，但新嘅科技可唔可能令下層建築改變上層建築?
6) 最後用主角嘅結局，詮釋極權政府對人性嘅理解
希望你聽到最後，明白我點解會最後話：「天地殘缺，良知不滅，天地始者，今日是也。」前兩句係我寫，後兩句係荀子，我搵日會講講@delis.ver嘅荀子。
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/30ddvWb2021-12-101h 35
牛哥講經丨廣東話哲學、書籍分享EP26《25座二戰紀念碑教我們的事》：我迷失在這場歷史遊戲中（中集）今集，開頭會記錄一下12月9日嘅全面推行安心出行，同埋林鄭月娥想回復殖民地時期總督嘅職責，正式內容會喺06:15開始。
今次繼續要講嘅書係《25座二戰紀念碑教我們的事》，要講嘅國家係美國，我哋依家成日會稱呼美國做美帝，當然，佢的確係世界上嘅強國，但其實佢嘅強大，同二戰有好大嘅關係。
雖然美國同其他國家都同樣參與到戰爭當中，但美國一來無發起所謂嘅「不義之戰」，所以無戰敗國嘅懊悔、慚愧，二來亦無好似歐洲戰勝國咁，被人以閃電戰佔領/轟炸機大量投彈，所以無好似歐洲戰勝國以血肉咗換取勝利之後嘅悲情，所以美國喺二戰之後基本上別樹一幟，可以話係唯一一個抬頭挺胸嘅戰勝國。然後你會發現呢個背景同今日嘅美國有好大嘅關系。
喺第三章，作者講到海軍陸戰隊戰爭紀念碑，喺呢座紀念碑我哋可以了解到，美國將美軍當成英雄，列根甚至稱美軍係基督大軍，到底點解咁誇張？紀念碑點樣將美國精神注入？呢個美國精神，其實代表住咩？當我哋將祖國召喚同海軍陸戰隊戰爭紀念碑對比，你就會發現相同同相異之處，十分有趣。
喺第四章，講到麥克亞瑟將軍紀念碑，呢座紀念碑被菲律賓人所稱頌，甚至神化呢個外國人將軍，基本上當咗佢係jesus，但當我哋重掘出麥克阿瑟嘅歷史，會發現呢個英雄有唔少嘅污糟事，其實呢啲歷史對菲律賓人又有咩所謂？英雄係一個symbol，係一個希望，無論菲律賓人定菲律賓政府都需要一個英雄，咁麥克亞瑟就有企喺菲律賓嘅價值。
最後我會為大家總結一下第一至四章，紀念碑同人類文明之間嘅關係，更會為你揭露，我哋每個人內心嘅嗰座紀念碑，好可能係啲咩（聽到最後，會稍稍講講朱子嘅理解）。
「當我哋去留意下紀念碑上嘅陸戰隊隊員，除咗最頭嗰位係插梗旗，其餘隊員舉手嘅神情，好似人向上天祈求一樣，最後一位隊員想掂又掂唔到旗桿嘅狀況，作者更認為會令人聯想到Michelangelo嗰幅亞當向上帝伸出手指嘅畫。」
「而佢留咗喺巴丹島捱餓部隊，就有一首歌去記念麥克阿瑟。
「防空洞道格」，別躲了，快出來
「防空洞道格」，別躲了，快出來
去給富蘭克林送捷報
弟兄們沒飯吃還在捱！」
「但世界有幾多嘅文明被時間消滅，而又無人能知道當中嘅故事？
就好似西夏王陵嘅金字塔到今日仍然存在，但佢嘅故事係一個空白，亦無人再講得出內容，自從蒙古滅咗西夏，無人知佢點起、點解起，佢哋好可能都係一個大型嘅讚頌英雄嘅紀念碑嚟，只係今日佢哋無再述說任何故事，變得沉默。」
心事解難：
問：why hk ban drug? moral or harm?
答：主要係harm
分享：好多人移民
答：咁我又分享下沙特
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3qZjLMd2021-11-281h 11
牛哥講經丨廣東話哲學、書籍分享EP25《25座二戰紀念碑教我們的事》：我迷失在這場歷史遊戲中（上集）(唔好以為今次正文好長！其實正文只係去到44:35，之後嘅內容係心事解難）
如果話二戰嘅發生係民族/民粹主義嘅極致，咁二戰就主要係有關斯拉夫人（東歐、俄羅斯、巴爾幹半島）同雅利安人（中歐，由其係德國）之間嘅爭鬥嘅故事。當一個民族高舉優越，另一個民族以死捍衛自己，血流成河就變成必然。
俄羅斯嘅母親河----Volga 就正正被二戰染成赤紅，而今次嘅《25座紀念碑教我們的事》就以Volga 旁邊嘅史太林格勒上嘅「祖國召喚」開始。
你會喺呢集了解到呢座25座入面最大嘅紀念碑（高自由女神像兩倍）嘅巨像，同當時嘅時代有咩關係、以前對蘇聯人，依家對俄羅斯人嚟講有咩意義。
然後，我哋會再去睇處於戰場中央嘅斯拉夫人----波蘭，有一座叫「四名沉睡者」嘅紀念碑，佢明明係一座為咗慶祝紅軍戰勝德軍嘅紀念碑，但係被波蘭人所敵視，而「四名沉睡者」呢個名，就係由波蘭人自己內部所改。
一齊去聽下斯拉夫人點樣去用唔同方法，去睇同一座紀念碑、同一場戰爭。以前嘅「祖國召喚」，仍然雄糾糾咁企喺大地之上，但喺喺人心目中，就可大可小。今日你我再去波蘭，唔會再見到「四名沉睡者」，到底波蘭人嘅傷痛有無因此而抹平呢?我哋又可以從消失嘅紀念碑當中領悟啲乜嘢呢?一齊聽聽呢集，一齊反思一下我哋面對紀念碑與否，所應有嘅態度。
「所以作者認為，祖國召喚（The Motherland Calls)係想表達一個簡單嘅訊息，「唔理戰爭幾咁慘烈，唔理敵人幾咁凶殘都好，「祖國」永遠都會屹立不倒」，而我哋亦唔難見到，面對住祖國召喚嘅巨大，任何嘅個人同傷痛都會顯得微不足道。」
「波蘭民族回憶研究所的安傑伊．扎維斯托斯基（Andrzej Zawistowski）博士：
「在這地方的每一個角落，都在審訊和折磨所謂『國家敵人』…」」
心事解難概要：
問：如何熱愛生命？
答：生命唔需要設立目標，目標係一個限制，但生命係由內到外嘅開展，唔好規限自己，當下生活，就能夠熱愛
問：牛哥點睇「相濡以沫，不如相忘於江湖？」
答：莊子喺呢句，係講梗對生命嘅睇法
問：考試壓力好大，有時大到溫唔到書，咩都做唔到，該如何是好？
答：你今日叫咗未？
問：何以解憂？
答：憂何需解？聽下周敦頤唔除草
問：到底牛哥信咩主義
答：牛哥主義
問：好想留得住一啲嘢
答：咁就會留唔住「想留得住一啲嘢」
問：返工做梗嘅嘢同平時自己會諗嘅嘢好割裂
答：想知你平時會諗咩！
問：政府追殺野豬真係......(暫時未搵到啱嘅形容詞形容件事有幾撚離譜）
答：我哋一齊喺野豬（山豬）呢件悲劇當中，去反思我哋可以學習到咩，一個公民可以點諗
問：突然之間好驚死，成日形住自己有病，唔知點解
答：先body check，再聽Socrates 點睇
問：約個女仔睇戲俾佢拒絕咗🥲
答：被拒絕，好過無機會被拒絕，你嘅勇敢已經值得稱讚
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3qZjLMd2021-11-221h 39
牛哥講經丨廣東話哲學、書籍分享EP24《25座二戰紀念碑教我們的事》：我迷失在這場歷史遊戲中（預告）今集係一個新嘗試，喺講一本新書之前，為你做個預告，等你知道本書大概講啲乜，睇你有無興趣一齊睇/聽埋落去。
近排有推倒同埋起紀念碑嘅風潮，一方面不停推冧紀念碑，一方面又開始歌功頌德去起新嘅紀念碑。一齊聽下《25座二戰紀念碑教我們的事》嘅預告，聽下作者對一舊舊嘅紀念碑有咩睇法！或者你會發現，一個人點樣去看待一座紀念碑，其實好代表佢係一個乜嘢人。
內容節錄：
「所以每一個被保留嘅雕像，其實係象徵住一個想被人記住嘅故事，而被保留嘅故事，就係呢個社會入面嘅大眾/政府想去推崇嘅價值觀，換言之，就係將價值觀依附喺堅固、忠誠嘅石頭之上，希望呢個價值觀能夠同石頭一樣，天長到地久......」
「真實發生過嘅二戰，就成為整個西方世界嘅共同神話，呢個共同神話令到書中嘅五個部分環環相扣，唔知呢一段嘅集體記憶、傷痛能唔能夠抵禦到呢次破壞偶像嘅風潮呢?」
_____
Instagram： @cowgortalk
Patreon：https://www.patreon.com/cowgortalk
文字版：https://bit.ly/3qZjLMd2021-11-1812 min
牛哥講經丨廣東話哲學、書籍分享EP23《智者的現世關懷》：牟宗三反思「自由主義」同「民主」今集牛哥會同你從新儒家文本中，直接去傾傾新儒家到底點樣回應現代社會。呢本書係彭國翔所寫嘅「智者的現世關懷」，入面係有關於牟宗三對當代政治思想嘅回應，如果你對儒家或者自由主義有興趣，相信呢集好適合你聽。而我會為你講講，到底牟宗三對樣看待自由主義同儒家嘅關係，內容包括：
1）除咗用意底牢結去譯ideology外，牟宗三仲認為liberalism唔應該譯做自由主義，而應該譯做「寬容主義」，而「寬容主義」就好似一個舞台咁，點解咁講？
2）寬容主義同自由之間嘅關係係點呢?當時嘅自由主義思想面臨啲咩問題呢？
3）牟宗三坦白承認民國建國之前嘅儒家，自己內部開唔出liberalism，但係儒家精神可以為liberalism作補充
4）牟宗三點睇中國古代政治結構？
（喺呢個部分，原來我有一段mute咗自己，所以呢度補充一下，牟認為中國古代政治有三個組件，君主、士人同人民，而古代人民其實唔係公民，而係天民，佢哋並無政治權力，無法參與到政治決策當中，只有接受政策時先會感受到政治嘅存在，換言之，任何時候都自由，而一旦政策到嚟就唔自由，牟話佢哋好似羲皇上人：「日出而作，日入而息，帝力於我何有哉?」平時咪就係做農夫，皇帝嘅力量好似唔影響自己咁。所以呢種社會，係一種單向嘅政治結構，亦因此要改朝換代，就往往會出現革命。）
希望今集會令你感覺到新儒家對自由嘅關懷，既尊重過去，又渴望回應現代，係新儒家其中一個動人嘅位。
_____
Instagram： @cowgortalk
Patreon：https://www.patreon.com/cowgortalk
文字版：cowgortalk.wordpress.com2021-11-1452 min
牛哥講經丨廣東話哲學、書籍分享EP22《奴隸哲學家的人生通識課》：Stoic話你知點樣喺枷鎖中活得自由（下集）今集，Epictetus 終於要開始教我哋點樣先可以控制情緒，超出外在事物嘅限制，從而你會發現，Epictetus實在係語出驚人 {牛哥超譯，去吸引你去聽}：
1）我哋好多時都當咗自己嘅意見係反映事物本身，真係錯晒！
2）叫人唔好唔開心？咁點解自己平時唔能夠開心？得把口，唔得！
3）你嘅男/女朋友只係人類，無乜特別啫！
4）快樂係弱者先會去享受，強者會戰勝快樂。
5）如果你無有可能出街踩到狗屎嘅覺悟，咁你不如唔好踏出嗰步啦！
6）你覺得受傷，唔係因為小明傷害你，只係你自己傷害自己，因為無人可以逼到你自己感到受傷。
7）佢沖涼好快，唔好話佢沖得唔好，話佢沖涼好快就夠喇。
8）手足做錯事？你諗佢做錯嚟做乜？不如諗返你同佢係手足嘅情誼，好好幫佢手啦。
9) 記住，要好似敵人咁暗中監視自己。
10)「記住，你係戲劇中嘅演員。照住劇作家嘅要求，短篇就演短劇，長篇就演長劇。」
希望你聽完呢集，就算唔能夠令到你好似Epictetus咁豁達，起碼可以用一個輕鬆啲嘅方法，去看待你人生會遇到嘅事事物物，唔再驚失敗，為諸事感恩，相信就係Epictetus 最勵志嘅地方。
呢集嘅最尾，牛哥會為你解答一條千古難題，其實，人生就係... ...聽咗你咪知！
_____
Instagram: @cowgortalk
文字版：https://bit.ly/2YTRNpd2021-11-071h 01
牛哥講經丨廣東話哲學、書籍分享EP21《奴隸哲學家的人生通識課》：Stoic話你知點樣喺枷鎖中活得自由（中集）今集開頭，我會講下半強制安心出行嘅推行，對牛哥嘅影響。另外，面對政府官員對於國家安全嘅諸多詮釋，作為一個小市民嘅困惑。
繼續去講教人喺處處受限嘅人生當中，活出自由嘅書，呢本書分咗四個部分，但原來今集只能夠講到第一章──義命分立（原本想講兩章）。
喺呢集，你會聽到對stoic 最勵志嘅詮釋，更會用儒家同stoic 溝通，睇下Epictetus 點樣提醒我哋：
1）義令人自由，命限可能會令失去自由
2）命限係唔能夠迴避，人要去硬食命限嘅原因
3）義同命限會因為時機而轉變
4）命限對於我哋嚟講，其實點都有著數
牛哥仲會補充：
1）義要堅持，但要背負錯嘅可能嘅責任
2）覺得命限跨唔過？試下跨先啦，失敗，最多咪就只係失敗
3）人係能夠成長，命限，係可能越嚟越少
人生係會受到命限，但人可貴嘅地方，就係命限阻唔到自由，阻唔到人活得優雅、快樂（理論上），甚至，人係可以打破命限。
（正式內容由7:58開始。）
_____
Instagram: @cowgortalk
文字版：https://bit.ly/2YTRNpd2021-10-301h 13
牛哥講經丨廣東話哲學、書籍分享EP20【特備節目】《八國聯軍乃正義之師》：人必自侮而後人侮之喺教科書嘅記載下，我哋對清末嘅印象往往係貧弱、飽受欺凌，外國接連以戰爭打敗清軍，鴉片戰爭、甲午戰爭嘅落敗令到清國顏面無存，就自然認為外國軍隊一旦進入國土之內，就係又一次嘅侵凌。
喺《八國聯軍乃正義之師》呢本書，用咗誇張嘅標題，想為你揭示嘅係「八國聯軍是一場救援行動，而不是侵略行為」，同之前嘅鴉片戰爭、甲午戰爭有住根本唔同，今集內容包含：
1）承認作者標題同開首過於偏袒聯軍，引述作者後嚟講到「八國聯軍不是正義之師」
2）作者點出鴉片戰爭、甲午戰爭係戰爭，但八國聯軍無一個廣受按納嘅稱謂，原因係八國聯軍並唔係戰爭
3）引述時人對於義和團嘅證言
4）1900年，十萬義和團入京嘅原因
5）外國使團以外交方式嘗試不果，使團代表更被殺後示眾
6）清軍武器先進，同義和國一齊圍攻外國領事館兩月
7）十萬清軍對上1.8萬聯軍，幾乎不戰而逃
8）八國聯軍進京之後，對以康有為為首嘅維新派同以孫中山嘅革命黨有莫大益處
9）澄清有關議和條款係對清嘅欺壓嘅謬誤
我努力嘗試將作者偏頗嘅內容，或刪除，或指出。目的係想展示雖然書名係有所誇張，但呢本只有192頁，但總共有528個註嘅書仔，當中資料嘅豐富，係一個對於後人認識當時歷史嘅好補充。作者確確實實有侮辱嘅嘢，只係侮辱嘅嘢係瘋狂嘅義和團同頹然嘅守舊派；作者係有讚頌八國聯軍，只係除咗因為八國聯軍解救教民，更令清帝國嘅內亂解除，同埋為往後嘅清末新政同辛亥革命鋪路。
我同意八國聯軍進軍清帝國可能有私心，只係就上述三點而言，八國聯軍之於中國而言，係有益處。
我同意作者書名太過誇張，但唔代表內容唔值得用你我理性嘅頭腦去閱讀。
如果歷史係非黑即白咁簡單，或者係一件好事，但唔係事實。
人必自侮，而後人侮之。
_____
Instagram: @cowgortalk
文字版：cowgortalk.wordpress.com2021-10-2350 min
牛哥講經丨廣東話哲學、書籍分享EP19《奴隸哲學家的人生通識課》：Stoic話你知點樣喺枷鎖中活得自由（上集）當我哋提到孔子面對天命嘅限制嘅時候，唔知你會唔會去諗，既然天命之於人係咁大，咁到底人可唔可以擁有自由呢？而當孔子喺失意嘅時候哭泣，你又會唔會諗，聖人都喊，咁自己面對失意，係咪都要喊埋一份？哲人面對情感，到底同普通人有咩分別？
自由同點樣面對情感，的確係一直以嚟都係困擾好多人類嘅問題。今次我哋將目光放到西方，去睇睇同儒家有幾分相似嘅Stoic係點樣思考自由同情感。呢次講嘅書係《奴隸哲學家的人生通識課: 在處處受限的人生裡, 活出自己的形狀》，你無睇錯，個哲學家真係奴隸嚟，佢個名係Epictetus，但到底一個奴隸點樣活出自由同自在呢？我諗，有唔少香港人需要向呢位哲學家偷師。
今集主要會講下stoic 呢個學派嘅背景，內容包括：
1)情緒嘅主人定奴隸
2)Stoic 式嘅義命分立
(仲會講少少cioran呢個存在主義者點面對失敗）
3)表象與實在
4)宇宙同我
而牛哥更會用儒家同stoic 互相溝通，務求帶俾你一個更勵志嘅哲學。
註：今集最尾有回應聽眾心事，所以會睇落有啲長
（正式內容由5:00開始。）
_____
Instagram: @cowgortalk
文字版：https://bit.ly/2YTRNpd2021-10-171h 14
牛哥講經丨廣東話哲學、書籍分享EP18《孔子大歷史》（番外篇）：孔子晚年，飽受挫折，思想劇變，棄周從古今集係《孔子大歷史》嘅番外篇，我哋會一齊睇下孔子晚年所經歷嘅唔如意。
1）孔子重返衛國之後，發現東方聯盟並唔適合自己，就南下到蔡國、楚國，經過兩年，仲被楚王應承俾七百里地俾孔子
2）孔子到南方嘅時候，陽虎喺北方打得激起，我哋會順道講講，睇下貴族政治點樣喺戰場上失色
3）孔子失意離開楚國，重返衛國，然後到魯國做史官直到老死
4）孔子途中編著六經，令之後讀書人要透過孔子嘅著作去了解過去，導致孔子有成名嘅可能
5）孔子晚年嘅政治思想，居然有去除禮教嘅意味，視周禮為次等；同意曾點無志向嘅諗法
6）孔子晚年，兒子、弟子相繼死去，最後迎接自己嘅死亡
六十而順，七十而從心所欲不逾矩，並無想像中咁輕鬆，呢一切嘅輕描淡寫，係嚟自於孔子晚年所遇到嘅失意、哀痛，到孔子喺生命最後一刻去再審視人生，去回憶自己曾經嘅夢想──周公，亦只係「久矣吾不復夢見周公」，但就算係咁，仍然唔去後悔。
今日閱讀孔子嘅你我，無論係有孟子嘅鴻心定曾點嘅悠然自得，孔子嘅人生仍然係你我可以重溫嘅鏡，然後承繼佢嘅意志，一步步向前走，以一人之力，一己嘅方法，面對住巨大嘅命限。
_____
Instagram: @cowgortalk
文字版：https://bit.ly/3nEojGr2021-10-091h 07
牛哥講經丨廣東話哲學、書籍分享EP17《孔子大歷史》（下集）：匏有苦葉，濟有深涉，前有黃河，丘卻不渡知天命三個字，琅琅上口，但要能夠體會其中意味，就唔易做到。如果要形容孔子嘅人生做一種生果，我諗就係碌柚。皮厚，飽滿，多汁，甜又帶苦澀。
上集提到孔子一步步做到三桓，彷彿得到機遇而做到司寇，已經係天命眷顧。但喺今集，牛哥會詳細為你講述孔子五十歲嘅人生，你或者就會知道天命之於孔子，更多嘅係嘆息。今集內容包括：
1. 孔子點樣喺魯定公同三桓之間，實踐自己嘅靈活而有原則
2. 孔子點樣將魯國變成自己嘅理想國（加埋孔子點睇刑法）
3. 孔子同女人們嘅關係（加埋孔子見南子夫人）
4. 孔子擊磬又學琴，終於決定背叛魯國，去投奔趙簡子，走到黃河邊上，心裏唱起《詩經》嘅，口中念：「美哉水，洋洋乎！丘之不濟此，命也夫！」文王因為天命而叛商，孔丘因為天命而不渡。孔子長嘆一句造化弄人，就辭別回鄉。
如果你願意，一層一層剝開孔子嘅心，佢唔會為你帶嚟世上最甜美嘅味道，而係樸實中嘅苦澀同陣陣嘅清香。然後你會發現，脫去世人對孔子神化嘅衣裳，見到嘅會係既係凡人、又係聖人嘅孔丘。美哉水，洋洋乎。
（正式內容由3:21開始。）
_____
Instagram: @cowgortalk
文字版：https://bit.ly/3nEojGr2021-09-261h 03
牛哥講經丨廣東話哲學、書籍分享EP16《孔子大歷史》（中集）：重觀史記，發現孔子成為權力顛峰之旅，得來不易上一集講到孔子出生貧苦，無得到好多嘅幫忙同庇蔭，依靠停棺歸宗而被重新得到貴族身份。但係呢一次嘅咸魚翻身，無令到孔子飛上枝頭變鳳凰，因為孔子既無父親照顧、又無學問，佢嘅貴族身份根本無畀人睇得起。
今集，會為你撕開司馬遷所記載嘅孔子年輕有為，還原返初得貴族嘅孔子：
1. 點樣一步一步經歷成長，感受到三十而立嘅小成就
2. 四十而不惑對做錯政治決定嘅反思，再重新積存實力
3. 五十而知天命嘅得到機遇，成為同三桓平起平坐嘅大司寇，然後迎接天命，隻身對抗提拔自己嘅三桓。對抗提拔自己嘅三桓。
學習孔子，唔係因為孔子係聖人，唔係因為佢講仁義禮智。而係見證住一個凡人以一己之力，逐步遞進，遇到挫折，就轉身繼續前行，做到自己夢想中嘅大官，仍然無因此去迷失，我哋先會為孔子嘅不屈而動容。
就好似一個人用一手好牌贏人，只係基本；但一個人拎住一手爛牌，仍然唔係輸最多，甚至唔使輸，呢個人嘅牌技就有好多可以學習嘅地方。
一齊睇下喪家之犬，點樣站到魯國嘅權力高峰。
最後感謝一下聽眾嘅回應。
（正式內容由1:07開始。）
_____
Instagram: @cowgortalk
文字版：https://bit.ly/3nEojGr2021-09-1951 min
牛哥講經丨廣東話哲學、書籍分享EP15《孔子大歷史》（上集）：孔子絕非守舊老嘢，更加前衛到將娘親棺材周街放孔子呢個名，你知我知，單眼佬都知。但我哋對孔子呢個人嘅事蹟又了解幾多？
今集，牛哥會講下《孔子大歷史》呢本書，輔以引文，為你呈現孔子真實嘅一生。一齊睇下孔子點樣由一個鄉人變成貴族。呢集內容包括：
1. 介紹孔子嘅巨人父親嘅事蹟
2. 解釋孔子為「野合之子」嘅意思
3. 睇下孔子點樣利用娘親嘅棺木去換取貴族身份
4. 「吾十有五而志於學」嘅真正意思
希望藉由詮釋佢嘅事蹟，能夠令各位喺唔需要理解論語嘅思想底下，都能夠以孔子嘅行事去了解佢對禮制嘅睇法，你或者會發現，孔子之所以係聖人，唔係因為佢離地，而在於佢嘅超凡入聖。
（按：今次開頭會講講九一一，正式內容由12:25開始。）
（另：實在失禮，有好幾次將「孔紇」讀成「孫紇」，請見諒）
_____
Instagram: @cowgortalk
文字版：https://bit.ly/3nEojGr2021-09-1248 min
牛哥講經丨廣東話哲學、書籍分享EP14《「我反對！」不恐龍大法官RBG第一手珍貴訪談錄》：美國最高法院史上第二位女性大法官訴說平等與自由（下集）今集有少少長，但幾值得聽。
今次會用《我反對》延續有關平等嘅討論，將女性平權嘅進程一步一步去解釋你聽，由五十年代前被視為附庸、到民權運動追求女性同男性擁有一樣嘅福利、講到新女性主義者認為女性應該有特別待遇。當我哋去睇金斯伯格點樣回憶過去有關女性權益嘅案例同回應新女性主義嘅comment，我哋就能夠漸漸明白到金斯伯格所理解嘅平等嘅精神所在。
之後，我會抽取書入面三件有關於金斯伯格人生嘅事件，去睇下唔係著緊法官袍嘅金斯伯格喺日常做過咩事去保護民主。同埋講講平等同儒家嘅「與萬物同體」嘅關係。
最後...更會揭示牛哥嘅身份，記得聽到最後。
_____
Instagram: @cowgortalk
文字版：https://bit.ly/2XWGIDg2021-09-0454 min
牛哥講經丨廣東話哲學、書籍分享EP13《「我反對！」不恐龍大法官RBG第一手珍貴訪談錄》：美國最高法院史上第二位女性大法官訴說平等與自由（上集）要喺社會中敢於叫喊一聲「我反對」並唔容易，處於高位而處處為異議者發聲就更唔容易，而今次藉由《「我反對！」不恐龍大法官RBG第一手珍貴訪談錄》要講嘅，就係喺美國最高法院擲地有聲咁講「我反對」嘅露絲拜德金斯伯格(Ruth Bader Ginsburg)。
金斯伯格係美國最高法院第二個女大法官，佢嘅一生正正經歷同實證美國對於平等嘅進步，今集會稍稍延續一下上集提到嘅馬丁路德金，睇下喺美國嘅民權運動點令到司法制度嘅態度轉變，等我哋一齊喺呢一集講講(1)自由同平等嘅關係、(2)美國最高法院嘅運作同精神、(3)美國憲法點樣由本來無平等二字，演變成喺平等嘅概念上比較先進嘅國家、(4)家長主義同男女不平等嘅關係。
當我哋重睇整個進程，就會發現我哋習以為常嘅概念可能好明顯地錯而不自知(一百年前嘅人覺得男女理應不平等)，而追求概念、價值觀嘅進步，可能唔係一兩代嘅人事。實在係路漫漫其修遠兮。
_____
Instagram: @cowgortalk
文字版：https://bit.ly/2XWGIDg2021-08-2844 min
牛哥講經丨廣東話哲學、書籍分享EP12《人類學家的無政府主義觀察》：其實你係一個無政府主義者，喺混亂中創造新嘅可能（三）去到第十二集，唔知你覺得《人類學家的無政府主義觀察》得唔得意呢？今集我哋會繼續去睇下，原來喺無政府主義者嘅視角之下，日常中嘅生活中嘅行為原來正正係一種不服從行為，例如揸車稍稍超速，行喺一條無鋪嘅路上面等等，呢啲行為就被政府同人民所組成嘅「沉默同盟」所默許，喺不停嘅不服從中，政府同人民就暗暗互相妥協。
然後，就會講下政治人物由於需要人民嘅支持，而用Charisma去迷惑/取信於人民，牛哥仲會馬丁路德金上身（當然差十萬九千里）。
最後，會預告一下下一本要講嘅書，估中有獎。
（正式內容由4:00開始）
_____
Instagram: @cowgortalk
文字版：https://bit.ly/2U1KUQL2021-08-2150 min
牛哥講經丨廣東話哲學、書籍分享EP11《人類學家的無政府主義觀察》：其實你係一個無政府主義者，喺混亂中創造新嘅可能（二）今集嘅開頭，牛哥會講下英國同香港生活嘅分別，然後繼續講返《人類學家的無政府主義觀察》。
或者我哋會認為，政府同無政府主義者處於一個矛盾關係，但作者並無好強烈咁認為政府唔應該存在，佢更多係擔心被歷史抺去嘅民眾，喺科技嘅發達之下被政府全然控制，人民自然構成嘅底層階級被瓦解。
所以作者希望以無政府主義式嘅眼鏡，去提醒：
1) 資本主義下嘅個人主義，帶嚟嘅係人與人之間嘅競爭
2) 政府只用數據去監控底層
3) 人民會「盲目」跟隨權威，例如法律、約定俗成
呢三點都令底層階級嘅自發變得支離破碎。
等我哋一齊藉由作者所觀察到嘅碎片（現實），去反思一下我哋到底有幾多分嘅自主，定還是，你我最終要承認自己係一隻綿羊。
（正式內容由11:15開始）
_____
Instagram: @cowgortalk
文字版：https://bit.ly/2U1KUQL2021-08-1449 min
牛哥講經丨廣東話哲學、書籍分享EP10《人類學家的無政府主義觀察》：其實你係一個無政府主義者，喺混亂中創造新嘅可能（一）今集要講嘅書係《人類學家的無政府主義觀察》，所以喺開頭嘅時候，會講下我所觀察到嘅消費劵使用頻率，而消費劵嘅目的，可能比你我諗嘅仲要深遠。
喺早幾集我哋講到《成功的反思》，可以見到一個社群主義者點樣以哲學嘅方式去審視政府同人民、才知者同非才知者嘅對立。而《人類學家的無政府主義觀察》除咗同樣揭示政府同人民嘅對立，更以此顯示秩序同混亂嘅對立，將秩序嘅井然、死板，混亂嘅創新、不堪一一道來，以一個中立嘅視角陳述各自嘅利弊，以嘗試尋求政府同人民嘅平衡點。
邀請你同牛哥一齊，戴上作者嘅「實踐中嘅無政府主義」嘅眼鏡，去用作者所觀察到嘅一塊又一塊碎片，去拼湊出一幅屬於你自己嘅無政府主義式生活嘅心態。
希望聽到最後嘅時候，你能夠感受到我所感受到嘅「我們最幸福」。
（正文由07:08開始）
___
Instagram: @cowgortalk
文字版：https://bit.ly/2U1KUQL2021-08-0742 min
牛哥講經丨廣東話哲學、書籍分享EP9《鄰人》：二戰期間波蘭人親手屠殺猶太人嘅故事，卻至今仍唔被承認（下集）2021年嘅七月到尾聲，亦係奧運開始嘅時間，今集牛哥會同各位分享一下對奧運嘅睇法，而一如以往，我嘅諗法係會比較抽離，想法可能會同各位唔同，如果想法唔同，希望各位可以同我交流一下，相互啟發。
上一集我哋講到波蘭人同猶太人已經喺耶德瓦布內共居咗好多年，相處算係融洽，但係戰爭打響嘅時候，波蘭人對猶太人嘅敵視就不斷升溫，今集，我哋一齊透過唔同人嘅證言去睇下波蘭人點樣面對群眾嘅瘋狂，而瘋狂嘅程度甚至係有猶太人選擇去走到德國嘅憲兵站以逃過波蘭人嘅屠殺，原來喺瘋狂之下，唔會因為職業而有所限制，平民亦一樣可以到達瘋狂嘅極致。
在此記錄一下《鄰人》呢本書特別嘅地方，縱觀歷史，我哋唔難發現有好多嗜血、暴力嘅行為，只係呢啲唔理性嘅行為嘅執行者往往會係受過訓練嘅軍人，我哋或者可以話呢啲軍人係身不由己，有軍令在身。而《鄰人》記錄住嘅，係飽受戰爭之苦嘅平民，將自己一直以嚟嘅屈辱、苦痛施加喺猶太人身上，只係呢一切嘅宣洩帶嚟嘅唔係安穩，而係事後不停否認過去歷史嘅罪責，用短短嘅一生，喺歷史之中輪迴。作為旁觀者，要做嘅唔係與之對罵，因為否認歷史係佢哋最後嘅自尊所在，自然就會搏老命去堅持自己。旁觀者能夠做嘅，就係營造一個承認歷史嘅氣氛，謹此而已。
（07:00 記錄結束，正文開始）
_____
Instagram: @cowgortalk
文字版：https://bit.ly/3iDDKKG2021-07-3140 min
牛哥講經丨廣東話哲學、書籍分享EP8《鄰人》：二戰期間波蘭人親手屠殺猶太人嘅故事，卻至今仍唔被承認（上集）今集，牛哥先記錄西歐、鄭州湖南水災；香港言語治療師總工會因為涉嫌發佈煽動刊物被捕；七月二十一嘅監警會報告；近來追星嘅熱烈。
牛哥記錄越嚟越多嘅事件，其實係啟發自今集要講嘅《鄰人》。呢本書以一個平凡嘅書名，記錄咗平凡嘅波蘭人，喺1941年7月10日將同自己民族同居咗超過二百字嘅猶太人屠殺殆盡，而屠殺發生嘅地點係一個田園式嘅小鎮----耶德瓦布內。而呢件令人唔容易接受嘅事件，亦唔受到依家居住喺耶德瓦布內嘅居民承認。
歷史事件有趣嘅地方在於，有幾多嘅發掘、證言都好，否認歷史嘅人總會充耳不聞，自以為自己得到天啟，眾人皆醉我獨醒。只係，批判呢啲否認歷史嘅人會唔會同樣落入同樣嘅我獨醒當中呢？
當下活著嘅人，就好似眼睛見唔到眼睛本身咁，必然要靠其他野（鏡、其他嘅眼）先可以觀察到自身。要辨清對錯，靠嘅，往往唔係自己。
「夫以銅為鏡，可以正衣冠；以古為鏡，可以知興替；以人為鏡，可以明得失。」
自以為是，自當不是
自以為不是，始尋個是
_____
Instagram: @cowgortalk
文字版：https://bit.ly/3iDDKKG2021-07-2446 min
牛哥講經丨廣東話哲學、書籍分享EP7《成功的反思》：當代著名政治哲學家揭示人民憤怒嘅來源（下集）終於嚟到成功的反思嘅最後一集，牛哥喺開始嘅時候會記錄七一刺警同信義中學，然後去講sandel 點樣簡單解釋自由市場自由主義同福利國家自由主義嘅內容同點樣暗地裏支持才知主義，從而掘出才知主義嘅核心。Sandel 到底覺得對政治哲學有重大影響嘅Rawls有咩缺失？
同牛哥一齊思考同揭開自由派同才知主義嘅面具，認清遮蓋天空嘅利維坦。
「人生而不自由，自由始於認清天生嘅枷鎖。」
（以下為內容索引，有星即係好想你聽多幾次）
*00:50 七一刺警
*04:34 信義中學 （牛哥唱dear Jane）
———
15:30 自由市場自由主義
25:30 自由市場自由主義嘅兩難
27:40 福利國家自由主義（差異原則+天賦隨機）
36:00 對大於善
42:00 Rawls 支持嘅不平等
45:50 福利國家自由主義下嘅才知者同非才知者
*46:50 天材，荀子
49:30 機運平等主義
51:00 個人主義嘅危害
53:10 開始總結全書
57:00 自由派 消費者（農場比喻）
01:00:55 競爭關係
*01:02:30 民主 共同體 生產者
01:06:45 數據知侮辱
01:10:55 黑人白人bb比喻
01:12:25 重得尊嚴
01:13:40 自由派嘅英雄 其實係倖存者偏差？
01:15:00 群體 尊嚴
———
01:17:35 終於講完本書 社會主義嘅影子
01:18:50 認清問題
*01:21:20 牛哥點睇天賦人權 （唱e-kids）
*01:25:32 講下哲學點理解民主
_____
Instagram: @cowgortalk
文字版：https://bit.ly/3quamKA2021-07-171h 30
牛哥講經丨廣東話哲學、書籍分享EP6 【特備節目】《毛語錄》：中共係點樣變得強大？近年嘅社會運動出現越嚟越多嘅衝突，正正顯示住呢啲社會運動就係階級鬥爭白熱化嘅象徵。將階級鬥爭運用到爐火純青嘅共產主義，將會係所有關心呢場巨大嘅階級鬥爭嘅人所應該要學習、留意嘅對象。
所以，今次牛哥講經適逢中國共產黨黨慶一百週年，去嘗試補充、解釋一下毛語錄嘅文字，點樣將一個世代農耕嘅社會轉化成階級鬥爭到上天下地嘅社會。
內容包括：
毛主席之野望（湖南獨立）
馬克思主義嘅唯物史觀
毛主席如何繼承王陽明心學
階級鬥爭嘅鼓舞、團結及分化
聽牛哥，學毛語，跟黨走。
_____
Instagram: @cowgortalk2021-07-101h 00
牛哥講經丨廣東話哲學、書籍分享EP5《成功的反思》：當代著名政治哲學家揭示人民憤怒嘅來源（中集）呢集，牛哥首先會用歷史嘅進程為你解釋喺當前時代感到前路茫茫，實屬正常。既然未來好似迷霧，咁就係時候去靜一靜落嚟，去反思一下自己一直理解嘅概念係咩意思。今次，我哋一齊思考民主。
Michael Sandel 唔單止認為才知主義對才知者同非才知有害，更係會令現代民主失效。因為才知主義下，人民將自己嘅政治權利雙手奉上到代議士手中，但代議士根本唔會喺議會中理性討論。
一齊聽下現代民主嘅可惜之處，去認清我哋以為熟知嘅概念。一齊聽下現代民主嘅可惜之處，去認清我哋以為熟知嘅概念。
(正式內容由09:35開始）
_____
Instagram: @cowgortalk
文字版：https://bit.ly/3quamKA2021-07-0334 min
牛哥講經丨廣東話哲學、書籍分享EP4《成功的反思》：當代著名政治哲學家揭示人民憤怒嘅來源（上集）唔知你有無發現，呢個時代嘅人民唔再好似2000年嘅開始咁宣揚普世價值、自由平等。依家更多嘅係不穩同暴力，而革命、抗命、出人意表嘅投票結果可以話係此起彼落。到底點解有咁大轉變？
一齊同牛哥藉由michael sandel 所寫嘅《成功的反思》，了解一下人民點解會如斯憤怒，呢個世代嘅平等又到底點樣構成一個屈辱政治。
(呢集嘅牛哥講經會出現第一個fake news，就係蘋果日報最後嘅紙本印刷係2021年6月24號，而非podcast 入面所講嘅26號。）
(見到李家超先生自信咁話自己係碩士，唔知你會唔會諗起sandel 呢？）
(正式內容由04:15開始）
_____
Instagram: @cowgortalk
文字版：https://bit.ly/3quamKA2021-06-2656 min
牛哥講經丨廣東話哲學、書籍分享EP3《初戀三摩地》：用名僧嘅戀愛故事為你講述愛同佛法（下集）一行禪師嘅經歷，印證住遇到愛情未必係一件壞事，但仍然好難簡單咁定義為一件好事。人成日都話，知易行難，知道愛情嘅結果仍愛落去，睇落更難，而你，將要同一行一齊面對呢場愛情嘅結果。 問問自己： 如果春天嚟到，你會係靠近花蕊欣賞、定係思索點樣迎接冬天？ 如果冬天一瞬嚟到，你會手握褪色嘅花瓣、定係守護僅有嘅嫩芽/種子？ 聽牛哥用一個北歐神話總結，去細味愛情嘅味道。
_____
Instagram: @cowgortalk
文字版：https://bit.ly/34J69Zc2021-06-1927 min
牛哥講經丨廣東話哲學、書籍分享EP2《初戀三摩地》：用名僧嘅戀愛故事為你講述愛同佛法（中集），用一粒牛丸講互即互入，再講愛嘅真諦。愛情被佛教所容許，但點解愛情會被佛教所容許呢？聽完今集你會發現，相戀時將佢當成一切，失去佢時將一切當成佢，其實都只係互即互入嘅表現。 一齊聽住牛哥唱歌，同用一粒牛丸去講出愛嘅真諦。
_____
Instagram: @cowgortalk
文字版：https://bit.ly/34J69Zc
2021-06-1629 min
牛哥講經丨廣東話哲學、書籍分享EP1《初戀三摩地》：用名僧嘅戀愛故事為你講述愛同佛法（上集），青年時嘅一行禪師，遇上愛情風暴……一行禪師原本全心專注於佛法嘅研習當中，但當一行遇到佢嘅時候，發現愛嘅種子明明確確咁生起，引發禪師對愛情嘅反思。如果求學時期不應談戀愛，咁求佛時期愛上一個人又點算呢？一齊聽下呢場戀愛故事，你就知道答案。
_____
Instagram: @cowgortalk
文字版：https://bit.ly/34J69Zc
-----索引
00:55 初戀三摩地簡介 愛同去執嘅顯然矛盾
03:25 禪宗公案：婆子燒庵
04:35 一行嘅背景
06:05 一行遇到佢
06:55 愛嘅種子生起
07:30 解釋藏識
09:55 愛同戒律，並唔相容
11:00 在家修行，仍保有愛
13:25 領會佛法，如同捕蛇
14:10 法尚應捨，何況非法
14:50 到彼岸去，就放下筏
16:15 見山是山，見水是水
17:20 欣賞無常，接受無常
19:55 佛陀嘅愛，叫做慈悲
22:00 多謝收聽2021-06-1322 min
牛哥講經丨廣東話哲學、書籍分享牛哥講乜經？2021-06-0200 min
Pritesh Pawar DigitalAnybooks App - Free Android App for Millions of Free eBooks | P2 #40Are you fond of reading too many books but cannot find or afford all of them? 🆓
Here is an amazing Android app for you 📚
Anybooks App provides you millions of free ebooks that you can read 📖
There is no subscription, no hidden charges or anything 💰
You will get the access to free ebooks once you install the app 👨💼
This app is not available for iOS for now 🍎
Follow @priteshpawardigital for such Interesting Digital Information ❤️2019-12-1301 min